ಬೆಲ್ಜಿಯಂನಿಂದ ಬೆಂಗಳೂರಿಗೆ ಬರುತ್ತಿದ್ದ ಕೋಟಿ ರೂ. ಮೌಲ್ಯದ ಡ್ರಗ್ಸ್‌ ವಶ, ಹೇಗೆ ಅಡಗಿಸಿಟ್ಟಿದ್ದರು ಗೊತ್ತಾ?

ಬೆಂಗಳೂರು:ಎಲ್ಲಾ ವಿದೇಶಿ ಡ್ರಗ್‌ಗಳೂ ವಿಮಾನ ನಿಲ್ದಾಣಗಳ ಮೂಲಕವೇ ದೇಶದೊಳಗೆ ನುಸುಳುತ್ತಿದ್ದು, ಸ್ಕ್ಯಾ‌ನಿಂಗ್‌ ಯಂತ್ರಗಳ ಕಣ್ತಪ್ಪಿಸಿ ಇವೆಲ್ಲಾಒಳಗೆ ನುಸುಳುತ್ತಿರುವುದಾದರೂ ಹೇಗೆ ಎನ್ನುವ ಬಗ್ಗೆ ಸಾಮಾಜಿಕ ತಾಣಗಳಲ್ಲಿ ವ್ಯಾಪಕ ಚರ್ಚೆ ನಡೆಯುತ್ತಿರುವ ಹೊತ್ತಲ್ಲೇ ಅಂತಾರಾಷ್ಟ್ರೀಯ ಕೊರಿಯರ್‌ ಕೇಂದ್ರದ ಕಸ್ಟಮ್ಸ್‌ ಅಧಿಕಾರಿಗಳು ಒಂದು ಕೋಟಿ ರೂ. ಮೌಲ್ಯದ ಎಂಡಿಎಂಎ ಮಾತ್ರೆಗಳನ್ನು ವಶಪಡಿಸಿಕೊಂಡಿದ್ದಾರೆ.

ಎಲೆಕ್ಟ್ರಾನಿಕ್‌ ಮಸಾಜರ್‌ನಲ್ಲಿ ಬಚ್ಚಿಟ್ಟ ಎಂಡಿಎಂಎ ಮಾತ್ರೆಗಳನ್ನು ಬೆಲ್ಜಿಯಂ ಮೂಲಕ ಬೆಂಗಳೂರಿಗೆ ತರಿಸಲಾಗಿತ್ತು. ಅಂತಾರಾಷ್ಟ್ರೀಯ ಕೊರಿಯರ್‌ ಕಚೇರಿಯಲ್ಲಿ ಪಾರ್ಸೆಲ್‌ ಅನ್ನು ಸ್ಕ್ಯಾನಿಂಗ್‌ಗೆ ಒಳಪಡಿಸಿದಾಗ ಅದರೊಳಗೆ ಒಂದು ಕೋಟಿ ರೂ. ಮೌಲ್ಯದ 1980 ಗ್ರಾಂ ತೂಕದ ಎಂಡಿಎಂಎ ಮಾತ್ರೆಗಳಿರುವುದು ಪತ್ತೆಯಾಗಿದೆ.

ಅಮೆರಿಕ ಮತ್ತು ಕೆನಡಾದ ಡ್ರಗ್‌ ಪೆಡ್ಲರ್‌ಗಳು ಇತರೆ ದೇಶಗಳ ಮೂಲಕ ಕೊರಿಯರ್‌ನಲ್ಲಿ ಡ್ರಗ್‌ಗಳನ್ನು ಕಳುಹಿಸುತ್ತಾರೆ. ಈ ಬಾರಿ ಆ ಪ್ರಯತ್ನ ವಿಫಲಗೊಳಿಸುವಲ್ಲಿ ಅಧಿಕಾರಿಗಳು ಯಶಸ್ವಿಯಾಗಿದ್ದಾರೆ.

ನಡುರಾತ್ರಿ ಕಾರಿನಲ್ಲಿ 65 ಲಕ್ಷ ಹವಾಲಾ ಹಣ ಸಾಗಿಸುತ್ತಿದ್ದ ಮೂವರು ಅಂದರ್

ಮತ್ತೊಂದು ಕಾರ್ಯಾಚರಣೆ
ಡ್ರಗ್‌ ಜಾಲದ ವಿರುದ್ಧ ಕಾರ್ಯಾಚರಣೆ ಮುಂದುವರಿಸಿರುವ ಪಶ್ಚಿಮ ಡಿಸಿಪಿ ವಿಭಾಗದ ಪೊಲೀಸರು ಆರು ಮಂದಿ ಪೆಡ್ಲರ್‌ಗಳನ್ನು ಬಂಧಿಸಿದ್ದಾರೆ. ಗೊರಗುಂಟೆಪಾಳ್ಯ ನಿವಾಸಿ ನವೀನ್‌ (19), ಅಜಯ್‌(20), ರಾಹುಲ್‌ (20), ಕೆ.ನವೀನ್‌ (20), ಗಂಗೊಂಡನಹಳ್ಳಿಯ ಮೊಯೀನ್‌ ಪಾಷಾ (20) ನಯಾಜ್‌ ಅಹಮದ್‌ (40) ಬಂಧಿತರು. ಇವರಿಂದ 2.1 ಕೆ.ಜಿ. ಗಾಂಜಾ ಜಪ್ತಿ ಮಾಡಲಾಗಿದೆ.