ರಕ್ಷಣೆ ಕೋರಿ ಪೊಲೀಸರಿಗೆ ದೂರು ನೀಡಿದ ಸಿಎಂ ಸೊಸೆ

ಬೆಂಗಳೂರು: ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಸೊಸೆ ಸ್ಮಿತಾ ರಾಕೇಶ್‌ ಅವರ ಮಲ್ಲೇಶ್ವರದಲ್ಲಿರುವ ಮನೆಯ ಆವರಣಕ್ಕೆ ದುಷ್ಕರ್ಮಿಗಳು ನುಗ್ಗಿ ದಾಂಧಲೆ ನಡೆಸಿದ್ದು, ರಕ್ಷಣೆ ಕೋರಿ ಅವರು ಮಲ್ಲೇಶ್ವರ ಠಾಣೆಗೆ ದೂರು ನೀಡಿದ್ದಾರೆ.

ಸ್ಮಿತಾ ಅವರ ಮನೆಗೆ ಜೂನ್‌ 15ರ ರಾತ್ರಿ 2 ಗಂಟೆ ಸುಮಾರಿಗೆ ಕೆಲ ದುಷ್ಕರ್ಮಿಗಳು ನುಗ್ಗಿ, ಲೈಟ್‌ ಸೇರಿದಂತೆ ಕೆಲ ವಸ್ತುಗಳನ್ನು ಧ್ವಂಸಗೊಳಿಸಿದ್ದಾರೆ. ಆಗ ಸಾಕು ನಾಯಿ ಬೊಗಳಿದೆ. ಇದೇ ಸಂದರ್ಭದಲ್ಲಿ ಮನೆಯ ಆವರಣದಲ್ಲಿರುವ ಹಲಸಿನ ಮರದಲ್ಲಿನ ನಾಲ್ಕೈದು ಹಣ್ಣುಗಳು ನೆಲಕ್ಕೆ ಬಿದ್ದಿವೆ. ಅಲ್ಲದೇ, ಲೈಟ್‌ಗಳು ಕೂಡಾ ಧ್ವಂಸಗೊಂಡಿವೆ. ಮನೆಯಲ್ಲಿ ತಾಯಿ, ಮಕ್ಕಳ ಜತೆ ನೆಲೆಸಿರುವ ನನಗೆ ಈ ಘಟನೆಯಿಂದ ಭಯವಾಗಿದೆ. ಇದು ಕಳ್ಳರ ಕೃತ್ಯವಾಗಿರಬಹುದು ಎಂಬ ಅನುಮಾನವಿದೆ. ಹೀಗಾಗಿ, ಸೂಕ್ತ ರಕ್ಷಣೆ ಒದಗಿಸಿ ಎಂದು ದೂರಿನಲ್ಲಿ ಸ್ಮಿತಾ ಕೋರಿದ್ದಾರೆ.

ಈ ಹಿಂದೆ ಎರಡು ಬಾರಿ ಸದ್ದು ಕೇಳಿಸಿದಾಗ ಪೊಲೀಸರಿಗೆ ಕರೆ ಮಾಡಿದ್ದ ಸ್ಮಿತಾ ದೂರು ನೀಡಿದ್ದರು. ಮೂರನೇ ಬಾರಿ ಘಟನೆ ನಡೆದಿರುವುದರಿಂದ ರಕ್ಷಣೆ ಕೋರಿ ದೂರು ನೀಡಿದ್ದಾರೆ.

ಜೂನ್‌ 15ರಂದು ಘಟನೆ ನಡೆದ ದಿನ ರಾತ್ರಿ ಸುದ್ದಿ ತಿಳಿದು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಲಾಗಿದೆ. ಈಗಾಗಲೇ ಈ ಪ್ರದೇಶದಲ್ಲಿ ಗಸ್ತು ಹೆಚ್ಚಿಸಲಾಗಿದ್ದು , ಆರೋಪಿಗಳಿಗಾಗಿ ಶೋಧ ಮುಂದುವರಿದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.