ಜಾಲಿ ರೈಡ್‌ಗೆ ಹೊರಟಿದ್ದಾಗ ಅಪಘಾತ: ಒಂದೇ ಕುಟುಂಬದ ಮೂವರು ಸೇರಿ ನಾಲ್ವರ ಸಾವು

ಆನೇಕಲ್‌ (ಬೆಂಗಳೂರು ಗ್ರಾಮಾಂತರ): ತಾಲೂಕಿನ ಸರ್ಜಾಪುರ ಸಮೀಪ ಸೋಮವಾರ ಮಧ್ಯರಾತ್ರಿ ನಡೆದ ಕಾರು ಅಪಘಾತದಲ್ಲಿ ಒಂದೇ ಕುಟುಂಬದ ಮೂವರು ಸೇರಿ ನಾಲ್ಕು ಮಂದಿ ಮೃತಪಟ್ಟಿದ್ದಾರೆ.

ಮೃತರು ಉತ್ತರಪ್ರದೇಶ ಮೂಲದವರಾಗಿದ್ದಾರೆ. ಒವಿಎಚ್‌ ಸಾಫ್ಟ್‌ವೇರ್‌ ಕಂಪನಿಯ ಉದ್ಯೋಗಿ ಅಂಜನಿ ಯಾದವ್‌(31), ಇವರ ಪತ್ನಿ ನೇಹಾ(28), ಪುತ್ರ ಧ್ರುವ್‌(2) ಹಾಗೂ ಅಂಜನಿ ಯಾದವ್‌ ಸ್ನೇಹಿತ ಸಂತೋಷ್‌ ಎಂಬುವರ ಪತ್ನಿ ಶುಭ್ರ(29) ಮೃತರು. ಸಂತೋಷ್‌(29) ಹಾಗೂ ಇವರ ಪುತ್ರಿ ಸಾನ್ವಿ(2) ಗಾಯಗೊಂಡಿದ್ದಾರೆ.

ಬಿಲ್ಲಾಪುರ ಸಮೀಪ ಎಕ್ಸೈಡ್‌ ಗೇಟ್‌ ಬಳಿಯಿರುವ ಡಿಎಸ್‌ ಮ್ಯಾಕ್ಸ್‌ ಸ್ಕೈಲಿಷ್‌ ಅಪಾರ್ಟ್‌ಮೆಂಟ್‌ನಲ್ಲಿ ವಾಸವಿದ್ದ ಎರಡು ಕುಟುಂಬಗಳ ಸದಸ್ಯರು ಸೋಮವಾರ ರಾತ್ರಿ ಊಟಕ್ಕೆಂದು ಕಾರಿನಲ್ಲಿ ಹೊರಗೆ ಹೋಗಿದ್ದರು. ಊಟ ಮುಗಿಸಿದ ನಂತರ ಜಾಲಿ ರೈಡ್‌ಗಾಗಿ ಕಾರಿನಲ್ಲಿ ಸರ್ಜಾಪುರದತ್ತ ತೆರಳಿದ್ದರು. ಸರ್ಜಾಪುರ ಸಮೀಪವಿರುವ ಕಾನ್ಫಿಡೆಂಟ್‌ ಅಪಾರ್ಟ್‌ಮೆಂಟ್‌ ಬಳಿ ವೇಗವಾಗಿ ಸಾಗುತ್ತಿದ್ದಾಗ, ಚಾಲಕನ ನಿಯಂತ್ರಣ ತಪ್ಪಿದ ಕಾರು, ರಸ್ತೆ ವಿಭಜಕವನ್ನು ದಾಟಿ ಎದುರು ರಸ್ತೆಯಲ್ಲಿ ಬರುತ್ತಿದ್ದ ಟಿಪ್ಪರ್‌ ಲಾರಿಗೆ ಡಿಕ್ಕಿ ಹೊಡೆದಿದೆ.

ಡಿಕ್ಕಿ ಹೊಡೆದ ರಭಸಕ್ಕೆ ಕಾರಿನ ಮುಂಭಾಗ ಸಂಪೂರ್ಣ ನಜ್ಜುಗುಜ್ಜಾಗಿದೆ. ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿರುವುದಾಗಿ ಸರ್ಜಾಪುರ ಠಾಣೆ ಪಿಎಸ್‌ಐ ಮಂಜುನಾಥ್‌ ತಿಳಿಸಿದ್ದಾರೆ.