ಸೈಕಲ್‌ ರವಿಗೆ ಸೇರಿದ ಆಸ್ತಿ ಇಡಿ ವಶಕ್ಕೆ

ಬೆಂಗಳೂರು : ಕೊಲೆ, ಸುಲಿಗೆ, ದರೋಡೆ, ಅಪಹರಣ ಸೇರಿದಂತೆ ಹಲವು ಅಪರಾಧ ಪ್ರಕರಣಗಳಲ್ಲಿ ಭಾಗಿಯಾಗಿರುವ ಆರೋಪಿ, ಕುಖ್ಯಾತ ರೌಡಿ ರವಿ ಅಲಿಯಾಸ್‌ ಸೈಕಲ್‌ ರವಿಗೆ ಸೇರಿದ 25.60 ಲಕ್ಷ ರೂ. ಮೌಲ್ಯದ ನಾಲ್ಕು ಆಸ್ತಿಗಳನ್ನು ಜಾರಿ ನಿರ್ದೇಶನಾಲಯ ವಶಕ್ಕೆ ತೆಗೆದುಕೊಂಡಿದೆ.

ರಾಜ್ಯ ಪೊಲೀಸರು ದಾಖಲಿಸಿಕೊಂಡಿರುವ ಕೊಲೆ, ಅಪಹರಣ, ದರೋಡೆ, ಸುಲಿಗೆ, ಶಸ್ತ್ರಾಸ್ತ್ರ ಇಟ್ಟುಕೊಂಡಿರುವ ಆರೋಪ ಸೇರಿದಂತೆ 8 ಪ್ರಕರಣಗಳ ಆಧಾರದ ಮೇಲೆ ಜಾರಿ ನಿರ್ದೇಶನಾಲಯ ಪ್ರಕರಣ ದಾಖಲಿಸಿಕೊಂಡು ಅಪರಾಧ ಪ್ರಕರಣಗಳಿಂದ ಗಳಿಸಿಕೊಂಡಿರುವ ಆಸ್ತಿಯನ್ನು ವಶಪಡಿಸಿಕೊಳ್ಳುವ ಪ್ರಕ್ರಿಯೆ ಆರಂಭಿಸಿತ್ತು. ಅದರಂತೆ ರವಿ ಪತ್ನಿ ಆರ್‌.ರಮ್ಯಾ ಹೆಸರಿನಲ್ಲಿರುವ ಯಶವಂತಪುರ ಹೋಬಳಿ ಕೊಡಿಗೇಹಳ್ಳಿಯಲ್ಲಿರುವ 3 ಫ್ಲ್ಯಾಟ್‌ಗಳು ಹಾಗೂ ಅದೇ ಪ್ರದೇಶದಲ್ಲಿ ತಾಯಿ ಲಕ್ಷ್ಮಮ್ಮ ಹೆಸರಿನಲ್ಲಿರುವ ಒಂದು ಸೈಟ್‌ ವಶಪಡಿಸಿಕೊಳ್ಳಲಾಗಿದೆ. ನೋಂದಣಿ ಪ್ರಕಾರ ಈ ಆಸ್ತಿಗಳ ಮೌಲ್ಯ 25.60 ಲಕ್ಷ ರೂ. ಆಗಿದೆ ಎಂದು ಇ.ಡಿ ಪ್ರಕಟಣೆಯಲ್ಲಿ ತಿಳಿಸಿದೆ. ಪರಪ್ಪನ ಅಗ್ರಹಾರ ಜೈಲಿನಲ್ಲಿರುವ ರವಿ ವಿರುದ್ಧ ನ್ಯಾಯಾಲಯದಲ್ಲಿ ವಿಚಾರಣೆ ಹಂತದಲ್ಲಿ ಹಾಗೂ ತನಿಖಾ ಹಂತದಲ್ಲಿ ಹಲವು ಪ್ರಕರಣಗಳು ಇವೆ.