ವೈದ್ಯರ ಬಳಿ ಹಣಕ್ಕೆ ಡಿಮ್ಯಾಂಡ್‌ ಆರೋಪ : ಪತ್ರಕರ್ತನ ಬಂಧನ

ಬೆಂಗಳೂರು : ಹೆಸರಾಂತ ವೈದ್ಯರೊಬ್ಬರಿಗೆ ಬ್ಲ್ಯಾಕ್‌ಮೇಲ್‌ ಮಾಡಿ ಹಣಕ್ಕೆ ಡಿಮ್ಯಾಂಡ್‌ ಮಾಡಿದ ಆರೋಪದ ಮೇಲೆ ಸುದ್ದಿವಾಹಿನಿಯ ಪತ್ರಕರ್ತ ಹೇಮಂತ್‌ ಎಂಬುವವರನ್ನು ಸದಾಶಿವನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

''ನಿಮ್ಮ ಸೆಕ್ಸ್‌ ಟೇಪ್‌ ಇದೆ ಎಂದು ವೈದ್ಯರಿಗೆ ಹೇಳಿದ ವಾಹಿನಿಯ ವರದಿಗಾರರೊಬ್ಬರು, ಪ್ರಸಾರ ಮಾಡದಿರಲು 5 ಲಕ್ಷ ರೂ. ಪಡೆದುಕೊಂಡಿದ್ದರು. ಅದಾದ ನಂತರ ಹೇಮಂತ್‌ ಕೂಡ ವೈದ್ಯರನ್ನು ಸಂಪರ್ಕಿಸಿ ಹೆಚ್ಚಿನ ಹಣಕ್ಕೆ ಡಿಮ್ಯಾಂಡ್‌ ಮಾಡಿದ್ದರು. ಈ ಸಂಬಂಧ ವೈದ್ಯರು ನೀಡಿದ ದೂರು ಆಧರಿಸಿ ಮಂಗಳವಾರ ಸಂಜೆ ಬಂಧಿಸಲಾಗಿದೆ'' ಎಂದು ಪೊಲೀಸ್‌ ಅಧಿಕಾರಿ ತಿಳಿಸಿದರು. ''ಈಗಾಗಲೇ ಹಣ ಪಡೆದಿದ್ದಾರೆ ಎನ್ನಲಾದ ಮತ್ತೊಬ್ಬ ವರದಿಗಾರನ ವಿಚಾರಣೆ ನಡೆಸಬೇಕಿದೆ. ತನಿಖೆಯ ಬಳಿಕ ಹೆಚ್ಚಿನ ಮಾಹಿತಿ ಲಭ್ಯವಾಗಲಿದೆ,'' ಎಂದು ಪೊಲೀಸ್‌ ಅಧಿಕಾರಿ ತಿಳಿಸಿದರು.