ಟಿ.ಜಾನ್ ಕಾಲೇಜಿನಲ್ಲಿ ರ‍್ಯಾಗಿಂಗ್: ಫ್ರೆಷರ್ಸ್‌ ಡೇ ಹೆಸರಲ್ಲಿ ವಿಕೃತಿ ಮೆರೆದ ಹಿರಿಯ ವಿದ್ಯಾರ್ಥಿಗಳು

ಬನ್ನೇರುಘಟ್ಟ: ಫ್ರೆಷರ್ಸ್‌ ಡೇ ಹೆಸರಿನಲ್ಲಿ ಹಿರಿಯ ವಿದ್ಯಾರ್ಥಿಗಳು ಜೂನಿಯರ್‌ ವಿದ್ಯಾರ್ಥಿಗಳಿಗೆ ವಿಚಿತ್ರವಾಗಿ ಅಲಂಕರಿಸಿಕೊಳ್ಳಲು ಒತ್ತಾಯಿಸಿ ಮೆಣಸಿನಕಾಯಿ ತಿನ್ನಿಸಿ, ಹಾಗಲಕಾಯಿ ಜ್ಯೂಸ್‌ ಕುಡಿಸಿ ವಿಕೃತಿ ಮೆರೆದ ಘಟನೆ ಗೊಟ್ಟಿಗೆರೆಯ ಟಿ.ಜಾನ್‌ ವಿದ್ಯಾಸಂಸ್ಥೆಯಲ್ಲಿ ಶನಿವಾರ ನಡೆದಿದೆ.

ಮೊದಲನೇ ವರ್ಷದ ಬಿ. ಫಾರ್ಮಾ ವಿದ್ಯಾರ್ಥಿಗಳನ್ನು ಬರಮಾಡಿಕೊಳ್ಳುವ ಕಾರ್ಯಕ್ರಮವನ್ನು ಕಾಲೇಜಿನ ಆವರಣದಲ್ಲಿ ಶನಿವಾರ ಹಮ್ಮಿಕೊಳ್ಳಲಾಗಿತ್ತು. ಹೊಸಬರನ್ನು ಸ್ವಾಗತಿಸುವ ಕಾರ್ಯಕ್ರಮದ ಹೊಣೆಯನ್ನು ಹಿರಿಯ ವಿದ್ಯಾರ್ಥಿಗಳಿಗೆ ವಹಿಸಲಾಗಿತ್ತು. ಆದರೆ, ಅವರು ಈ ಅವಕಾಶವನ್ನು ಅಕ್ಷರಶಃ ರಾರ‍ಯಗಿಂಗ್‌ ಮಾಡಲು ಬಳಸಿಕೊಂಡರು.

ಸುಮಾರು 100 ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಗೆ ಮಕ್ಕಳ ಮಾದರಿಯಲ್ಲಿ ದೃಷ್ಟಿಬೊಟ್ಟು ಇಟ್ಟುಕೊಳ್ಳುವಂತೆ, ಶರ್ಟಿಗೆ ಕರ್ಚೀಫು ಸಿಕ್ಕಿಸಿಕೊಳ್ಳುವಂತೆ ಸೂಚಿಸಲಾಯಿತು. ಇದಾದ ಬಳಿಕ ಎಲ್ಲರೂ ಸಾಲಾಗಿ ಬಂದು ಮೆಣಸಿನಕಾಯಿ ತಿನ್ನುವ ಹಾಗೂ ಹಾಗಲಕಾಯಿ ಜ್ಯೂಸ್‌ ಕುಡಿಯುವಂತೆ ತಾಕೀತು ಮಾಡಲಾಯಿತು. ಇದನ್ನು ವಿರೋಧಿಸಿದಲ್ಲಿ ಸಮಸ್ಯೆ ಆಗುತ್ತದೆ ಎಂದು ಹೆಚ್ಚಿನ ವಿದ್ಯಾರ್ಥಿಗಳು ಹಿರಿಯರು ಹೇಳಿದಂತೆ ನಡೆದುಕೊಂಡಿದ್ದಾರೆ. ಮೊಬೈಲ್‌ನಲ್ಲಿ ಚಿತ್ರೀಕರಿಸಲು ಮುಂದಾದ ಕಿರಿಯ ವಿದ್ಯಾರ್ಥಿಗಳಿಗೆ ಚಿತ್ರೀಕರಿಸದಂತೆ ಬೆದರಿಕೆ ಹಾಕಲಾಯಿತು. ಮಾಧ್ಯಮಗಳಿಗೆ ಹೇಳಿಕೆ ನೀಡಿದರೆ ಪರಿಣಾಮ ನೆಟ್ಟಗಿರುವುದಿಲ್ಲ ಎಂದೂ ಬೆದರಿಸಲಾಗಿದೆ ಎಂದು ಕಿರಿಯ ವಿದ್ಯಾರ್ಥಿಗಳು ಮಾಧ್ಯಮ ಪ್ರತಿನಿಧಿಗಳ ಬಳಿ ಹೇಳಿಕೊಂಡಿದ್ದಾರೆ.