ಇಲ್ಲಿನ ದೇಶಬಂಧು ನಗರದ ನಿವಾಸಿ ಇಳಾ ಚಂದ್ರಶೇಖರ್‌ ಎನ್ನುವವರ ಮನೆಗೆ ಶನಿವಾರ ರಾತ್ರಿ 12.30 ರ ಸುಮಾರಿಗೆ ನುಗ್ಗಿದ ದರೋಡೆಕೋರರು ಈ ಕೃತ್ಯ ಎಸಗಿದ್ದು, ಮನೆಯಲ್ಲಿದ್ದ ಬೀರುವಿನ ಬೀಗ ಮುರಿದು ಚಿನ್ನದ ಸರ, ಉಂಗುರ, ಓಲೆ ಮತ್ತು ದೇವರಮನೆಯ ಸಾಮಾನುಗಳು ಸೇರಿದಂತೆ 50 ಸಾವಿರ ರೂ. ನಗದು ದೋಚಿಕೊಂಡು ಪರಾರಿ ಆಗಿದ್ದಾರೆ. ದರೋಡೆ ಆಗಿರುವ ವಸ್ತುಗಳ ಒಟ್ಟು ಮೌಲ್ಯ 10 ಲಕ್ಷ ರೂ. ಆಗಿರಬಹುದು ಎಂದು ಪೊಲೀಸರು ತಿಳಿಸಿದ್ದಾರೆ.
ರಾತ್ರಿ ಮನೆಯ ಹಿಂಬಾಗಿಲು ಮುರಿದು ಒಳಗೆ ನುಗ್ಗಿದ ಕಳ್ಳರು, ಮೊದಲು ಇಳಾ ಚಂದ್ರಶೇಖರ್‌ ಅವರ ಕುತ್ತಿಗೆಗೆ ಚಾಕು ಇಟ್ಟು ಬೆದರಿಸಿ ನಂತರ ಅವರ ಮತ್ತು ಮಗನ ಕೈ ಕಾಲು ಕಟ್ಟಿ ಹಾಕಿದರು. ಇಬ್ಬರು ಇವರ ಬಳಿಯೇ ಚಾಕು ಹಿಡಿದುಕೊಂಡು ನಿಂತಿದ್ದರೆ, ಮತ್ತಿಬ್ಬರು ಮನೆಯನ್ನೆಲ್ಲಾ ಚೆಲ್ಲಾಪಿಲ್ಲಿ ಮಾಡಿ ಚಿನ್ನಾಭರಣಗಳಿಗೆ ಹುಡುಕಾಡಿದರು. ಇಳಾ ಅವರ ಮೈಮೇಲಿದ್ದ ಒಡವೆಗಳನ್ನೂ ದೋಚಿದರು. ದರೋಡೆಗೆ ಬಂದಿದ್ದ ಗ್ಯಾಂಗ್‌ನಲ್ಲಿ ಇದ್ದವರೆಲ್ಲಾ 25 ರಿಂದ 30 ವರ್ಷದೊಳಗಿನವರಿರಬಹುದು ಎಂದು ಇಳಾ ಪೊಲೀಸರಿಗೆ ದೂರು ನೀಡಿದ್ದಾರೆ.
ವಿಷಯ ತಿಳಿದ ತಕ್ಷಣ ಡಿಸಿಪಿ ಕಲಾ ಕೃಷ್ಣಮೂರ್ತಿ ನೇತೃತ್ವದಲ್ಲಿ ಪೊಲೀಸರು ಸ್ಥಳಕ್ಕೆ ಧಾವಿಸಿ ಪರಿಶೀಲನೆ ನಡೆಸಿದರು. ವಿದ್ಯಾರಣ್ಯಪುರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದ್ದು , ದರೋಡೆಕೋರರಿಗಾಗಿ ತೀವ್ರ ಶೋಧ ಮುಂದುವರಿದಿದೆ.