ಉಡುಪಿ: ಒಟಿಪಿ ಶೇರ್ ಮಾಡಿ 1.79 ಲಕ್ಷ ಖೋತಾ!

ಉಡುಪಿ: ಕಾರ್ಕಳ ವಿಜಯ ಬ್ಯಾಂಕಿನಲ್ಲಿ ಕೆ. ಧರ್ಮರಾಜ ಕಂಬಳಿ ಅವರು ಹೊಂದಿದ್ದ ಎಸ್‌ಬಿ ಖಾತೆಯಿಂದ 1,79,493ರೂ. ಹಣವನ್ನು ಅಪರಿಚಿತರು ಆನ್‌ಲೈನ್‌ ಮೂಲಕ ಲಪಟಾಯಿಸಿದ್ದಾರೆ. ವಿಜಯ ಬ್ಯಾಂಕಿನಿಂದ ದೂರವಾಣಿ ಕರೆ ಮಾಡುತ್ತಿರುವುದಾಗಿ ತಿಳಿಸಿದ್ದ ಅಪರಿಚಿತರು ನಿಮ್ಮ ಎಟಿಎಂ ಕಾರ್ಡ್‌ ಬ್ಲಾಕ್‌ ಆಗಿದ್ದು ಕ್ರಿಯಾಶೀಲಗೊಳಿಸಲು ಮೊಬೈಲಿಗೆ ಬಂದ ಒಟಿಪಿ ಕೊಡಬೇಕು ಎಂದು ಕೇಳಿ ಪಡೆದು ಮೋಸ ವೆಸಗಿದ್ದಾರೆ. ಘಟನೆ ಸಂಬಂಧ ಉಡುಪಿ ಸೆನ್‌ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಲಾರಿ ಚಾಲಕ, ಕ್ಲೀನರ್‌ ವಿರುದ್ಧ ಪ್ರಕರಣ:
ಸರಕು ಸಾಗಾಟ ಲಾರಿಯಲ್ಲಿ ಸಾಮಾಜಿಕ ಅಂತರ ಕಾಯ್ದುಕೊಳ್ಳದೆ ಜನರನ್ನು ಕರೆದೊಯ್ಯುತ್ತಿದ್ದ ಲಾರಿ ಚಾಲಕ ಮತ್ತು ಕ್ಲೀನರ್‌ ಹಾವೇರಿಯ ಶ್ರೀಕಾಂತ ಗಾಣಿಗೇರ, ಬೆಳಗಾವಿಯ ಅಭಿಮನ್ಯು ಎಸ್‌. ಲಮಾಣಿ ವಿರುದ್ಧ ಉಡುಪಿ ನಗರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಸಂತೆಕಟ್ಟೆಯಲ್ಲಿ ಕೋವಿಡ್‌ 19 ಹರಡುವುದನ್ನು ತಡೆಗಟ್ಟಲು ಮುಂಜಾಗರೂಕತಾ ಕ್ರಮವಾಗಿ ನಿರ್ಮಿಸಿದ ಚೆಕ್‌ಪೋಸ್ಟ್‌ ಬಳಿ ಸಿಬ್ಬಂದಿಯೊಂದಿಗೆ ಸಹಾಯಕ ಪೊಲೀಸ್‌ ಉಪ ನಿರೀಕ್ಷಕಿ ಪುಷ್ಪಾ ವಾಹನ ತಪಾಸಣೆ ನಡೆಸುತ್ತಿದ್ದ ವೇಳೆ ಪ್ರಕರಣ ಬೆಳಕಿಗೆ ಬಂದಿದೆ.