ಚಾಕಲೇಟ್‌ ಮೇಲೆ ಚಿನ್ನದ ಹಾಳೆ ಸುತ್ತಿ ಕಳ್ಳಸಾಗಣೆ

ಬೆಂಗಳೂರು: ಚಾಕಲೇಟ್‌ ಮೇಲೆ ಚಿನ್ನದ ಹಾಳೆ (ಫಾಯ್ಲ್‌) ಸುತ್ತಿ ಕಳ್ಳ ಸಾಗಾಟ ಮಾಡುತ್ತಿದ್ದ ಪ್ರಯಾಣಿಕನನ್ನು ಕೆಐಎನಲ್ಲಿ ಸೀಮಾ ಸುಂಕ ಅಧಿಕಾರಿಗಳು ಬಂಧಿಸಿದ್ದಾರೆ.

ಕೇರಳದ ಕಾಸರಗೋಡು ಮೂಲದ ರೌಫ್‌ ಕಟ್ಟಕ್ಕಲ್‌ ಬಂಧಿತ ಆರೋಪಿ. ಈತನಿಂದ 11.83 ಲಕ್ಷ ರೂ. ಮೌಲ್ಯದ 384 ಗ್ರಾಂ ತೂಕದ ಚಿನ್ನದ ಹಾಳೆಗಳನ್ನು ವಶಕ್ಕೆ ಪಡೆಯಲಾಗಿದೆ.

ಗಲ್ಫ್‌ ಏರ್‌ ವಿಮಾನದಲ್ಲಿ ಬಹ್ರೇನ್‌ನಿಂದ ಗುರುವಾರ ಕೆಐಎಗೆ ಬಂದಿಳಿದ ರೌಫ್‌ ಕಟ್ಟಕ್ಕಲ್‌ ತಂದಿದ್ದ ಚೆಕ್‌ ಇನ್‌ ಲಗೇಜ್‌ ಅನ್ನು ಸ್ಕ್ಯಾ‌ನಿಂಗ್‌ ಯಂತ್ರದಲ್ಲಿ ತಪಾಸಣೆ ನಡೆಸಿದಾಗ, ಅನುಮಾನಾಸ್ಪದ ಚಿತ್ರಗಳು ಮೂಡಿವೆ. ಈ ಹಿನ್ನೆಲೆಯಲ್ಲಿ ಬ್ಯಾಗ್‌ ಪರಿಶೀಲಿಸಿದಾಗ ನೂರಾರು ಚಾಕ್‌ಲೇಟ್‌ಗಳಿದ್ದವು. ಅವುಗಳ ಮೇಲಿನ ರಾರ‍ಯಪರ್‌ ತೆಗೆದಾಗ ಚಿನ್ನದ ಬಣ್ಣದ ಹಾಳೆಯಿಂದ ಚಾಕಲೇಟ್‌ ಸುತ್ತಿರುವುದು ಕಂಡು ಬಂದಿದೆ. ಅನುಮಾನಗೊಂಡು ಪರಿಶೀಲಿಸಿದಾಗ ಅದು ಚಿನ್ನದ್ದು ಎಂದು ಗೊತ್ತಾಗಿದೆ. ಆರೋಪಿಯನ್ನು ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿದ ಅಧಿಕಾರಿಗಳು ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದಾರೆ.