ಮಕ್ಕಳ ಕಳ್ಳನೆಂದು ತಪ್ಪು ತಿಳಿದು ಹಲ್ಲೆ

ಬೆಂಗಳೂರು: ಗಾಂಜಾ ವ್ಯಸನಿಯೊಬ್ಬನನ್ನು ಮಕ್ಕಳ ಕಳ್ಳ ಎಂದು ತಪ್ಪಾಗಿ ಗ್ರಹಿಸಿ ತೀವ್ರವಾಗಿ ಹಲ್ಲೆ ನಡೆಸಿದ ಘಟನೆ ಎಚ್‌ಎಎಲ್‌ ಪೊಲೀಸ್‌ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

ಅಸ್ಸಾಂ ಮೂಲದ ಚಂದ್ರ ಪ್ರಸಾದ್‌ (45) ಹಲ್ಲೆಗೊಳಗಾದವರು. ಕೆಲಸ ಹುಡುಕಿಕೊಂಡು ಕುಟುಂಬ ಸಮೇತ ಬೆಂಗಳೂರಿಗೆ ಬಂದಿರುವ ಚಂದ್ರಪ್ರಸಾದ್‌ ಕೈಕೊಂಡನಹಳ್ಳಿಯ ಬಾಡಿಗೆ ಮನೆಯಲ್ಲಿ ನೆಲೆಸಿದ್ದರು. ಮೊದಲಿಗೆ ತಳ್ಳುಗಾಡಿಯಲ್ಲಿ ಮನೆ ಬಳಕೆಯ ವಸ್ತುಗಳನ್ನು ಮಾರಾಟ ಮಾಡುತ್ತಿದ್ದ ಚಂದ್ರ ಪ್ರಸಾದ್‌, ಬಳಿಕ ಅಪಾರ್ಟ್‌ಮೆಂಟ್‌ವೊಂದರಲ್ಲಿ ಭದ್ರತಾ ಸಿಬ್ಬಂದಿಯಾಗಿ ಕೆಲಸಕ್ಕೆ ಸೇರಿಕೊಂಡಿದ್ದ. ಈ ಮಧ್ಯೆ ಹಣದಾಸೆ ಬಿದ್ದ ಚಂದ್ರಪ್ರಸಾದ್‌ ಗಾಂಜಾ ಮಾರಾಟಕ್ಕೆ ಇಳಿದಿದ್ದ. ನೆರೆ ರಾಜ್ಯಗಳಿಂದ ಗಾಂಜಾ ಖರೀದಿಸಿ ನಗರದಲ್ಲಿ ಮಾರಾಟ ಮಾಡುತ್ತಿದ್ದದ್ದಲ್ಲದೆ, ತಾನೂ ಗಾಂಜಾ ವ್ಯಸನಿಯಾಗಿದ್ದ.

ಶನಿವಾರ ಸಂಜೆ ಚಂದ್ರಪ್ರಸಾದ್‌, ಎಚ್‌ಎಎಲ್‌ನ ದೊಡ್ಡನೆಕ್ಕುಂದಿ ಸರಕಾರಿ ಶಾಲೆಯ ಬಳಿ ಗಾಂಜಾ ಸೇದಿ ಓಡಾಡುತ್ತಿದ್ದ. ಮತ್ತಿನಲ್ಲಿದ್ದ ಆತನನ್ನು ನೋಡಿದ ಸಾರ್ವಜನಿಕರು ಮಕ್ಕಳ ಕಳ್ಳನೆಂದು ಭಾವಿಸಿ ಹಿಡಿದು ವಿದ್ಯುತ್‌ ಕಂಬಕ್ಕೆ ಕಟ್ಟಿ ಹಾಕಿ ಹಿಗ್ಗಾಮುಗ್ಗ ಥಳಿಸಿ ಪೊಲೀಸರಿಗೆ ಒಪ್ಪಿಸಿದ್ದಾರೆ.

ವಿಚಾರಣೆ ನಂತರ ಆರೋಪಿ ಮಕ್ಕಳ ಕಳ್ಳ ಅಲ್ಲ ಎನ್ನುವುದು ಖಚಿತವಾಗಿದೆ. ಸಾರ್ವಜನಿಕರು ಅನುಮಾನಾಸ್ಪದ ವ್ಯಕ್ತಿಗಳು ಕಂಡರೆ ಅವರನ್ನು ಹಿಡಿದು ಪೊಲೀಸರಿಗೆ ಮಾಹಿತಿ ನೀಡಬೇಕು. ಹಲ್ಲೆ ನಡೆಸಲು ಮುಂದಾಗಬಾರದು. ಜೀವಕ್ಕೆ ತೊಂದರೆ ಆದರೆ ಥಳಿಸಿದವರೇ ಕೊಲೆ ಪ್ರಕರಣದಲ್ಲಿ ಜೈಲು ಸೇರಬೇಕಾಗುತ್ತದೆ ಎಂದು ಅಧಿಕಾರಿಗಳು ಎಚ್ಚರಿಸಿದ್ದಾರೆ.