ಲಗ್ನ ಪತ್ರಿಕೆಯೊಳಗಿಟ್ಟು 5 ಕೋಟಿ ರೂ. ಮೌಲ್ಯದ ಡ್ರಗ್ಸ್ ಕಳ್ಳಸಾಗಣೆ; ಪತ್ತೆ ಹಚ್ಚಿದ ಬೆಂಗಳೂರು ವಿಮಾನ ನಿಲ್ದಾಣ ಅಧಿಕಾರಿಗಳು

ಬೆಂಗಳೂರು: ಲಗ್ನ ಪತ್ರಿಕೆಗಳ ಒಳಗೆ ಸುಮಾರು ಐದು ಕೋಟಿ ರೂಪಾಯಿ ಮೌಲ್ಯದ ಮಾದಕವಸ್ತು ಎಫಿಡ್ರಿನ್ ಬಚ್ಚಿಟ್ಟು ಆಸ್ಟ್ರೇಲಿಯಾಕ್ಕೆ ಕಳ್ಳಸಾಗಣೆ ಮಾಡುತ್ತಿದ್ದುದನ್ನು ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಕಸ್ಟಮ್ಸ್ ಅಧಿಕಾರಿಗಳು ಪತ್ತೆಹಚ್ಚಿದ್ದಾರೆ.

ಗುಪ್ತಚರ ಅಧಿಕಾರಿಗಳಿಗೆ ಕೊರಿಯರ್‌ವೊಂದರಲ್ಲಿ ಮಾದಕವಸ್ತು ಇರುವ ಕುರಿತು ಅಧಿಕಾರಿಗಳಿಗೆ ಮಾಹಿತಿ ಬಂದಿತ್ತು. ಫೆಬ್ರವರಿ 21ರಂದು ವಿಮಾನ ನಿಲ್ದಾಣದ ಕಾರ್ಗೋ ಕಂಪ್ಲೆಕ್ಸ್‌ನಲ್ಲಿ ಕೊರಿಯರ್ ಅನ್ನು ಸ್ಕ್ಯಾನಿಂಗ್ ಮಾಡಲಾಯಿತು. ಪ್ರಾಥಮಿಕ ಹಂತದಲ್ಲಿ ಕೊರಿಯರ್ ಬಾಕ್ಸ್‌ನಲ್ಲಿ ಪುಡಿಯಂತಹ ವಸ್ತುಗಳು ಇರುವುದು ಖಚಿತವಾಗಿದೆ.

ಅದನ್ನು ತೆರೆದು ನೋಡಿದಾಗ ಅದರಲ್ಲಿ 43 ಲಗ್ನ ಪತ್ರಿಕೆಗಳು ಹಾಗೂ ವಸ್ತ್ರಗಳು ಇದ್ದವು. ಅನುಮಾನಗೊಂಡು ಲಗ್ನಪತ್ರಿಕೆಗಳ ಕಾರ್ಡ್‌ಬೋರ್ಡ್‌ ಬಿಚ್ಚಿ ನೋಡಿದಾಗ ದಪ್ಪ ಲಗ್ನಪತ್ರಿಕೆ ಮಧ್ಯದಲ್ಲಿ ಪಾರದರ್ಶಕ ಪ್ಲಾಸ್ಟಿಕ್ ಕವರ್‌ಗಳಲ್ಲಿ ಮಾದಕ ವಸ್ತು ಇಟ್ಟಿರುವುದು ಕಂಡು ಬಂದಿದೆ.

ಒಟ್ಟು 43 ಲಗ್ನ ಪತ್ರಿಕೆಯಲ್ಲಿ 86 ಎಫಿಡ್ರಿನ್ ಇರುವ ಪ್ಯಾಕೆಟ್‌ಗಳು ಸಿಕ್ಕಿವೆ. ಒಟ್ಟು 5.05 ಕೆ.ಜಿ ಇರುವ ಎಫಿಡ್ರಿನ್ ಮೌಲ್ಯ 5 ಕೋಟಿ ರೂ.ಗೂ ಅಧಿಕ ಎಂದು ಅಧಿಕಾರಿಗಳು ತಿಳಿಸಿದರು‌. ಕೊರಿಯರ್ ಅನ್ನು ಮಧುರೈ ಮೂಲದ ಎಕ್ಸ್‌ಪೊರ್ಟರ್ ಆಸ್ಟ್ರೇಲಿಯಾಗೆ ಕಳ್ಳಸಾಗಣೆ ಮಾಡಲೆತ್ತಿಸಿದ್ದಾರೆ.

3 ದಿನಗಳಲ್ಲಿ 2 ನೇ ಪ್ರಕರಣ

ಮೂರು ದಿನಗಳ ಹಿಂದಷ್ಟೇ ಏರ್ ಕಾರ್ಗೊ ಕೊರಿಯರ್ ಕಾಂಪ್ಲೆಕ್ಸ್‌ನಿಂದ 5 ಕೆ.ಜಿ ಎಫಿಡ್ರಿನ್ ಕಳ್ಳಸಾಗಣೆ ಯತ್ನವನ್ನು ಅಧಿಕಾರಿಗಳು ವಿಫಲಗೊಳಿಸಿದ್ದರು.