ಸ್ನೇಹಿತರ ಜಗಳ ಕೊಲೆಯಲ್ಲಿ ಅಂತ್ಯ

ಬೆಂಗಳೂರು: ಕ್ಷುಲ್ಲಕ ಕಾರಣಕ್ಕೆ ಸ್ನೇಹಿತರ ನಡುವೆ ನಡೆದ ಜಗಳ ಕೊಲೆಯಲ್ಲಿ ಅಂತ್ಯಗೊಂಡಿರುವ ಘಟನೆ ಎಚ್‌ಎಸ್‌ಆರ್‌ ಲೇಔಟ್‌ ಠಾಣಾ ವ್ಯಾಪ್ತಿಯಲ್ಲಿ ನಡೆದಿರುವುದು ತಡವಾಗಿ ಬೆಳಕಿಗೆ ಬಂದಿದೆ.

ಮಾರತ್‌ಹಳ್ಳಿ ನಿವಾಸಿ ಪೃಥ್ವಿ (28) ಕೊಲೆಯಾದ ವ್ಯಕ್ತಿ. ಮೊಬೈಲ್‌ ಅಂಗಡಿಯಲ್ಲಿ ಕೆಲಸಕ್ಕಿದ್ದ ಈತ ಮಾ.21ರಂದು ತನ್ನ ಸಂಬಂಧಿ ಭರತ್‌ ಎಂಬಾತನ ಜತೆ ವೆಂಕಟರಮಣಸ್ವಾಮಿ ಅಗರ ಗ್ರಾಮದಲ್ಲಿ ನಡೆದ ಜಾತ್ರೆಗೆ ಹೋಗಿದ್ದ.ವಾಪಸ್‌ ಬರುವಾಗ ದಾರಿ ಮಧ್ಯೆ ಬಾರ್‌ಗೆ ಹೋಗಿ ಮದ್ಯಪಾನ ಮಾಡಿದ್ದ. ಈ ವೇಳೆ ಆತನ ಸ್ನೇಹಿತರು ಸಿಕ್ಕಿದ್ದು, ಅವರ ಜತೆ ಕ್ಷುಲ್ಲಕ ಕಾರಣವೊಂದಕ್ಕೆ ಜಗಳ ತೆಗೆದಿದ್ದು ಕೋಪಗೊಂಡ ಅವರಲ್ಲೊಬ್ಬ ಚಾಕುವಿನಿಂದ ಇರಿದು ಪರಾರಿಯಾಗಿದ್ದ. ಗಾಯಗೊಂಡ ಪೃಥ್ವಿಯನ್ನು ಸ್ಥಳೀಯರ ನೆರವಿನಿಂದ ಭರತ್‌ ಆಸ್ಪತ್ರೆಗೆ ಸೇರಿಸಿದ್ದ. ಆದರೆ, ತೀವ್ರ ರಕ್ತಸ್ರಾವದಿಂದ ಆತ ಮೃತಪಟ್ಟಿದ್ದ.

ಭರತ್‌ಗೆ ಕೊಲೆ ಮಾಡಿರುವ ಗುಂಪಿನ ಪರಿಚಯ ಇಲ್ಲ. ದೂರು ದಾಖಲಿಸಿಕೊಳ್ಳಲಾಗಿದ್ದು ತನಿಖೆ ನಡೆಯುತ್ತಿದೆ ಎಂದು ಎಚ್‌ಎಸ್‌ಆರ್‌ಲೇಔಟ್‌ ಠಾಣೆ ಪೊಲೀಸರು ಹೇಳಿದ್ದಾರೆ.