ಫ್ಲಿಪ್‌ಕಾರ್ಟ್‌ ವಂಚನೆ: ಸ್ಥಾಪಕರ ವಿರುದ್ಧ ಪ್ರಕರಣ

ಬೆಂಗಳೂರು: ಪ್ರಮುಖ ಇ-ಕಾಮರ್ಸ್‌ ಕಂಪೆನಿ ಫ್ಲಿಪ್‌ಕಾರ್ಟ್‌ ಮೋಸ ಮಾಡಿದೆ ಎಂದು ದೂರಿ ಅದರ ಸ್ಥಾಪಕರಾದ ಸಚಿನ್‌ ಬನ್ಸಾಲ್‌ ಮತ್ತು ಬಿನ್ನಿ ಬನ್ಸಾಲ್‌ ಹಾಗೂ ಇತರ ಮೂವರು ಸಿಬ್ಬಂದಿ ವಿರುದ್ಧ ವ್ಯಾಪಾರಿಯೊಬ್ಬರು ಪ್ರಕರಣ ದಾಖಲಿಸಿದ್ದಾರೆ.

ಕಂಪೆನಿಯು 12,500 ಲ್ಯಾಪ್‌ಟಾಪ್‌ಗಳನ್ನು ಪೂರೈಸುವಂತೆ ಕೇಳಿಕೊಂಡಿತ್ತು. ಆದರೆ ಪಾವತಿಸಬೇಕಿರುವ ಮೊತ್ತದಲ್ಲಿ 9.96 ಬಾಕಿ ಇರಿಸಿ ವಂಚಿಸಿದೆ ಎಂದು ಇಂದಿರಾ ನಗರದಲ್ಲಿರುವ ಸಿ-ಸ್ಟೋರ್‌ ಕಂಪೆನಿಯ ಮಾಲೀಕ ನವೀನ್‌ ಕುಮಾರ್‌ ಎಂಬವರು ಪ್ರಕರಣ ದಾಖಲಿಸಿದ್ದಾರೆ.

ಪೂರೈಸಿರುವ ವಸ್ತುಗಳಲ್ಲಿ 1,482 ವಸ್ತುಗಳನ್ನು ಕಂಪೆನಿ ವಾಪಸ್‌ ಮಾಡಿದ್ದು, ಉಳಿದವುಗಳ ಹಣ ಪಾವತಿಸಿಲ್ಲ, ಟಿಡಿಎಸ್‌ ಮತ್ತು ಸಾಗಣೆ ವೆಚ್ಚ ಕೂಡ ನೀಡಿಲ್ಲ. ಕೇಳಿದರೆ 3,901 ವಸ್ತುಗಳನ್ನು ವಾಪಸ್‌ ಮಾಡಿರುವುದಾಗಿ ಕಂಪೆನಿಯವರು ಹೇಳುತ್ತಿದ್ದಾರೆ. ಈ ಮೂಲಕ 9,96,21,419 ರೂ. ವಂಚಿಸುತ್ತಿದ್ದಾರೆ ಎಂದು ನವೀನ್‌ ದೂರಿನಲ್ಲಿ ವಿವರಿಸಿದ್ದಾರೆ.

ನವೀನ್‌ ದೂರು ನೀಡಿರುವ ಹಿನ್ನೆಲೆಯಲ್ಲಿ ಇಂದಿರಾನಗರ ಪೊಲೀಸರು ಸಚಿನ್‌ ಬನ್ಸಾಲ್‌ ಮತ್ತು ಬಿನ್ನಿ ಬನ್ಸಾಲ್‌ ಸೇರಿದಂತೆ ಐವರ ವಿರುದ್ಧ ಎಫ್‌ಐಆರ್‌ ದಾಖಲಿಸಿದ್ದಾರೆ.