13.5 ಲಕ್ಷ ರೂ. ಮೌಲ್ಯದ ಕಾಸ್ಮೆಟಿಕ್‌ ಡ್ರಗ್ ಅಕ್ರಮ ಸಾಗಣೆ ಪತ್ತೆ

ಬೆಂಗಳೂರು: ಚರ್ಮವನ್ನು ಬಿಳಿಯಾಗಿಸುವ ಪೌಡರ್ ಅನ್ನು ವಿದೇಶದಿಂದ ಅಕ್ರಮವಾಗಿ ಸಾಗಿಸುತ್ತಿದ್ದ ವ್ಯಕ್ತಿಯನ್ನು ಕಂದಾಯ ಗುಪ್ತಚರ ಇಲಾಖೆಯ ಅಧಿಕಾರಿಗಳು ಬಂಧಿಸಿ, 13.5 ಲಕ್ಷ ರೂ. ಮೌಲ್ಯದ ಕಾಸ್ಮೆಟಿಕ್ ಡ್ರಗ್ಸ್ ಅನ್ನು ವಶಪಡಿಸಿಕೊಂಡಿದ್ದಾರೆ. ಥಾಯ್ಲೆಂಡ್ ಮತ್ತು ಮಲೇಷಿಯಾದಿಂದ ಬೆಂಗಳೂರಿಗೆ ತರಲಾಗುವ ಕಾಸ್ಮೆಟಿಕ್ ಡ್ರಗ್ಸ್ ಅನ್ನು ನಂತರ ದಕ್ಷಿಣದ ರಾಜ್ಯಗಳಿಗೆ ವಿತರಿಸಲಾಗುತ್ತದೆ.

ಕಾಸ್ಮೆಟಿಕ್ ಕ್ಲಿನಿಕ್ ಮತ್ತು ಬ್ಯೂಟಿ ಪಾರ್ಲರ್‌ಗಳಲ್ಲಿ ಚರ್ಮವನ್ನು ಬಿಳಿಯಾಗಿಸುವ ಚಿಕಿತ್ಸೆಗೆ ಭಾರಿ ಬೇಡಿಕೆಯಿದ್ದು, ವಿದೇಶದಿಂದ ಅಕ್ರಮವಾಗಿ ಕಾಸ್ಮೆಟಿಕ್ ಡ್ರಗ್‌ ಕಳ್ಳಸಾಗಣೆಗೆ ದಾರಿಮಾಡಿಕೊಟ್ಟಿದೆ.

ಮೇ 8ರಂದು ಜಯನಗರದ ಮನೆಯೊಂದರಲ್ಲಿ ಶೇಖರಿಸಿಡಲಾಗಿದ್ದ ಕಾಸ್ಮೆಟಿಕ್ ಡ್ರಗ್ ಅನ್ನು ವಶಪಡಿಸಿಕೊಂಡು ಓರ್ವ ವ್ಯಕ್ತಿಯನ್ನು ಅಧಿಕಾರಿಗಳು ಬಂಧಿಸಿದ್ದರು. ವಿಚಾರಣೆಗೊಳಪಡಿಸಿದಾಗ ಅದು ಜಪಾನ್‌ನಿಂದ ತರಿಸಲಾಗಿದ್ದ ಟೇಶಿಯೊ ಆಕ್ಟಿವ್ ಡಿಎಕ್ಸ್ ಪೌಡರ್ ಎಂದು ಪತ್ತೆಯಾಗಿದೆ.

ಜತೆಗೆ ಆಹಾರ ಸಾಮಾಗ್ರಿ ಎಂದು ಲೇಬಲ್ ಮಾಡಿ ಅದನ್ನು ಕಳ್ಳಸಾಗಣೆ ಮಾಡಲಾಗಿತ್ತು. ಅದನ್ನು ಡ್ರಿಪ್ ಮೂಲಕ ದೇಹದೊಳಕ್ಕೆ ಇಂಜೆಕ್ಟ್ ಮಾಡಲಾಗುತ್ತಿತ್ತು. ಪ್ರಕರಣಕ್ಕೆ ಸಂಬಂಧಿಸಿ ಭಟ್ಕಳ ಮೂಲದ ಮತ್ತೋರ್ವ ವ್ಯಕ್ತಿಯನ್ನು ಬಂಧಿಸಲಾಗಿದೆ.

ವಿಶೇಷ ಆಹಾರ ಸಾಮಾಗ್ರಿ ಎಂದು ಲೇಬಲ್ ಮಾಡಲಾಗಿದ್ದರೆ, ಅವುಗಳನ್ನು ತೆರೆದು ಪರೀಕ್ಷಿಸುವುದು ಕಡಿಮೆ. ಜತೆಗೆ ಕಾಸ್ಮೆಟಿಕ್ ಡ್ರಗ್ ಆದರೆ ಅವುಗಳಿಗೆ ಡ್ರಗ್ಸ್ ನಿಯಂತ್ರಣ ಇಲಾಖೆಯಿಂದ ವಿಶೇಷ ಅನುಮತಿ ಪಡೆಯಬೇಕಾಗುತ್ತದೆ. ಈವರೆಗೆ ಶಂಕಿತರು ಇದೇ ಮಾದರಿಯಲ್ಲಿ 1.35 ಕೋಟಿ ರೂ.ಗೂ ಅಧಿಕ ಮೊತ್ತದ 1,000ಕ್ಕೂ ಅಧಿಕ ಬಾಕ್ಸ್ ಕಾಸ್ಮೆಟಿಕ್ ಡ್ರಗ್ ಅನ್ನು ಕಳ್ಳಸಾಗಣೆ ಮಾಡಿದ್ದಾರೆ ಎನ್ನಲಾಗಿದೆ.

ಚರ್ಮ ಬಿಳಿಯಾಗಿಸುವ ಚಿಕಿತ್ಸೆ ಅತ್ಯಂತ ಅಪಾಯಕಾರಿಯಾಗಿದ್ದು, ವೈದ್ಯರು ಅದನ್ನು ಬೆಂಬಲಿಸುವುದಿಲ್ಲ. ಆದರೂ ಕೆಲವೆಡೆ ಅಕ್ರಮವಾಗಿ ಕಾಸ್ಮೆಟಿಕ್ ಡ್ರಗ್ ಬಳಸಲಾಗುತ್ತದೆ.