ಅಮೆರಿಕನ್‌ ಎಕ್ಸ್‌ಪ್ರೆಸ್‌ ಬ್ಯಾಂಕ್‌ ಸಿಸ್ಟಮ್‌ ಹ್ಯಾಕ್‌ ಮಾಡಿ 3.61 ಕೋಟಿ ರೂ. ದೋಚಿದರು

ಬೆಂಗಳೂರು: ಪ್ರತಿಷ್ಠಿತ ಹಣಕಾಸು ಸಂಸ್ಥೆ ಅಮೆರಿಕನ್‌ ಎಕ್ಸ್‌ಪ್ರೆಸ್‌ನ 'ಬಿನ್‌' ಹ್ಯಾಕ್‌ ಮಾಡಿರುವ ಹ್ಯಾಕರ್‌ಗಳು, 3.61 ಕೋಟಿ ರೂ. ದೋಚಿದ್ದಾರೆ.

ಈ ಸಂಬಂಧ ಬ್ಯಾಂಕ್‌ನ ಕಾನೂನು ಅಧಿಕಾರಿ ಮಂಜುನಾಥ ಅಂಬಾಲೆ ಎಂಬುವರು ಸಿಐಡಿ ಸೈಬರ್‌ ಕ್ರೈಂ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದಾರೆ. 2019ರ ಸೆ.2ರಿಂದ ಸೆ.4ರ ನಡುವೆ ಅಪರಿಚಿತರು ಅಮೇರಿಕನ್‌ ಎಕ್ಸ್‌ಪ್ರೆಸ್‌ನ ಬಿನ್‌ ಹ್ಯಾಕ್‌ ಮಾಡಿ, ಒಟ್ಟು 7,552 ಅಕ್ರಮ ಟ್ರಾನ್ಸ್‌ಆ್ಯಕ್ಷನ್‌ ನಡೆಸಿದ್ದಾರೆ. ಅದಕ್ಕೆ ಕಂಪನಿಯ ಮರ್ಚೆಂಟ್‌ಗಳ ವೆಬ್‌ಸೈಟ್‌ಗಳನ್ನು ಬಳಕೆ ಮಾಡಿ ಮೋಸ ಮಾಡಿದ್ದಾರೆ ಎಂದು ದೂರಿನಲ್ಲಿಆರೋಪಿಸಲಾಗಿದೆ.

ಮಾಹಿತಿ ತಂತ್ರಜ್ಞಾನ ಕಾಯ್ದೆ, ವಂಚನೆ ಕೇಸ್‌ ದಾಖಲಿಸಿಕೊಂಡು ಹ್ಯಾಕರ್‌ ಮೂಲದ ಕುರಿತು ತಾಂತ್ರಿಕ ಮಾಹಿತಿ ಕಲೆ ಹಾಕಲಾಗುತ್ತಿದೆ ಎಂದು ಸಿಐಡಿ ಪೊಲೀಸರು ತಿಳಿಸಿದರು.

ಅಮೇರಿಕನ್‌ ಎಕ್ಸ್‌ಪ್ರೆಸ್‌ ಕಂಪನಿಯು ಹಲವು ಇ ಕಾಮರ್ಸ್‌ ಕಂಪನಿಗಳಿಗೆ ಸೇವೆ ಒದಗಿಸುತ್ತಿದೆ. ಸೇವೆ ಪಡೆಯುತ್ತಿರುವ ಇ ಕಾಮರ್ಸ್‌ ವೆಬ್‌ಸೈಟ್‌ಗಳ ಮೂಲಕ ಅಮೇರಿಕನ್‌ ಎಕ್ಸ್‌ಪ್ರೆಸ್‌ನ ನೆಟ್‌ವರ್ಕ್ ಪ್ರವೇಶಿಸಿದ ಹ್ಯಾಕರ್ಸ್‌, ಹ್ಯಾಕ್‌ ಮಾಡಿ ಹಣವನ್ನು ಬೇರೆ ಬೇರೆ ಅಕ್ರಮ ಖಾತೆಗಳಿಗೆ ವರ್ಗಾವಣೆ ಮಾಡಿಕೊಂಡಿದ್ದಾರೆಂದು ತಿಳಿದು ಬಂದಿದೆ.