ತಮ್ಮನ ಪತ್ನಿ , ಮಗಳ ಮೇಲೆ ಹಲ್ಲೆ ಆರೋಪ

ಬೆಂಗಳೂರು: ಆಸ್ತಿ ವಿಚಾರದ ಮಾತುಕತೆ ನಡೆಯುವ ವೇಳೆ ಸಹೋದರನ ಪತ್ನಿ ಮತ್ತು ಮಕ್ಕಳ ಮೇಲೆ ಹಲ್ಲೆ ನಡೆಸಿದ ಆರೋಪದ ಮೇಲೆ ಮಾಜಿ ಕಾರ್ಪೊರೇಟರ್‌ ಹಾಗೂ ರೌಡಿ ಶೀಟರ್‌ ನಾಗರಾಜ್‌ ವಿರುದ್ಧ ಶ್ರೀರಾಂಪುರ ಠಾಣೆಯಲ್ಲಿ ದೂರು ದಾಖಲಾಗಿದೆ.

ನಾಗರಾಜ್‌ ಮತ್ತು ಈತನ ಪುತ್ರರಾದ ಎನ್‌.ಗಾಂಧಿ, ಎನ್‌. ಶಾಸ್ತ್ರಿ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.ಚಾಮುಂಡೇಶ್ವರಿ ಹಾಗೂ ಅವರ ಮಕ್ಕಳಾದ ಜಯಲಕ್ಷ್ಮೀ, ಶ್ವೇತಾ ಹಲ್ಲೆಯಿಂದ ಗಾಯಗೊಂಡಿದ್ದು ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದಾರೆ. ನ.25ರಂದು ಬೆಳಗ್ಗೆ 5 ಗಂಟೆಗೆ ಘಟನೆ ನಡೆದಿದೆ.

ಆರೋಪಿ ನಾಗರಾಜ್‌ ತನ್ನ ಇಬ್ಬರು ಮಕ್ಕಳು ಮತ್ತು 8 ಮಂದಿ ಸ್ನೇಹಿತರನ್ನು ಕರೆದುಕೊಂಡು ಸಹೋದರ ಧರ್ಮನ ಮನೆಗೆ ಹೋಗಿದ್ದರು. ಮಾತುಕತೆಗೆಂದು ಹೋಗಿದ್ದರಾದರೂ ಮಾತಿನ ನಡುವೆ ಜಗಳ ಶುರುವಾಗಿತ್ತು. ಈ ವೇಳೆ ಸಹೋದರನ ಪತ್ನಿ ಚಾಮುಂಡೇಶ್ವರಿ, ಇವರ ಮಗಳು ಶ್ವೇತಾ ಅವರಿಗೆ ಮಾರಕಾಸ್ತ್ರದಿಂದ ಹಲ್ಲೆ ನಡೆಸಿದ್ದಲ್ಲದೆ ಮನೆಯಲ್ಲಿದ್ದ ವಸ್ತುಗಳಿಗೆ ಹಾನಿ ಮಾಡಿದ್ದರು. ಗಲಾಟೆ ಕೇಳಿ ಸ್ಥಳಕ್ಕೆ ಬಂದ ಬಾಡಿಗೆದಾರರಾದ ಜಯಲಕ್ಷ್ಮೀ ಅವರ ಮೇಲೂ ಹಲ್ಲೆ ನಡೆಸಿದ್ದರು. ವಿಚಾರವನ್ನು ಪೊಲೀಸರಿಗೆ ತಿಳಿಸಿದರೆ ಕೊಲೆ ಮಾಡುವುದಾಗಿ ಪ್ರಾಣ ಬೆದರಿಕೆ ಹಾಕಿದ್ದರು.

ನಾಗರಾಜ್‌ ಮತ್ತು ಈತನ ಸಹೋದರ ಧರ್ಮನ ನಡುವೆ ಆಸ್ತಿ ವಿಚಾರವಾಗಿ ಈ ಹಿಂದೆ ಜಗಳ ನಡೆದಿತ್ತು. ಧರ್ಮ ಅನಾರೋಗ್ಯದಿಂದ ಮೃತಪಟ್ಟಿದ್ದು ಆಸ್ತಿ ವಿವಾದ ಮಾತ್ರ ಮುಂದುವರಿದಿತ್ತು. ಆರೋಪಿಗಳನ್ನು ಸದ್ಯದಲ್ಲೇ ಬಂಧಿಸಿ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.