ವೈದ್ಯಕೀಯ ವಸ್ತುಗಳ ಕಳವು: ಉದ್ಯೋಗಿ ಬಂಧನ

ಬೆಂಗಳೂರು: ದೇಶದ ಅತಿದೊಡ್ಡ ಆನ್‌ಲೈನ್‌ ಫಾರ್ಮಸಿ ಕಂಪನಿಯೊಂದರಲ್ಲಿ 11.91 ಲಕ್ಷ ರೂ. ಮೌಲ್ಯದ ವೈದ್ಯಕೀಯ ವಸ್ತುಗಳು ಕಳವಾಗಿದ್ದು, ಈ ಸಂಬಂಧ ಕಂಪನಿಯ ಓರ್ವ ನೌಕರನನ್ನು ಬಸವೇಶ್ವರನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಇತ್ತೀಚೆಗೆ ವೈದ್ಯಕೀಯ ವಸ್ತುಗಳ ಆಡಿಟಿಂಗ್‌ ನಡೆಸುವ ವೇಳೆ ಕಳ್ಳತನ ಬೆಳಕಿಗೆ ಬಂದಿದ್ದು, ಈ ಸಂಬಂಧ ಆಡಳಿತ ಮಂಡಳಿಯು ಬಸವೇಶ್ವರ ನಗರ ಪೊಲೀಸ್‌ ಠಾಣೆಗೆ ದೂರು ನೀಡಿತ್ತು. ಈ ದೂರು ಆಧರಿಸಿ ರಾಜಾಜಿನಗರ ನಿವಾಸಿ ರಘೋತ್ತಮರಾಜು ಎಂಬಾತನನ್ನು ಬಂಧಿಸಲಾಗಿದೆ. ತಲೆಮರೆಸಿಕೊಂಡಿರುವ ಸುಂಕದಕಟ್ಟೆ ನಿವಾಸಿ ಶ್ರೀಧರ್‌ ಎಂಬಾತನ ಬಂಧನಕ್ಕೆ ಬಲೆ ಬೀಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಆರೋಪಿಗಳು ಹಲವು ದಿನಗಳಿಂದ ಕಳ್ಳತನ ಮಾಡಿಕೊಂಡು ಕಂಪನಿಗೆ ಮೋಸ ಮಾಡುತ್ತಿದ್ದರು ಎಂದು ಗೊತ್ತಾಗಿದೆ. ಕದ್ದ ವಸ್ತುಗಳನ್ನು ಇತರ ಮೆಡಿಕಲ್‌ ಶಾಪ್‌ಗಳಿಗೆ ಕಡಿಮೆ ಬೆಲೆಗೆ ಮಾರಾಟ ಮಾಡುತ್ತಿದ್ದರು. ಕಳ್ಳತನವಾಗಿದ್ದ ವಸ್ತುಗಳ ಪೈಕಿ ಅರ್ಧದಷ್ಟನ್ನು ಜಪ್ತಿ ಮಾಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.