ನಕಲಿ ದಾಖಲೆ ನೀಡಿ ದುಬೈಗೆ ಹಾರಲು ಯತ್ನಿಸಿದ ಟೈಲರ್‌ ಬಂಧನ

ಬೆಂಗಳೂರು: ನಕಲಿ ದಾಖಲೆ ನೀಡಿ ಬೆಂಗಳೂರು ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ದುಬೈಗೆ ಹಾರಲು ಯತ್ನಿಸುತ್ತಿದ್ದ ಬಾಂಗ್ಲಾ ದೇಶ ಮೂಲದ ಟೈಲರ್‌ ಒಬ್ಬನನ್ನು ವಲಸೆ ಅಧಿಕಾರಿಗಳು ಬಂಧಿಸಿದ್ದಾರೆ.

2004ರಲ್ಲಿ ಭಾರತಕ್ಕೆ ಬಂದಿದ್ದ ಆರೋಪಿ, ಇಲ್ಲಿಂದಲೇ ಪಾಸ್‌ಪೋರ್ಟ್‌ ಮಾಡಿಸಿಕೊಂಡಿದ್ದ. ಇದೇ ಪಾಸ್‌ಪೋರ್ಟ್‌ ಮೂಲಕ ದುಬೈಗೆ ಕೆಲಸಕ್ಕಾಗಿ ಪ್ರಯಾಣಿಸಲು ಸಿದ್ಧವಾಗಿದ್ದ. ಈ ವೇಳೆ ವಲಸೆ ಅಧಿಕಾರಿಗಳು ಈತನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ತಾನು ಬಾಂಗ್ಲಾ ಮೂಲದವನಾಗಿದ್ದು, 15 ವರ್ಷಗಳಿಂದ ಬೆಂಗಳೂರಿನಲ್ಲೇ ಕೆಲಸ ಮಾಡಿಕೊಂಡಿದ್ದಾಗಿ ಹೇಳಿದ್ದಾನೆ ಎಂದು ತಿಳಿದು ಬಂದಿದೆ.

ಬಾಂಗ್ಲಾದ ಲೋಹಾಜೋಂಗ್‌ ಪ್ರದೇಶದವನಾಗಿರುವ ಮೊಹಮದ್‌ ಅಲೀಮ್‌ ಶೇಖ್‌ ಬಂಧಿತ ಆರೋಪಿ. ಎಚ್‌ಎಸ್‌ಆರ್‌ ಲೇಔಟ್‌ನ ಪುಟ್ಟರಾಜು ಬಡಾವಣೆಯಲ್ಲಿ ನೆಲೆಸಿದ್ದು, ನಾನಾ ಕೆಲಸಗಳನ್ನು ಮಾಡಿಕೊಂಡಿದ್ದ. ಮುಖ್ಯವಾಗಿ ಬಟ್ಟೆ ವ್ಯಾಪಾರ ಮತ್ತು ಟೈಲರ್‌ ಕೆಲಸ ಮಾಡಿಕೊಂಡಿದ್ದೆ ಎಂದು ಈತ ಅಧಿಕಾರಿಗಳಿಗೆ ಹೇಳಿದ್ದಾನೆ.