ಎಂಬಿಎ, ಡಿಪ್ಲೊಮಾ ವಿದ್ಯಾರ್ಥಿಗಳ ಬಂಧನ: 9 ಕೆ.ಜಿ ಗಾಂಜಾ ಜಪ್ತಿ

ಬೆಂಗಳೂರು: ಗಾಂಜಾ ಮಾರಾಟ ಮಾಡುತ್ತಿದ್ದ ಎಂಬಿಎ ಮತ್ತು ಡಿಪ್ಲೊಮಾ ವಿದ್ಯಾರ್ಥಿಗಳಿಬ್ಬರನ್ನು ಬಂಧಿಸಿರುವ ಮೈಕೋ ಲೇಔಟ್‌ ಠಾಣೆ ಪೊಲೀಸರು, 9 ಕೆ.ಜಿ 650 ಗ್ರಾಂ ಗಾಂಜಾ ಜಪ್ತಿ ಮಾಡಿದ್ದಾರೆ.

ತೆಲಂಗಾಣ ಮೂಲದ ಭಾನುತೇಜ ರೆಡ್ಡಿ(19) ಮತ್ತು ಶಿವಮೊಗ್ಗ ಜಿಲ್ಲೆ ಸೊರಬ ಮೂಲದ ಸಂಜಯ್‌ ಕುಮಾರ್‌(25) ಬಂಧಿತರು.

ಆಂಧ್ರಪ್ರದೇಶದಿಂದ ಗಾಂಜಾ ತೆಗೆದುಕೊಂಡು ಸಂಜಯ್‌ ಕುಮಾರ್‌ಗೆ ನೀಡಲು ಇತ್ತೀಚೆಗೆ ಭಾನುತೇಜ ಬೆಂಗಳೂರಿಗೆ ಬಂದಿದ್ದ. ಖಚಿತ ಮಾಹಿತಿ ಆಧರಿಸಿ ಇಬ್ಬರನ್ನು ಬಂಧಿಸಿ ಗಾಂಜಾ ಜಪ್ತಿ ಮಾಡಲಾಗಿದೆ.

ಕಮ್ಮಂ ಜಿಲ್ಲೆಯವನಾದ ಭಾನುತೇಜ, ಡಿಪ್ಲೊಮಾ ಓದುತ್ತಿದ್ದಾನೆ. ವಿಶಾಖಪಟ್ಟಣದಿಂದ ಕಮ್ಮಿ ಬೆಲೆಗೆ ಗಾಂಜಾ ತಂದು ಸಂಜಯ್‌ಗೆ ನೀಡಿದ್ದ. ಆರೋಪಿಗಳ ವಿರುದ್ಧ ಈ ಹಿಂದೆ ಯಾವುದೇ ಕೇಸ್‌ ದಾಖಲಾಗಿಲ್ಲ. ಆದರೂ, ಈ ಹಿಂದೆಯೂ ಆರೋಪಿಗಳು ಗಾಂಜಾ ಸಾಗಾಟದಲ್ಲಿ ತೊಡಗಿದ್ದರೇ ಎಂಬ ಬಗ್ಗೆ ಪರಿಶೀಲನೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದರು.

ಮಗ ವ್ಯಾಸಂಗ ಮಾಡಲಿ ಎಂದು ಸಂಜಯ್‌ನನ್ನು ಶಿವಮೊಗ್ಗದಿಂದ ಪಾಲಕರು ಬೆಂಗಳೂರಿಗೆ ಕಳುಹಿಸಿದ್ದರು. ಮತ್ತಿಕೆರೆಯ ಪಿ.ಜಿಯಲ್ಲಿ ವಾಸವಿದ್ದ ಸಂಜಯ್‌, ಖಾಸಗಿ ಕಾಲೇಜೊಂದರಲ್ಲಿ ಎಂಬಿಎ ಓದುತ್ತಿದ್ದ. ಆದರೆ, ಅಕ್ರಮ ಮಾರ್ಗದಲ್ಲಿ ಹಣ ಗಳಿಸುವ ಆಸೆಗೆ ಬಿದ್ದು, ಗಾಂಜಾ ಸೇವನೆಯ ಹವ್ಯಾಸದಿಂದ ಮಾದಕವಸ್ತುಗಳ ಮಾರಾಟ ಜಾಲಕ್ಕೆ ಸೇರಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.