ಕ್ಯಾಷ್‌ ಬಾಕ್ಸ್‌ಗೆ ಕೈ ಹಾಕಿ 20 ಸಾವಿರ ರೂ...

ಬೆಂಗಳೂರು: ಮತ್ತಿಕೆರೆ 3ನೇ ಮುಖ್ಯರಸ್ತೆಯಲ್ಲಿರುವ ಮೆಡ್‌ಪ್ಲೆಸ್‌ ಮೆಡಿಕಲ್‌ ಸ್ಟೋರ್‌ಗೆ ಐ ಡ್ರಾಪ್‌ ಖರೀದಿಸುವ ಸೋಗಿನಲ್ಲಿ ಬಂದ ಇಬ್ಬರು ಖದೀಮರು, ನೌಕರರ ಗಮನ ಬೇರೆಡೆ ಸೆಳೆದು ಕ್ಯಾಷ್‌ ಬಾಕ್ಸ್‌ನಲ್ಲಿದ್ದ 20 ಸಾವಿರ ರೂ. ದೋಚಿದ್ದಾರೆ.

ಜ.27ರಂದು ಬೆಳಗ್ಗೆ 10 ಗಂಟೆಗೆ ಸಿಬ್ಬಂದಿ ಮಂಜೇಗೌಡ ಮತ್ತು ಭಾಗ್ಯಶ್ರೀ ಸ್ಟೋರ್‌ನಲ್ಲಿದ್ದರು. ಈ ವೇಳೆ ಬಂದ ಅಪರಿಚಿತರಿಬ್ಬರು, ಐ ಡ್ರಾಪ್‌ ಮತ್ತು ಟ್ಯೂಬ್‌ ಕೊಡುವಂತೆ ಕೇಳಿದ್ದಾರೆ. ಅದೇ ವೇಳೆ ಮಂಜೇಗೌಡ ಕುಡಿಯುವ ನೀರು ತರಲು ಹತ್ತಿರದ ನೀರು ಶುದ್ಧೀಕರಣ ಘಟಕದ ಬಳಿ ಹೋಗಿದ್ದರು. ಭಾಗ್ಯಶ್ರೀ ಅವರು ಐ ಡ್ರಾಪ್‌ ಹುಡುಕಿಕೊಂಡು ಗ್ರಾಹಕರಿಗೆ ಕೊಟ್ಟಾಗ ನಮಗೆ ಬೇಡ ಎಂದು ಹೇಳಿ ಅಲ್ಲಿಂದ ಹೊರಟು ಹೋಗಿದ್ದಾರೆ.

ವಾಪಸ್‌ ಬಂದ ಮಂಜೇಗೌಡ ಅನುಮಾನಗೊಂಡು ಕ್ಯಾಷ್‌ ಬಾಕ್ಸ್‌ ನೋಡಿದಾಗ 20 ಸಾವಿರ ರೂ. ಕಾಣೆಯಾಗಿತ್ತು. ಸಿಸಿ ಕ್ಯಾಮೆರಾ ವಿಡಿಯೋ ಪರಿಶೀಲನೆ ನಡೆಸಿದಾಗ ಭಾಗ್ಯಶ್ರೀ, ಐಡ್ರಾಪ್‌ ತರಲು ರಾರ‍ಯಕ್‌ ಬಳಿ ಹೋಗಿದ್ದ ವೇಳೆ ಕ್ಷಣಾರ್ಧದಲ್ಲಿ ಕ್ಯಾಷ್‌ ಬಾಕ್ಸ್‌ನಲ್ಲಿದ್ದ ಹಣವನ್ನು ಅಪರಿಚಿತರಿಬ್ಬರು ಎತ್ತಿಕೊಂಡಿರುವುದು ಕಂಡು ಬಂದಿದೆ.

ಮಂಜೇಗೌಡ ನೀಡಿದ ದೂರು ಆಧರಿಸಿ ಪ್ರಕರಣ ದಾಖಲಿಸಿಕೊಂಡಿರುವ ಯಶವಂತಪುರ ಪೊಲೀಸರು, ತನಿಖೆ ಕೈಗೊಂಡಿದ್ದಾರೆ.