65 ವರ್ಷದ ಮಹಿಳೆ ಮೇಲೆ ಅತ್ಯಾಚಾರ: ಇಬ್ಬರ ಬಂಧನ

ಬೆಂಗಳೂರು: ಹೆಚ್ಚಿನ ಸಂಬಳ ಬರುವ ಕೆಲಸ ಕೊಡಿಸುವುದಾಗಿ ನಂಬಿಸಿ 65 ವರ್ಷದ ಮಹಿಳೆಯೊಬ್ಬರನ್ನು ಕೊಠಡಿಯಲ್ಲಿ ಕೂಡಿ ಹಾಕಿ ಅತ್ಯಾಚಾರ ಎಸಗಿದ ಆರೋಪದ ಮೇಲೆ ತಲಘಟ್ಟಪುರ ಠಾಣೆ ಪೊಲೀಸರು ಇಬ್ಬರನ್ನು ಬಂಧಿಸಿದ್ದಾರೆ.

ಯಲಹಂಕ ನಿವಾಸಿ ಪ್ರೇಮ್‌ ಹಾಗೂ ಬಿಮಲ್‌ ಬಂಧಿತ ಆರೋಪಿಗಳು. ಸಂತ್ರಸ್ತ ಮಹಿಳೆ ಕೂಲಿ ಕೆಲಸ ಮಾಡಿಕೊಂಡಿದ್ದರು. ಇವರಿಗೆ ಹೆಚ್ಚಿನ ಸಂಬಳದ ಕೆಲಸ ಕೊಡಿಸುವುದಾಗಿ ಪುಸಲಾಯಿಸಿದ್ದ ಪ್ರೇಮ್‌, ರಘುವನಹಳ್ಳಿಗೆ ಕರೆಸಿಕೊಂಡಿದ್ದ. ಅಪಾರ್ಟ್‌ಮೆಂಟ್‌ ಒಂದರಲ್ಲಿ ಕೆಲಸವಿದೆಯೆಂದು ಹೇಳಿ ಅಲ್ಲಿಗೆ ಕರೆದುಕೊಂಡು ಹೋಗಿ ಅಪಾರ್ಟ್‌ಮೆಂಟ್‌ನ ಕಾವಲು ಸಿಬ್ಬಂದಿಯ ಕೊಠಡಿಯಲ್ಲಿ ಕೂಡಿಹಾಕಿ ಅತ್ಯಾಚಾರ ಎಸಗಿದ್ದ. ಕೆಲ ಹೊತ್ತಿನ ನಂತರ ಪ್ರೇಮ್‌ ಸ್ಥಳದಿಂದ ತೆರಳಿದರೆ, ಈತನ ಸ್ನೇಹಿತ ಬಿಮಲ್‌ ಕೂಡ ಬಂದು ಅತ್ಯಾಚಾರ ಎಸಗಿದ್ದ. ಅಲ್ಲದೆ, ಎರಡು ದಿನಗಳವರೆಗೂ ಮಹಿಳೆಯನ್ನು ಅಲ್ಲೇ ಕೂಡಿ ಹಾಕಿ ನಂತರ ಕೆಲಸ ಕೊಡಿಸದೆ ಕಳುಹಿಸಿದ್ದರು. ಅಲ್ಲಿಂದ ವಾಪಸ್ಸಾದ ಮಹಿಳೆ ಸೀದಾ ಠಾಣೆಗೆ ತೆರಳಿ ದೂರು ನೀಡಿದ್ದರು.

ದೂರು ದಾಖಲಿಸಿಕೊಂಡಿದ್ದ ಪೊಲೀಸರು, ಅಪಾರ್ಟ್‌ಮೆಂಟ್‌ನ ಕಾವಲು ಸಿಬ್ಬಂದಿ ರಾಮ್‌ಬಹದ್ದೂರ್‌ನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ತನ್ನ ರೂಂನ ಕೀ ಪಡೆದುಕೊಂಡಿದ್ದ ಪ್ರೇಮ್‌ನ ವಿಳಾಸ ನೀಡಿದ್ದ. ಆ ವಿಳಾಸಕ್ಕೆ ತೆರಳಿ ಮೊದಲು ಪ್ರೇಮ್‌ನನ್ನು ಬಂಧಿಸಿ ಈತನ ಮಾಹಿತಿ ಮೇರೆಗೆ ಬಿಮಲ್‌ನನ್ನೂ ಬಂಧಿಸಿ ಕಾನೂನು ಕ್ರಮಕ್ಕೆ ಒಳಪಡಿಸಿದ್ದಾರೆ.