ಪೇಟಿಎಂ ಕೆವೈಸಿ ಮಾಡಿಕೊಡುವುದಾಗಿ ಹೇಳಿ ಯೋಧನಿಗೆ 52,538 ರೂ. ವಂಚನೆ

ಬೆಂಗಳೂರು: ಮೊಬೈಲ್‌ ವ್ಯಾಲೆಟ್‌ ಪೇಟಿಎಂನ ಕೆವೈಸಿ (ನೋ ಯುವರ್‌ ಕಸ್ಟಮರ್‌) ಅಪ್ಡೇಟ್‌ ಮಾಡಿಕೊಡುವುದಾಗಿ ಸೇನಾ ಸಿಬ್ಬಂದಿಯೊಬ್ಬರಿಗೆ ಆನ್ಲೈನ್‌ ಖದೀಮರು 52,538 ರೂ. ವಂಚಿಸಿದ್ದಾರೆ. ಜಾನ್ಸನ್‌ ಮಾರ್ಕೇಟ್‌ ಬಳಿಯ ರಾಷ್ಟ್ರೀಯ ಮಿಲಿಟರಿ ಸ್ಕೂಲ್‌ನ ಸೇನಾ ಸಿಬ್ಬಂದಿ ಓಂಪಾಲ್‌ ಸಿಂಗ್‌ ಶೇಖಾವತ್‌ ವಂಚನೆಗೊಳಗಾದವರು.

ಏ. 25ರಂದು ಓಂಪಾಲ್‌ ಅವರ ಮೊಬೈಲ್‌ ಗೆ ಪೇಟಿಎಂ ಬ್ಯಾಂಕ್‌ ನ ಕೆವೈಸಿ ಮಾಹಿತಿಯನ್ನು ಅಪ್ಡೇಟ್‌ ಮಾಡುವಂತೆ ಮೆಸೇಜ್‌ ಬಂದಿತ್ತು. ಮೆಸೇಜ್‌ನಲ್ಲಿ ತಿಳಿಸಲಾದ ನಂಬರ್‌ಗೆ ಓಂಪಾಲ್‌ ಅವರು ಕರೆ ಮಾಡಿದಾಗ ಮಾತನಾಡಿದ ಅಪರಿಚಿತ ವ್ಯಕ್ತಿ, ಕೆವೈಸಿ ಅಪ್ಡೇಟ್‌ ಮಾಡಲು ಟೀಮ್‌ ವೀವರ್‌ಕ್ವಿಕ್‌ ಸಪೋರ್ಟ್‌ ಆ್ಯಪ್‌ ಡೌನ್‌ಲೋಡ್‌ ಮಾಡಿಕೊಳ್ಳಲು ತಿಳಿಸಿದ್ದಾನೆ. ಅದರಂತೆ ಓಂಪಾಲ್‌ ಅವರು ಆ್ಯಪ್‌ ಡೌನ್‌ಲೋಡ್‌ ಮಾಡಿಕೊಂಡು ಕೋಡ್‌ ಹಂಚಿಕೊಂಡಿದ್ದಾರೆ.

ಅದಾದ ಬಳಿಕ ಓಂಪಾಲ್‌ ಅವರ ಮೊಬೈಲ್‌ ಫೋನ್‌ನ ಸಂಪೂರ್ಣ ಆ್ಯಕ್ಸಸ್‌ ಪಡೆದುಕೊಂಡ ಖದೀಮರು, ಪೇಟಿಎಂಗೆ ಲಿಂಕ್‌ ಆಗಿದ್ದ ಎಸ್‌ಬಿಐ ಕ್ರೆಡಿಟ್‌ ಕಾರ್ಡ್‌ನಿಂದ ಅಕ್ರಮವಾಗಿ 52,538 ರೂ. ವರ್ಗಾವಣೆ ಮಾಡಿಕೊಂಡಿದ್ದಾರೆ.

ಕ್ವಿಕ್‌ ಸಪೋರ್ಟ್‌ ಆ್ಯಪ್‌ ಯಾವ ರೀತಿ ಕೆಲಸ ಮಾಡುತ್ತದೆ ಮತ್ತು ಅದರಿಂದ ತಮ್ಮ ಮೊಬೈಲ್‌ನ ಸಂಪೂರ್ಣ ನಿಯಂತ್ರಣ ಅವರ ಕೈಗೆ ಸಿಗುತ್ತದೆ ಎಂಬುದನ್ನು ತಿಳಿಯದೆ ಆ್ಯಪ್‌ ಡೌನ್‌ಲೋಡ್‌ ಮಾಡಿ ಆ್ಯಕ್ಸಸ್‌ ನೀಡುವ ಕೋಡ್‌ ಕೂಡ ಹಂಚಿಕೊಂಡ ಕಾರಣ ವಂಚನೆ ನಡೆದಿದೆ. ಈ ಸಂಬಂಧ ಸೈಬರ್‌ಕ್ರೈಂ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.