ಪುಸ್ತಕ ಪಡೆದು ಹಣ ಪಾವತಿಸದೆ ವಂಚನೆ

ವಿಕ ಸುದ್ದಿಲೋಕ ಬೆಂಗಳೂರು

ಬುಕ್ಸ್‌ ಪೂರೈಕೆ ಮಾಡಿಸಿಕೊಂಡು 30.81 ಲಕ್ಷ ರೂ. ಪಾವತಿ ಮಾಡದ ಆರೋಪದಲ್ಲಿ ಅಲಾಯನ್ಸ್‌ ವಿವಿಯ ರಿಜಿಸ್ಟ್ರಾರ್‌ ವಿರುದ್ಧ ರಾಜಾಜಿ ನಗರ ಪೊಲೀಸ್‌ ಠಾಣೆಯಲ್ಲಿ ವಂಚನೆ ಪ್ರಕರಣ ದಾಖಲಾಗಿದೆ.

ಮೆ. ಎಸಿಎಂ ಟ್ರೇಡಿಂಗ್‌ ಇಂಡಿಯಾ ಪ್ರೈ.ಲಿನ ಕೆ.ಎಂ.ಚೆಂಗಪ್ಪ ಎಂಬುವರು ದೂರು ನೀಡಿದ್ದಾರೆ.

ಬಿಟಿಎಂ ಲೇಔಟ್‌ 1ನೇ ಹಂತದಲ್ಲಿ ಕಚೇರಿ ಹೊಂದಿರುವ ಅಲಾಯನ್ಸ್‌ ವಿವಿ ರಿಜಿಸ್ಟ್ರಾರ್‌ ಅವರಿಗೆ ಮತ್ತು ಆನೇಕಲ್‌ನಲ್ಲಿರುವ ವಿವಿ ಕಚೇರಿಗೆ ಕೆಲವು ವರ್ಷಗಳ ಹಿಂದೆ 30.81 ಲಕ್ಷ ರೂ. ಮೌಲ್ಯದ ಪುಸ್ತಕಗಳನ್ನು ಪೂರೈಕೆ ಮಾಡಲಾಗಿದೆ. ಅದಕ್ಕೆ ಪ್ರತಿಯಾಗಿ ರಿಜಿಸ್ಟ್ರಾರ್‌ ಅವರು ಹಣ ಪಾವತಿಸದೆ ಮೋಸ ಮಾಡಿದ್ದಾರೆಂದು ಆರೋಪಿಸಲಾಗಿದೆ. ವಂಚನೆ ಕುರಿತು 9ನೇ ಎಸಿಎಂಎಂ ನ್ಯಾಯಾಲಯಕ್ಕೆ ಚೆಂಗಪ್ಪ ಅವರು ಖಾಸಗಿ ದೂರು ಸಲ್ಲಿಸಿದ್ದರು. ವಿಚಾರಣೆ ನಡೆಸಿದ ನ್ಯಾಯಾಲಯದ ನಿರ್ದೇಶನದ ಮೇರೆಗೆ ರಾಜಾಜಿ ನಗರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.