ಗೃಹ ಸಾಲ ಹೆಸರಿನಲ್ಲಿ 2.63 ಲಕ್ಷ ರೂ. ವಂಚನೆ

ಬೆಂಗಳೂರು: ಖಾಸಗಿ ಫೈನಾನ್ಸ್‌ ಕಂಪನಿಯಿಂದ ಗೃಹ ಸಾಲ ಕೊಡಿಸುವುದಾಗಿ ನಂಬಿಸಿ ವ್ಯಕ್ತಿಯೊಬ್ಬರಿಂದ 2.63 ಲಕ್ಷ ರೂ. ಪಡೆದು ವಂಚನೆ ಮಾಡಿರುವ ಕುರಿತು ಸಿಐಡಿ ಸೈಬರ್‌ ಕ್ರೈಂ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಆರ್‌.ಟಿ. ನಗರದ ನಿವಾಸಿ ಕೆ.ಎಂ. ಶ್ರೀನಿವಾಸಲು(55) ಎಂಬುವರು ದೂರು ನೀಡಿದ್ದಾರೆ. ದೂರು ಆಧರಿಸಿ ಅನುರಾಗ್‌ ಟಾಗೂರ್‌, ಅಂಜಲಿ ಶರ್ಮಾ ಮತ್ತು ರಾಧಿಕಾ ಎಂಬುವರ ವಿರುದ್ಧ ಎಫ್‌ಐಆರ್‌ ದಾಖಲಿಸಿಕೊಂಡಿರುವ ಸೈಬರ್‌ ಕ್ರೈಂ ಠಾಣೆ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

2018 ಅಕ್ಟೋಬರ್‌ 22ರಂದು ಶ್ರೀನಿವಾಸಲು ಮೊಬೈಲ್‌ಗೆ ಅಂಜಲಿ ಎಂಬಾಕೆ ಕರೆ ಮಾಡಿ ಖಾಸಗಿ ಫೈನಾನ್ಸ್‌ ಕಂಪನಿ ಉದ್ಯೋಗಿ ಎಂದು ಪರಿಚಯ ಮಾಡಿಕೊಂಡಿದ್ದಾಳೆ. ನಂತರ ಸುಲಭವಾಗಿ ಗೃಹ ಸಾಲ ಕೊಡಿಸುವುದಾಗಿ ಹೇಳಿದ್ದಳು. ಅದಕ್ಕೆ ಒಪ್ಪಿದ ಶ್ರೀನಿವಾಸಲುಗೆ 15 ಲಕ್ಷ ರೂ. ಸಾಲ ಕೊಡಿಸುವುದಾಗಿ ಹೇಳಿ ವಿವಿಧ ಶುಲ್ಕ ಕಟ್ಟಬೇಕು ಎಂದು ಕೇಳಿದ್ದಾಳೆ. ಅದಕ್ಕೆ ಒಪ್ಪಿದಾಗ ಮತ್ತೊಬ್ಬ ಕರೆ ಮಾಡಿ ಶ್ರೀನಿವಾಸಲು ಬಳಿ ಎಲ್ಲ ದಾಖಲೆಗಳನ್ನು ಆನ್‌ಲೈನ್‌ನಲ್ಲಿ ಪಡೆದು ಅರ್ಜಿ ಭರ್ತಿ ಮಾಡಿದ್ದೇವೆ. ನಿಮಗೆ ಸಾಲ ಮಂಜೂರಾಗಿದೆ ಎಂದು ಹೇಳಿದ ಆತ ನಕಲಿ ದಾಖಲೆಗಳನ್ನು ದೂರುದಾರರ ವಾಟ್ಸ್‌ಆ್ಯಪ್‌ಗೆ ಕಳುಹಿಸಿದ್ದ.

ನಂತರ ಸಾಲ ಮಂಜೂರು ಮಾಡಲು ವಿವಿಧ ಶುಲ್ಕಗಳೆಂದು ಹೇಳಿ ಹಂತ ಹಂತವಾಗಿ 2.63 ಲಕ್ಷ ರೂ. ಪಡೆದು ವಂಚನೆ ಮಾಡಿದ್ದಾರೆ ಎಂದು ಶ್ರೀನಿವಾಸಲು ದೂರು ನೀಡಿದ್ದಾರೆ.