ಬೆಂಗಳೂರು: ಪ್ರತಿಷ್ಠಿತ ಖಾಸಗಿ ಕಂಪನಿಗಳ ವ್ಯವಹಾರದ ನಕಲಿ ಇ-ಮೇಲ್ ಐಡಿ ಸೃಷ್ಟಿಸಿದ ಸೈಬರ್ ಖದೀಮರು ತಮ್ಮ ಬ್ಯಾಂಕ್ ಖಾತೆಗಳಿಗೆ 1.43 ಕೋಟಿ ರೂ. ವರ್ಗಾಯಿಸಿಕೊಂಡು ವಂಚಿಸಿದ್ದಾರೆ.
ಯಲಹಂಕ ಕೈಗಾರಿಕಾ ಪ್ರದೇಶದ ಆರ್ಎಲ್ಎಫ್ಸಿ ಪ್ರೈ.ಲಿ ಕಂಪನಿಯ 79.66 ಲಕ್ಷ ರೂ. ಹಾಗೂ ನಾಗವಾರ ಮುಖ್ಯರಸ್ತೆಯ ಇಂಡಿಯನ್ ಡಿಸೈನ್ಸ್ ಎಕ್ಸ್ಪೋರ್ಟ್ ಪ್ರೈ.ಲಿ ಕಂಪನಿಯ 63.75 ಲಕ್ಷ ರೂ. ವಂಚಿಸಿದ್ದು, ಸೈಬರ್ ಕ್ರೈಂ ಠಾಣೆಯಲ್ಲಿ ಎರಡು ಪ್ರತ್ಯೇಕ ಎಫ್ಐಆರ್ಗಳು ದಾಖಲಾಗಿವೆ.
ಔಷಧ ತಯಾರಿಕ ಕಂಪನಿಗೆ 79.66 ಲಕ್ಷ ರೂ.: ಔಷಧ ತಯಾರಿಕ ಕಂಪನಿಯಾದ ಆರ್ಎಲ್ಎಫ್ಸಿ ಪ್ರೈ.ಲಿಮಿಟೆಡ್ನ ಇ ಮೇಲ್ ನಕಲಿ ಐಡಿ ಸೃಷ್ಟಿಸಿದ ಸೈಬರ್ ಖದೀಮರು, ಕಂಪನಿಗೆ ಸೇರಬೇಕಾದ 79.66 ಲಕ್ಷ ರೂ. ಹಣವನ್ನು ತಮ್ಮ ಬ್ಯಾಂಕ್ ಖಾತೆಗೆ ಜಮಾ ಮಾಡಿಸಿಕೊಂಡಿದ್ದಾರೆ.
ಗಾರ್ಮೆಂಟ್ಸ್ ಕಂಪನಿಗೆ 63 ಲಕ್ಷ ರೂ. ವಂಚನೆ: ಇಂಡಿಯನ್ ಡಿಸೈನ್ ಎಕ್ಸ್ಪೋರ್ಟ್ ಪ್ರೈ.ಲಿ. ಹೆಸರಿನ ಸಿದ್ಧ ಉಡುಪು ತಯಾರಿಕಾ ಕಂಪನಿ ಚೀನಾ ಮೂಲದ ಕಂಪನಿಯಿಂದ ಕೋಟ್ಯಂತರ ರೂ. ಮೌಲ್ಯದ ಕಚ್ಚಾ ವಸ್ತುಗಳನ್ನು ಆಮದು ಮಾಡಿಸಿಕೊಂಡು ಇ ಮೇಲ್ ಮೂಲಕ ವ್ಯವಹಾರವನ್ನು ನಡೆಸುತ್ತಿತ್ತು.
ಇದನ್ನು ಅರಿತ ಖದೀಮರು ಚೀನಾ ಕಂಪನಿ ಹೆಸರಿನ ಇ ಮೇಲ್ ಐಡಿಯನ್ನು ನಕಲಿ ಮಾಡಿದ್ದರು. 2017ರ ಡಿ.14ರಂದು ಇಂಡಿಯನ್ ಡಿಸೈನ್ ಎಕ್ಸ್ಪೋರ್ಟ್ ಕಂಪನಿಗೆ ಚೀನಾ ಕಂಪನಿ ಹೆಸರಿನಲ್ಲಿ ನಕಲಿ ಇ ಮೇಲ್ ಐಡಿಯಲ್ಲಿ ತಮ್ಮ ಬ್ಯಾಂಕ್ ಖಾತೆ ನಂಬರ್ ಬದಲಾಗಿದೆ ಎಂದು ಹೊಸ ಖಾತೆ ಸಂಖ್ಯೆ ಕಳುಹಿಸಿ 63.75 ಲಕ್ಷ ರೂ.ವರ್ಗಾವಣೆ ಮಾಡಿಸಿಕೊಂಡಿದ್ದರು ಎಂದು ಪೊಲೀಸರು ತಿಳಿಸಿದರು.