ಸ್ಯಾಮ್‌ಸಂಗ್‌ ಮೊಬೈಲ್‌ ಬುಕ್‌ ಮಾಡಿದಾಗ ಬಟ್ಟೆ ಸೋಪು ಬಂತು

ಬೆಂಗಳೂರು: ಆನ್‌ಲೈನ್‌ನಲ್ಲಿ ದುಬಾರಿ ಬೆಲೆಯ ಸ್ಯಾಮ್‌ಸಂಗ್‌ ನೋಟ್‌-9 ಮೊಬೈಲ್‌ ಬುಕ್‌ ಮಾಡಿದ್ದ ಗ್ರಾಹಕರೊಬ್ಬರ ಕೈಗೆ ತಲುಪಿದ್ದು 5 ರೂ ಬೆಲೆಯ ಸರ್ಫ್‌ ಎಕ್ಸೆಲ್‌ ಸೋಪು.

ಕೈಗೆ ಬಂದ ಕೊರಿಯರ್‌ ಬಾಕ್ಸ್‌ ತೆರೆಯುತ್ತಿದ್ದಂತೆಯೇ ಮೊಬೈಲ್‌ ಜಾಗದಲ್ಲಿ ಬಟ್ಟೆ ಸೋಪನ್ನು ನೋಡಿ ಹೌಹಾರಿದ ಗ್ರಾಹಕ ಉತ್ತರಹಳ್ಳಿ ನಿವಾಸಿ ವೆಂಕಟೇಶ್‌, ಸೀದಾ ಸುಬ್ರಮಣ್ಯಪುರ ಠಾಣೆಗೆ ಧಾವಿಸಿ ದೂರು ದಾಖಲಿಸಿದ್ದಾರೆ. ಪೇಟಿಎಂ ಮೂಲಕ ಹಣ ಕೂಡ ಸಂದಾಯ ಮಾಡಲಾಗಿದ್ದು ತಮಗೆ ದೊಡ್ಡ ಮಟ್ಟದ ವಂಚನೆ ಆಗಿದೆ ಎಂದು ಪೊಲೀಸರ ಎದುರು ವೆಂಕಟೇಶ್‌ ಗೋಳು ತೋಡಿಕೊಂಡಿದ್ದಾರೆ.

ನಡೆದದ್ದೇನು ? : ಖಾಸಗಿ ಕಂಪನಿ ಉದ್ಯೋಗಿ ಆಗಿರುವ ಪಾವಗಡ ಮೂಲದ ವೆಂಕಟೇಶ್‌, 85 ಸಾವಿರ ರೂ ಮೌಲ್ಯದ ಸ್ಯಾಮ್‌ಸಂಗ್‌ ಮೊಬೈಲ್‌ಗೆ ಆನ್‌ಲೈನ್‌ ಮೂಲಕವೇ ಆರ್ಡರ್‌ ಮಾಡಿದ್ದರು. ಪೇಟಿಎಂ ಮೂಲಕ ಹಣ ಕೂಡ ಸಂದಾಯ ಮಾಡಿದ್ದರು. ಸಂಪೂರ್ಣ ಹಣ ಪಡೆದುಕೊಂಡ ಕಂಪನಿ ಕೊನೆಗೆ ಗ್ರಾಹಕರ ಕೈಗೆ ಕೊಟ್ಟಿದ್ದು ಬಟ್ಟೆ ಸೋಪು. ಜ.11 ರಂದು ವೆಂಕಟೇಶ್‌ ಮನೆಗೆ ಡೆಲಿವರಿ ಬಾಯ್‌ ಬಂದು ಬಾಕ್ಸ್‌ ಕೊಟ್ಟಿದ್ದ. ಡೆಲಿವರಿ ಬಾಯ್‌ ಸ್ಥಳದಿಂದ ತೆರಳಿದ ಬಳಿಕ ಮನೆಯೊಳಗೆ ಬಂದು ಬಾಕ್ಸ್‌ ತೆರೆದು ನೋಡಿದಾಗ ಅದರಲ್ಲಿ ಮೊಬೈಲ್‌ ಬದಲಿಗೆ ಸೋಪಿತ್ತು. ಈ ಬಗ್ಗೆ ಪೇಟಿಎಂ ಕಂಪನಿಯನ್ನು ಸಂಪರ್ಕಿಸಿದಾಗ ಮೂರು ದಿನದಲ್ಲಿ ನಿಮ್ಮ ಹಣ ವಾಪಸ್ಸಾಗುವುದಾಗಿ ತಿಳಿಸಿತ್ತು. ಆದರೆ ಒಂಬತ್ತು ದಿನವಾದರೂ ಹಣ ವಾಪಸ್ಸಾಗದಿದ್ದಾಗ ಸುಬ್ರಮಣ್ಯಪುರ ಠಾಣೆಯಲ್ಲಿ ಕೇಸು ದೂರು ದಾಖಲಿಸಿದ್ದಾರೆ.

ನಮ್ಮದೇನೂ ತಪ್ಪಿಲ್ಲ: ವೆಂಕಟೇಶ್‌ ಅವರು ಪೇಟಿಎಂ ಕಂಪನಿಗೆ ನೀಡಿದ ದೂರನ್ನು ಪರಿಶೀಲಿಸಿದ ಕಂಪನಿ ಸಿಬ್ಬಂದಿ, ''ಇದರಲ್ಲಿ ನಮ್ಮದೇನೂ ತಪ್ಪಿಲ್ಲ. ನಿಮ್ಮ ಹಣಕ್ಕೆ ತಕ್ಕ, ನಿಮ್ಮ ಬೇಡಿಕೆಯ ಮೊಬೈಲನ್ನೇ ಕಳುಹಿಸಿದ್ದೇವೆ. ನಮ್ಮಿಂದ ತಪ್ಪಾಗಿಲ್ಲವಾದ್ದರಿಂದ ನಾವು ಹಣ ಹಿಂದಿರುಗಿಸುವುದಿಲ್ಲ'' ಎಂದು ಇ-ಮೇಲ್‌ ಮೂಲಕ ಉತ್ತಿರಿಸಿದ್ದಾರೆ. ಹೀಗಾಗಿ ವೆಂಕಟೇಶ್‌ ದೂರು ದಾಖಲಿಸಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿರುವ ಸುಬ್ರಮಣ್ಯಪುರ ಠಾಣೆ ಪೊಲೀಸರು ಪಾರ್ಸೆಲ್‌ ತಂದುಕೊಟ್ಟ ಕೊರಿಯರ್‌ ಕಂಪನಿ ಸಿಬ್ಬಂದಿಯನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಲು ಮುಂದಾಗಿದ್ದಾರೆ.