ಪೋಕರ್‌ ಆಡಿ ಪಾಪರ್‌ ಆದ!

ಬೆಂಗಳೂರು: ದಿಢೀರ್‌ ಹಣ ಸಂಪಾದನೆಯ ಆಸೆಗೆ ಬಿದ್ದ ಸೀರೆ ವ್ಯಾಪಾರಿಯೊಬ್ಬರು, ಪತ್ನಿಯ ಆಭರಣವನ್ನು ಅಡಇಟ್ಟು ಆನ್‌ಲೈನ್‌ನಲ್ಲಿ 'ಪೋಕರ್‌' ಆಡಿ 20 ಲಕ್ಷ ರೂ. ಕಳೆದುಕೊಂಡಿದ್ದಾರೆ.

ವಂಚನೆ ಅರಿತ ಉದ್ಯಮಿ ದೂರು ನೀಡಿದ ಬಳಿಕ ಪೊಲೀಸರು ಜೂಜು ಅಡ್ಡೆ ಮೇಲೆ ದಾಳಿ ಮಾಡಿ, ವಿವಿ ಪುರ ನಿವಾಸಿ ಆಕಾಶ್‌ (28), ಮೆಹುಲ್‌ (30) ಮನೋಜ್‌ (32) ಎಂಬುವರನ್ನು ಬಂಧಿಸಿ, 4 ಲಕ್ಷ ರೂ. ಜಪ್ತಿ ಮಾಡಿದ್ದಾರೆ.

ಕಬ್ಬನ್‌ಪೇಟೆ ನಿವಾಸಿ ನೀಲೇಶ್‌ ಕುಮಾರ್‌ ಜೈನ್‌ (27) ಹಣ ಕಳೆದುಕೊಂಡವರು. ಸೀರೆ ಮಾರಾಟ ಮಳಿಗೆ ಹೊಂದಿರುವ ಅವರನ್ನು ಭೇಟಿ ಮಾಡಿದ ಆರೋಪಿ ಆಕಾಶ್‌ ''ತಾನು ಆನ್‌ಲೈನ್‌ ಪೋಕರ್‌ ಕ್ಲಬ್‌ ತೆರೆದಿದ್ದು, ಆಟದಲ್ಲಿ ಭಾರಿ ಹಣ ಸಂಪಾದಿಸಬಹುದು'' ಎಂದು ಹೇಳಿದ್ದ. ಅದನ್ನು ನಂಬಿದ್ದ ನೀಲೇಶ್‌, ಮೊಬೈಲ್‌ನಲ್ಲಿ ಪೋಕರ್‌ 2 ಹೆಸರಿನ ಆ್ಯಪ್‌ ಡೌನ್‌ಲೋಡ್‌ ಮಾಡಿಕೊಂಡು 'ಹ್ಯಾಪ್ಲಿ ರೊಲಿನ್‌' ಕ್ಲಬ್‌ಗೆ ಹೆಸರು ನೋಂದಾಯಿಸಿಕೊಂಡು ಆಟ ಶುರು ಮಾಡಿದ್ದರು.

ವಂಚನೆ ಆರಂಭ: ಸುಲ್ತಾನಪೇಟೆಯ ರಾಜ್ಗುರು ಟವರ್ಸ್‌ನಲ್ಲಿ ಅಡ್ಡೆ ತೆರೆದಿದ್ದ ಆಕಾಶ್‌, ಆಟದಲ್ಲಿ ಸೋತಿರುವುದಾಗಿ ಹೇಳಿ ನೀಲೇಶ್‌ನಿಂದ ನಾಲ್ಕು ತಿಂಗಳಲ್ಲಿ 8 ಲಕ್ಷ ರೂ. ಪಡೆದುಕೊಂಡಿದ್ದ. ಮುಂದೆ ಹಣ ಕಟ್ಟಲು ಆಗದ ನೀಲೇಶ್‌, ಪತ್ನಿಯ ಆಭರಣಗಳನ್ನು ಅಡ ಇಟ್ಟು, ಮತ್ತೆರಡು ತಿಂಗಳಲ್ಲಿ 10 ಲಕ್ಷ ರೂ. ಕಳೆದುಕೊಂಡಿದ್ದಾರೆ. ಈ ವೇಳೆ ಆಕಾಶ್‌, ಕಳೆದುಕೊಂಡ ಹಣ ವಾಪಸ್‌ ಪಡೆಯಲು ಆಟ ಮುಂದುವರಿಸು ಎಂದು ಒತ್ತಾಯಿಸಿದ್ದ. ಹೀಗಾಗಿ ಮತ್ತೆರಡು ಲಕ್ಷ ಆಟಕ್ಕೆ ಹಾಕಿದ್ದರೂ, ಹಣ ಕಟ್ಟಲು ಸಾಧ್ಯವಾಗಿರಲಿಲ್ಲ. ಆದರೆ, ಆರೋಪಿಗಳು ಹಣ ಕೊಡದಿದ್ದರೆ, 1 ಲಕ್ಷ ರೂ. ಬಡ್ಡಿ ಕಟ್ಟುವಂತೆ ಒತ್ತಾಯಿಸಿದ್ದರು. ಈ ನಡುವೆ ಆಕಾಶ್‌ನ ಅಡ್ಡೆಯಲ್ಲಿ ಕೆಲಸ ಮಾಡುತ್ತಿದ್ದ ಸರವಣ ಎಂಬಾತ ಆ.7ರಂದು ನೀಲೇಶ್‌ಗೆ ಕರೆ ಮಾಡಿ, ಹಣ ಕೊಡದಿದ್ದರೆ ಕೊಲೆ ಮಾಡುವುದಾಗಿ ಬೆದರಿಸಿದ್ದ. ಆತಂಕಗೊಂಡ ನೀಲೇಶ್‌, ಕಾಟನ್‌ಪೇಟೆ ಠಾಣೆಗೆ ದೂರು ನೀಡಿದ್ದರು.