ಪರಿಚಿತ ಮಹಿಳೆ ಜತೆ ಅಸಭ್ಯ ವರ್ತನೆ: ಚಾಲಕ ಬಂಧನ

ಬೆಂಗಳೂರು: ಟೈಲರಿಂಗ್‌ ಮಾಡುವ ಮಹಿಳೆಯೊಂದಿಗೆ ಅಸಭ್ಯ ವರ್ತನೆ ತೋರಿದ ಆರೋಪದ ಮೇರೆಗೆ ಕಾರು ಚಾಲಕನನ್ನು ಗಂಗಮ್ಮನಗುಡಿ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಜಾಲಹಳ್ಳಿ ಬಳಿಯ ಖಾತನ್‌ನಗರ ನಿವಾಸಿ ವೆಂಕಟೇಶ್‌ (43) ಬಂಧಿತ. ಮಹಿಳೆಗೆ ವಿವಾಹವಾಗಿದ್ದು, ಜಾಲಹಳ್ಳಿ ಬಳಿಯ ಖಾತನ್‌ ನಗರದಲ್ಲಿ ಟೈಲರಿಂಗ್‌ ಅಂಗಡಿ ನಡೆಸುತ್ತಿದ್ದಾರೆ. ಆರೋಪಿ ವೆಂಕಟೇಶ್‌ಗೂ ವಿವಾಹವಾಗಿ ಮಕ್ಕಳಿದ್ದಾರೆ. ಪರಿಚಿತನಾಗಿದ್ದ ವೆಂಕಟೇಶ್‌ ಮಹಿಳೆ ಜತೆ ಅನುಚಿತವಾಗಿ ವರ್ತಿಸಲು ಆರಂಭಿಸಿದ್ದ. ಅವರ ಟೈಲರಿಂಗ್‌ ಶಾಪ್‌ಗೂ ಹೋಗಿ ಕೆಟ್ಟದಾಗಿ ವರ್ತಿಸಿದ್ದ. ಮಹಿಳೆ ನೀಡಿದ ದೂರಿನ ಆಧಾರದಲ್ಲಿ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ.