ಗೋವಾ ಮೂಲದ ವ್ಯಕ್ತಿ ಅಮೇರಿಕಾದಿಂದ ಗಡಿಪಾರು

ಬೆಂಗಳೂರು : ನಕಲಿ ಉದ್ಯೋಗ ಪ್ರಮಾಣಪತ್ರದೊಂದಿಗೆ ಅಮೆರಿಕಾದಲ್ಲಿ ಬಾಣಸಿಗನಾಗಲು ಹೋಗಿ ಗಡಿಪಾರಾಗಿರುವ ಗೋವಾ ಮೂಲದ ವ್ಯಕ್ತಿಯನ್ನು ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ(ಕೆಐಎ) ವಲಸೆ ಅಧಿಕಾರಿಗಳು ವಶಕ್ಕೆ ಪಡೆದು ಸ್ಥಳೀಯ ಪೊಲೀಸರಿಗೆ ದೂರು ನೀಡಿದ್ದಾರೆ.

ಗೋವಾ ಮೂಲದ ವಲೇಜಿಯೋ ಫೆÜರ್ನಾಂಡಿಸ್‌(30) ಬಂಧಿತ. ಏಜೆಂಟ್‌ ಸ್ಯಾವಿಯೋ ಫೆರ್ನಾಂಡಿಸ್‌ ಎಂಬಾತ ತಲೆಮರೆಸಿಕೊಂಡಿರುವುದಾಗಿ ಕೆಐಎ ಪೊಲೀಸರು ತಿಳಿಸಿದ್ದಾರೆ.

ಎಸ್‌ಎಸ್‌ಎಲ್‌ಸಿ ವ್ಯಾಸಂಗ ಮಾಡಿರುವ ವಲೇಜಿಯೋ, 6 ತಿಂಗಳ ಹೋಟೆಲ್‌ ಮ್ಯಾನೇಜ್‌ಮೆಂಟ್‌ ಕೋರ್ಸ್‌ ಮುಗಿಸಿ ಗೋವಾದ ಹೋಟೆಲ್‌ವೊಂದರಲ್ಲಿ 3 ವರ್ಷ ಬಾಣಸಿಗನಾಗಿ ಕೆಲಸ ಮಾಡಿದ್ದ. ನಂತರ 6 ತಿಂಗಳ ಪ್ರವಾಸಿ ಹಡಗಿನಲ್ಲೂ ಬಾಣಸಿಗನಾಗಿದ್ದ. ಈ ವೇಳೆ ಪರಿಚಯನಾದ ಏಜೆಂಟ್‌ವೊಬ್ಬ, ''ವಿದೇಶದಲ್ಲಿ ಕೆಲಸ ಕೊಡಿಸುತ್ತೇನೆ. ಉದ್ಯೋಗ ಪ್ರಮಾಣಪತ್ರ, ವೀಸಾ ಮಾಡಿಸಲು 1.50 ಲಕ್ಷ ರೂ. ಆಗುತ್ತದೆ'' ಎಂದು ಹೇಳಿ ಮುಂಗಡವಾಗಿ 75 ಸಾವಿರ ರೂ. ಪಡೆದಿದ್ದ. ಕೆಲ ದಿನಗಳ ಬಳಿಕ ಟಿಕೆಟ್‌ ಬುಕ್‌ ಮಾಡಿಸಲು ಹೆಚ್ಚುವರಿ ಹಣ ಪಡೆದು ಉದ್ಯೋಗ ಪ್ರಮಾಣಪತ್ರ ಮತ್ತು ವೀಸಾವನ್ನು ಕೊಡಿಸಿದ್ದ.

ಡಿ.30ರಂದು ಕೆಐಎನಿಂದ ಲಂಡನ್‌ ಮಾರ್ಗವಾಗಿ ನ್ಯೂಯಾರ್ಕ್‌ಗೆ ವಲೇಜಿಯೋ ಹೋಗಿದ್ದರು. ಆದರೆ, ವಲಸೆ ಅಧಿಕಾರಿಗಳು ದಾಖಲೆಗಳ ಪರಿಶೀಲನೆ ನಡೆಸಿದಾಗ ಪಿಜ್ಜಾ ಕಂಪನಿಯೊಂದರಲ್ಲಿ ಕೆಲಸದ ನೆಪದಲ್ಲಿ ನೀಡಲಾಗಿದ್ದ ಉದ್ಯೋಗ ಪ್ರಮಾಣಪತ್ರ ನಕಲಿ ಎಂದು ಗೊತ್ತಾಗಿದೆ. ಹೀಗಾಗಿ, ನ್ಯೂಯಾರ್ಕ್‌ ನಿಲ್ದಾಣದಿಂದಲೇ ವಲೇಜಿಯೋನನ್ನು ವಾಪಸ್‌ ಕೆಐಎಗೆ ಗಡಿಪಾರು ಮಾಡಿದ್ದರು.

ಅಮೇರಿಕಾದ ಅಧಿಕಾರಿಗಳು ನೀಡಿದ ಮಾಹಿತಿ ಆಧರಿಸಿ ಆರೋಪಿಯನ್ನು ವಶಕ್ಕೆ ಪಡೆದ ಕೆಐಎ ವಲಸೆ ಅಧಿಕಾರಿಗಳು, ಕೆಐಎ ಪೊಲೀಸರ ವಶಕ್ಕೆ ಒಪ್ಪಿಸಿ ದೂರು ನೀಡಿದ್ದಾರೆ.