ಉಪನ್ಯಾಸಕನಿಗೆ ಬ್ಲ್ಯಾಕ್‌ಮೇಲ್‌: ಸಲಿಂಗಕಾಮಿ ಬಂಧನ, ಬಯಲಾಯ್ತು ವಾಟ್ಸ್‌ಆ್ಯಪ್‌ ಗ್ರೂಪ್‌ ರಹಸ್ಯ!

ಬೆಂಗಳೂರು: ಸಲಿಂಗಕಾಮಿಗಳ ಜೊತೆ ಚಾಟಿಂಗ್‌ ವೇಳೆಯ ಪೋಟೋಗಳನ್ನು ಇಟ್ಟುಕೊಂಡು ಬ್ಲ್ಯಾಕ್‌ಮೇಲ್‌ ಮಾಡಿ ಹಣ ಸುಲಿಗೆ ಮಾಡುತ್ತಿದ್ದ ಸಲಿಂಗಕಾಮಿಯನ್ನು ವೈಟ್‌ಫೀಲ್ಡ್‌ ಸಿಇಎನ್‌ (ಸೈಬರ್‌ ಎಕಾನಾಮಿಕ್‌ ಮತ್ತು ನಾರ್ಕೋಟಿಕ್ಸ್‌) ಪೊಲೀಸರು ಬಂಧಿಸಿದ್ದಾರೆ. ಚಿಕ್ಕಜಾಲ ತರಬನಹಳ್ಳಿಯಲ್ಲಿಸೆಕ್ಯುರಿಟಿ ಕೆಲಸ ಮಾಡುತ್ತಿದ್ದ ವಿಶ್ವನಾಥ್‌ ಅಲಿಯಾಸ್‌ ವಿಶ್ವಾಸ್‌(50) ಬಂಧಿತ ಆರೋಪಿ.

ಈತನ ವಿರುದ್ಧ ಪ್ರತಿಷ್ಠಿತ ಕಾಲೇಜೊಂದರ ಉಪನ್ಯಾಸಕರು ಅ.5ರಂದು ದೂರು ನೀಡಿದ್ದರು. ನನ್ನ ಫೋಟೋಗಳನ್ನು ಅಶ್ಲೀಲ ಫೋಟೋಗಳಿಗೆ ಜೋಡಿಸಿ(ಮಾರ್ಪಿಂಗ್‌) ವಾಟ್ಸ್‌ಆ್ಯಪ್‌ ಮೂಲಕ ಕಳುಹಿಸಿ ಹಣಕ್ಕಾಗಿ ಬ್ಲ್ಯಾಕ್‌ಮೇಲ್‌ ಮಾಡುತ್ತಿದ್ದಾನೆಂದು ದೂರಿನಲ್ಲಿಉಪನ್ಯಾಸಕರು ಆರೋಪಿಸಿದ್ದರು. ತನಿಖೆ ಕೈಗೊಂಡ ಪೊಲೀಸರು, ಪೋನ್‌ ನಂಬರ್‌ ಆಧರಿಸಿ ಆರೋಪಿಯನ್ನು ಚಿಕ್ಕಜಾಲದಲ್ಲಿ ಬಂಧಿಸಿದ್ದಾರೆ.

ನನ್ನ ತಿರುಚಿದ ಫೋಟೋವನ್ನು ಫೇಸ್‌ಬುಕ್‌ನಲ್ಲಿಅಪ್‌ಲೋಡ್‌ ಮಾಡದಿರಲು ಹಣ ನೀಡಬೇಕು ಎಂದು ವ್ಯಕ್ತಿಯೊಬ್ಬ ಫೋನ್‌ ಕರೆ ಮಾಡಿ ಬೆದರಿಕೆ ಹಾಕುತ್ತಿದ್ದಾನೆಂದು ಉಪನ್ಯಾಸಕ ದೂರು ನೀಡಿದ್ದರು. ವಂಚನೆ, ಸುಲಿಗೆ ಮತ್ತು ಐಟಿ ಕಾಯಿದೆ ಅಡಿ ಪ್ರಕರಣ ದಾಖಲಿಸಿಕೊಳ್ಳಲಾಗಿತ್ತು.

ಬೆಂಗಳೂರಲ್ಲಿ ಪ್ರಯಾಣಿಕರ ಸೋಗಿನಲ್ಲಿ ಕಳವು ಮಾಡುತ್ತಿದ್ದ ಆರೋಪಿ ಸೆರೆ

ಆರೋಪಿಯನ್ನು ತರಬನಹಳ್ಳಿಯಲ್ಲಿ ಬಂಧಿಸಿ ಆತನ ಬಳಿಯಿದ್ದ ಎರಡು ಮೊಬೈಲ್‌ ಪರಿಶೀಲನೆ ನಡೆಸಿದಾಗ ಅದರಲ್ಲಿದೂರು ನೀಡಿದ ಉಪನ್ಯಾಸಕರ ಸುಮಾರು 20-25 ಫೋಟೋಗಳಿದ್ದವು. ಪ್ರಾಥಮಿಕ ಹಂತದಲ್ಲಿ ಪರಿಶೀಲನೆ ನಡೆಸಿದಾಗ ಇದು ತಿರುಚಿದ ಫೋಟೋಗಳಲ್ಲ. ಬದಲಿಗೆ ನೈಜ ಫೋಟೋಗಳು ಎಂದು ಗೊತ್ತಾಯಿತು ಎಂದು ವೈಟ್‌ಫೀಲ್ಡ್‌ ಡಿಸಿಪಿ ದೇವರಾಜ್‌ ತಿಳಿಸಿದರು.

ಸಲಿಂಗಿಗಳ ಗ್ರೂಪ್‌ಗಳು!
ಆರೋಪಿ ಕೂಡ ಸಲಿಂಗಿಯಾಗಿದ್ದಾನೆ. ಡ್ಯಾಡಿ 50, ಲೆಕ್ಚರರ್ಸ್‌ ಸೇರಿದಂತೆ ಇನ್ನಿತರ ಹೆಸರುಗಳಲ್ಲಿ ಹಲವು ವಾಟ್ಸ್‌ಆ್ಯಪ್‌ ಗ್ರೂಪ್‌ಗಳಿವೆ. ಗ್ರೂಪ್‌ಗಳಲ್ಲಿಇರುವವರು ಫೋಟೋಗಳನ್ನು ಶೇರ್‌ ಮಾಡಿ ಸದಸ್ಯರ ಜೊತೆ ನೇರವಾಗಿ ಮತ್ತು ಗ್ರೂಪ್‌ಗಳಲ್ಲಿ ಚಾಟಿಂಗ್‌ ಮಾಡಿಕೊಂಡು ಮೋಜು ಮಾಡುತ್ತಿದ್ದರು.

ಆ ಗ್ರೂಪ್‌ಗಳಿಗೆ ಸಲಿಂಗಿಯಾಗಿರುವ ವಿಶ್ವನಾಥ ಕೂಡ ಸೇರಿದ್ದ. ಕೆಲವು ದಿನಗಳ ಹಿಂದೆ ವಿಶ್ವನಾಥ ಹಾಗೂ ದೂರು ನೀಡಿದ ಉಪನ್ಯಾಸಕ ಚಾಟ್‌ ಮಾಡಿ ಫೋಟೋಗಳನ್ನು ವಿನಿಮಯ ಮಾಡಿಕೊಂಡಿದ್ದಾರೆ. ಉಪನ್ಯಾಸಕನ ಫೋಟೋಗಳನ್ನು ಅವರಿಗೇ ಕಳುಹಿಸಿದ ಆರೋಪಿ, ಹಣ ನೀಡದಿದ್ದರೆ ಇನ್ನಿತರ ಜಾಲತಾಣಗಳಲ್ಲಿ ಅಪ್‌ಲೋಡ್‌ ಮಾಡುವುದಾಗಿ ಬೆದರಿಕೆ ಹಾಕಿದ್ದ ಎಂದು ಪೊಲೀಸ್‌ ಅಧಿಕಾರಿ ತಿಳಿಸಿದರು.