ಭಾರತೀಯ ಪಾಸ್‌ಪೋರ್ಟ್‌ ಹೊಂದಿದ್ದ ಶ್ರೀಲಂಕಾ ಪ್ರಜೆ ಸೆರೆ

ಬೆಂಗಳೂರು : ಭಾರತೀಯ ಪಾಸ್‌ಪೋರ್ಟ್‌ ಹೊಂದಿದ್ದ ಶ್ರೀಲಂಕಾ ಪ್ರಜೆಯನ್ನು ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ (ಕೆಐಎ) ವಶಕ್ಕೆ ಪಡೆದಿರುವ ವಲಸೆ ಅಧಿಕಾರಿಗಳು, ನಗರ ಪೊಲೀಸರ ವಶಕ್ಕೆ ಒಪ್ಪಿಸಿದ್ದಾರೆ.

ಇರಿಸಾಹ ಟ್ರಿಂಟಿ ಪೆರೆರಾ (35) ಸಿಕ್ಕಿ ಬಿದ್ದಿರುವ ಶ್ರೀಲಂಕಾ ಪ್ರಜೆ. ಈತನ ಕುರಿತು ದಿಲ್ಲಿಯಲ್ಲಿರುವ ಶ್ರೀಲಂಕಾದ ಗುಪ್ತಚರ ಘಟಕದ ಸಹಾಯಕ ನಿರ್ದೇಶಕರು, ಲುಕ್‌ ಔಟ್‌ ನೋಟಿಸ್‌ ಹೊರಡಿಸಿದ್ದರು.

ಏ.28ರಂದು ಪೆರೆರಾ ಉಕ್ರೇನ್‌ನಿಂದ ದೋಹಾ ಮಾರ್ಗವಾಗಿ ಕೆಐಎಗೆ ಬಂದಿದ್ದ. ಆದರೆ, ಆತನ ಬಳಿ ಜೋಯಲ್‌ ನಿರುಷನ್‌ ಸ್ಯಾಮ್ಯುಯಲ್‌ ಹೆಸರಿನಲ್ಲಿ ಭಾರತೀಯ ಪಾಸ್‌ಪೋರ್ಟ್‌ ಇತ್ತು. ಈ ಕುರಿತು ಮಾಹಿತಿ ಹೊಂದಿದ್ದ ವಲಸೆ ಅಧಿಕಾರಿಗಳು, ಕೂಲಂಕಷವಾಗಿ ಪರಿಶೀಲಿಸಿದಾಗ ಆತನ ಹೆಸರು ಪೆರೆರಾ ಎಂದು ಗೊತ್ತಾಗಿದೆ. ಅಲ್ಲದೇ, ಆತನ ಬಳಿ ಶ್ರೀಲಂಕಾದ ಗುರುತಿನ ಚೀಟಿ ಹಾಗೂ ಪಾಸ್‌ಪೋರ್ಟ್‌ ಕೂಡ ಸಿಕ್ಕಿದೆ.

ಆರೋಪಿಯ ವಿರುದ್ಧ ಶ್ರೀಲಂಕಾದ ಗುಪ್ತಚರ ಅಧಿಕಾರಿಗಳು ಲುಕ್‌ಔಟ್‌ ನೋಟಿಸ್‌ ಹೊರಡಿಸುವುದಕ್ಕೆ ಕಾರಣ ಗೊತ್ತಾಗಿಲ್ಲ. ಈ ಬಗ್ಗೆ ಶ್ರೀಲಂಕಾ ರಾಯಭಾರ ಕಚೇರಿಯನ್ನು ಸಂಪರ್ಕಿಸಿ ಹೆಚ್ಚಿನ ಮಾಹಿತಿ ಕಲೆ ಹಾಕಲಾಗುತ್ತಿದೆ. ಮತ್ತೊಂದೆಡೆ ನಕಲಿ ದಾಖಲೆಗಳನ್ನು ಸಲ್ಲಿಕೆ ಮಾಡಿ ಆರೋಪಿಯು ಭಾರತೀಯ ಪಾಸ್‌ಪೋರ್ಟ್‌ ಪಡೆದಿರುವ ಬಗ್ಗೆಯೂ ಪರಿಶೀಲನೆ ನಡೆದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.