ಕೆಟಿಎಂ ಡ್ಯೂಕ್‌ ಬೈಕ್‌ ಕಳ್ಳರ ಬಂಧನ

ಬೆಂಗಳೂರು: ಕೆಟಿಎಂ ಡ್ಯೂಕ್‌ ಬೈಕ್‌ಗಳನ್ನು ಕಳವು ಮಾಡುತ್ತಿದ್ದ ಬಹುರಾಷ್ಟ್ರೀಯ ಕಂಪನಿಯೊಂದರ ಮಾಜಿ ಉದ್ಯೋಗಿ ಸೇರಿ ಇಬ್ಬರನ್ನು ಆರ್‌.ಟಿ ನಗರ ಪೊಲೀಸರು ಬಂಧಿಸಿದ್ದಾರೆ.

ಶಿವಾಜಿನಗರ ನಿವಾಸಿ ಮೊಹಮ್ಮದ್‌ ಉಮ್ರಾಜ್‌ (32) ಹಾಗೂ ಆರ್‌.ಟಿ ನಗರದಲ್ಲಿ ವಾಸವಿದ್ದ ಉತ್ತರಪ್ರದೇಶದ ಮುಜಫರ್‌ ನಗರದ ಜಹೀರ್‌ ಆಲಂ (35) ಬಂಧಿತರು. ಇವರಿಂದ 4.50 ಲಕ್ಷ ರೂ. ಮೌಲ್ಯದ 3 ಕೆಟಿಎಂ ಡ್ಯೂಕ್‌ ಬೈಕ್‌ಗಳನ್ನು ಜಪ್ತಿ ಮಾಡಲಾಗಿದೆ.

ಮೊಹಮ್ಮದ್‌ ಉಮ್ರಾಜ್‌ ಕೆಲ ವರ್ಷದ ಹಿಂದೆ ಬಹುರಾಷ್ಟ್ರೀಯ ಸಾಫ್ಟ್‌ವೇರ್‌ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ. ಅಲ್ಲಿಂದ ಕೆಲಸ ಬಿಟ್ಟ ಬಳಿಕ ಬೇರೆ ಕೆಲಸಕ್ಕೆ ಸೇರಿರಲಿಲ್ಲ. ಈ ನಡುವೆ ಉತ್ತರಪ್ರದೇಶದಿಂದ ಬಂದಿದ್ದ ಜಹೀರ್‌ ಆಲಂ ಪರಿಚಯವಾಗಿದ್ದು, ಇಬ್ಬರು ಸೇರಿ ಡ್ಯೂಕ್‌ ಬೈಕ್‌ಗಳನ್ನು ಕಳ್ಳತನ ಮಾಡಲು ಶುರು ಮಾಡಿದ್ದರು.

ಜ.10ರಂದು ಸಂಜೆ 6 ಗಂಟೆ ಸುಮಾರಿಗೆ ಆರ್‌.ಟಿ ನಗರದ ದೇವೇಗೌಡ ರಸ್ತೆಯಲ್ಲಿನ ಪಿ.ಜಿಯೊಂದರ ಎದುರು ನಿಲ್ಲಿಸಿದ್ದ ಬೈಕ್‌ ಕಳವಾಗಿತ್ತು. ಈ ಕುರಿತು ಸಲ್ಮಾನ್‌ ಖಾನ್‌ ಎಂಬುವರು ದೂರು ನೀಡಿದ್ದರು. ಸಿಸಿ ಟಿವಿ ಕ್ಯಾಮೆರಾ ದೃಶ್ಯಗಳನ್ನು ಪರಿಶೀಲಿಸಿದ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ.