ಸವತಿ ಹೆಸರಲ್ಲಿ ನಕಲಿ ಖಾತೆ : ಮಹಿಳೆ ಸೆರೆ

ಬೆಂಗಳೂರು: ಮೊದಲನೇ ಪತ್ನಿಯಿಂದ ಪತಿ ದೂರವಿರುವಂತೆ ಮಾಡಲು ಆಕೆಯ ಹೆಸರಲ್ಲಿ ಹೆಸರಿನಲ್ಲಿ ನಕಲಿ ಫೇಸ್‌ಬುಕ್‌ ಖಾತೆ ಸೃಷ್ಟಿಸಿ ಅಶ್ಲೀಲ ವಿಡಿಯೋ ಪೋಸ್ಟ್‌ ಮಾಡಿದ್ದ ಎರಡನೇ ಪತ್ನಿಯನ್ನು ನಗರ ಸೈಬರ್‌ ಕ್ರೈಂ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಪಾದರಾಯನಪುರ ನಿವಾಸಿ ಆಯಿಷಾ ಸಿದ್ದಿಕ್‌ (23) ಬಂಧಿತ ಆರೋಪಿ. ಆಟೋ ಚಾಲಕನಾಗಿರುವ ಪತಿ ಮೊದಲನೇ ಪತ್ನಿಯಿಂದ ದೂರ ಆಗಿರುವುದಾಗಿ ಹೇಳಿ ಮದುವೆ ಮಾಡಿಕೊಂಡಿದ್ದ. ಆದರೆ, ಇತ್ತೀಚೆಗೆ ನನ್ನನ್ನು ಬಿಟ್ಟು ಆಕೆಯೊಂದಿಗೆ ಇರುತ್ತಿದ್ದ. ಪತಿಯಿಂದ ಆಕೆಯನ್ನು ದೂರ ಮಾಡಬೇಕಿತ್ತು. ಅದಕ್ಕಾಗಿ ಆಕೆಯ ಫೋಟೋಗಳನ್ನು ಬಳಸಿ ನಕಲಿ ಫೇಸ್‌ಬುಕ್‌ ಖಾತೆ ಸೃಷ್ಟಿಸಿ ಅಶ್ಲೀಲ ಪೋಸ್ಟ್‌ಗಳನ್ನು ಮಾಡಿದ್ದೆ. ಈ ಮೂಲಕ ಅವರಿಬ್ಬರ ನಡುವೆ ಭಿನ್ನಾಭಿಪ್ರಾಯ ಉಂಟು ಮಾಡಿ, ಪತಿ ನನ್ನೊಂದಿಗೆ ಬಂದು ವಾಸಿಸುತ್ತಾರೆಂದು ಭಾವಿಸಿದ್ದೆ ಎಂದು ತಿಳಿಸಿದ್ದಾಗಿ ತನಿಖಾಧಿಕಾರಿ ಯಶವಂತ್‌ ಕುಮಾರ್‌ ಮಾಹಿತಿ ನೀಡಿದ್ದಾರೆ. ತನ್ನ ಹೆಸರಿನಲ್ಲ ನಕಲಿ ಖಾತೆ ತೆರೆದಿರುವುದಾಗಿ ಅ.11ರಂದು ಆಟೊ ಚಾಲಕನ ಮೊದಲ ಪತ್ನಿ ಸೈಬರ್‌ ಕ್ರೈಂ ಠಾಣೆಗೆ ದೂರು ನೀಡಿದ್ದರು.