ವೀಲಿಂಗ್‌ನಲ್ಲಿ ಬಂದು ಪೇದೆಗೆ ಡಿಕ್ಕಿ

ಬೆಂಗಳೂರು: ವೀಲಿಂಗ್‌ ಮಾಡುವವರನ್ನು ತಪಾಸಣೆ ನಡೆಸುತ್ತಿದ್ದ ಪೊಲೀಸ್‌ ಸಿಬ್ಬಂದಿಗೆ, ದುಷ್ಕರ್ಮಿಯೊಬ್ಬ ವೀಲಿಂಗ್‌ ಮಾಡುತ್ತಾ ಬಂದು ಡಿಕ್ಕಿಯೊಡೆದ ಘಟನೆ ನಡೆದಿದೆ.

ಗಾಯಗೊಂಡಿರುವ ಸಿಬ್ಬಂದಿ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಅಪಘಾತದ ಬಳಿಕ ಆರೋಪಿ ಬೈಕನ್ನು ಸ್ಥಳದಲ್ಲೇ ಬಿಟ್ಟು ಪರಾರಿಯಾಗಿದ್ದಾನೆ. ಬೈಕನ್ನು ವಶಕ್ಕೆ ಪಡೆದಿರುವ ಪೊಲೀಸರು ಆರೋಪಿ ಬಂಧನಕ್ಕೆ ಬಲೆ ಬೀಸಿದ್ದಾರೆ.

ಯಲಹಂಕ ಠಾಣೆಯ ಪೊಲೀಸ್‌ ಪೇದೆ ಮಾರ್ತಾಂಡಪ್ಪ ಗಾಯಗೊಂಡವರು. ಅವರು ಇತರೆ ಸಿಬ್ಬಂದಿ ಜತೆಗೆ ಭಾನುವಾರ ನಸುಕಿನ 3 ಗಂಟೆ ಸುಮಾರಿಗೆ ವ್ಹೀಲಿಂಗ್‌ ಬೈಕ್‌ಗಳ ತಪಾಸಣೆ ನಡೆಸುತ್ತಿದ್ದರು. ವ್ಹೀಲಿಂಗ್‌ನಲ್ಲಿ ಬರುತ್ತಿದ್ದ ಕಿಡಿಗೇಡಿಯೊಬ್ಬನನ್ನು ನಿಲ್ಲಿಸಲು ಮುಂದಕ್ಕೆ ಬಂದು ಕೈ ಅಡ್ಡ ಹಿಡಿದಿದ್ದರು. ಈ ವೇಳೆ ವ್ಹೀಲಿಂಗ್‌ನಲ್ಲಿ ಇದ್ದ ಆತ ಬೈಕನ್ನು ನಿಲ್ಲಿಸದೆ ಸೀದಾ ಬಂದು ಡಿಕ್ಕಿಯೊಡೆದಿದ್ದ. ಈ ವೇಳೆ ಮಾರ್ತಾಂಡೇಯ ಅವರ ರಸ್ತೆ ಬದಿಗೆ ಬಿದ್ದಿದ್ದು, ಅವರ ಕೈ ಮೂಳೆ ಮುರಿದಿದೆ. ಉಳಿದ ಸಿಬ್ಬಂದಿ ಆರೋಪಿಯನ್ನು ಬೆನ್ನತ್ತುತ್ತಿದ್ದಂತೆ ಕತ್ತಲೆಯಲ್ಲಿ ಬೈಕನ್ನು ಬಿಟ್ಟು ಪರಾರಿಯಾಗಿದ್ದಾನೆ.

ಬೈಕನ್ನು ವಶಪಡಿಸಿಕೊಂಡಿರುವ ಯಲಹಂಕ ಠಾಣೆ ಪೊಲೀಸರು ತಲೆಮರೆಸಿಕೊಂಡಿರುವ ಆರೋಪಿಯ ಪತ್ತೆಗೆ ಬಲೆ ಬೀಸಿದ್ದಾರೆ. ಸದ್ಯದಲ್ಲೇ ಆರೋಪಿಯನ್ನು ಬಂಧಿಸಿ ಕಾನೂನು ಕ್ರಮಕ್ಕೆ ಒಳಪಡಿಸಲಾಗುವುದು ಎಂದು ಪೊಲೀಸ್‌ ಅಧಿಕಾರಿಗಳು ತಿಳಿಸಿದ್ದಾರೆ.