ಕದ್ದು ಮುಚ್ಚಿ ಕಾಲೇಜು ವಿದ್ಯಾರ್ಥಿನಿಯರ ಫೋಟೋ ತೆಗೆಯುತ್ತಿದ್ದವನಿಗೆ ಥಳಿತ

ಬೆಂಗಳೂರು : ಲಾಲ್‌ಬಾಗ್‌ ರಸ್ತೆಯಲ್ಲಿರುವ ಖಾಸಗಿ ಕಾಲೇಜು ಎದುರು ನಿಂತು ಫೋನ್‌ನಲ್ಲಿ ಮಾತನಾಡುವ ಸೋಗಿನಲ್ಲಿ ಕದ್ದು ಮುಚ್ಚಿ ವಿದ್ಯಾರ್ಥಿನಿಯರ ಫೋಟೋ ತೆಗೆಯುತ್ತಿದ್ದ ವ್ಯಕ್ತಿಯನ್ನು ವಿದ್ಯಾರ್ಥಿಗಳೇ ಹಿಡಿದು ಥಳಿಸಿ ಸಂಪಂಗಿರಾಮನಗರ ಪೊಲೀಸರ ವಶಕ್ಕೆ ನೀಡಿದ್ದಾರೆ.

ಬುಧವಾರ ಸಂಜೆ 6.30ರ ಸುಮಾರಿಗೆ ಘಟನೆ ನಡೆದಿದ್ದು, ಯಶವಂತಪುರ ನಿವಾಸಿ ಬಾಲಾಜಿ(45) ಎಂಬಾತನನ್ನು ಪೊಲೀಸರ ವಶಕ್ಕೆ ಒಪ್ಪಿಸಲಾಗಿದೆ.

ಕಾಲೇಜು ಎದುರು ನಿಂತುಕೊಂಡಿದ್ದ ಬಾಲಾಜಿ, ಫೋನ್‌ನಲ್ಲಿ ಮಾತನಾಡುವ ಸೋಗಿನಲ್ಲಿ ಯುವತಿಯರ ಫೋಟೋ ಕ್ಲಿಕ್ಕಿಸುತ್ತಿದ್ದ. ಸುಮಾರು 30 ನಿಮಿಷಗಳಿಂದ ಒಡಾಡಿಕೊಂಡು ಫೋನ್‌ನಲ್ಲಿ ಮಾತನಾಡುತ್ತಿದ್ದ ಬಾಲಾಜಿ ಮೇಲೆ ಅನುಮಾನ ಬಂದು ಮೊಬೈಲ್‌ ಮೇಲೆ ನಿಗಾ ವಹಿಸಿದಾಗ ಫ್ಲ್ಯಾಶ್‌ ಆಗುತ್ತಿರುವುದು ಕಂಡುಬಂದಿದೆ. ಕೂಡಲೇ ಆತನನ್ನು ಸುತ್ತುವರಿದ ವಿದ್ಯಾರ್ಥಿಗಳು, ಮೊಬೈಲ್‌ ಪರಿಶೀಲಿಸಿದಾಗ ಫೋಟೋ ಗ್ಯಾಲರಿಯಲ್ಲಿ ನೂರಾರು ಫೋಟೋಗಳು ಕಾಣಿಸಿವೆ. ಅದರಲ್ಲಿ ಮಕ್ಕಳಿಂದ ಹಿಡಿದು ವೃದ್ಧರ ಫೋಟೋಗಳಿವೆ. ಅವುಗಳನ್ನು ಕದ್ದುಮುಚ್ಚಿ ತೆಗೆದಿರುವುದು ಕಂಡು ಬಂದಿದೆ. ಹೀಗಾಗಿ, ಆತನನ್ನು ಥಳಿಸಿದ ವಿದ್ಯಾರ್ಥಿಗಳು ಮತ್ತು ಸ್ಥಳೀಯರು, ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

ಫೋಟೋ ತೆಗೆಯುತ್ತಿರುವುದರ ಕುರಿತು ವಿಚಾರಿಸಿದಾಗ, ''ನಾನು ರಿಯಲ್‌ ಎಸ್ಟೇಟ್‌ ಏಜೆಂಟ್‌. ಬಿಲ್ಡಿಂಗ್‌ ಫೋಟೋ ತೆಗೆದುಕೊಳ್ಳುತ್ತಿದ್ದೆ. ಅಲ್ಲಿ ಯುವತಿಯರು ನಿಂತಿರುವುದನ್ನು ನೋಡಿಲ್ಲ'' ಎಂದು ಹೇಳಿದ್ದಾನೆ. ಆದರೆ, ಉಳಿದ ಫೋಟೋಗಳನ್ನು ಏಕೆ ಮತ್ತು ಹೇಗೆ ತೆಗೆದುಕೊಂಡೆ ಎಂದು ಕೇಳಿದಾಗ ತಡವರಿಸಿದ್ದಾನೆ.

ಸ್ಥಳಕ್ಕೆ ಆಗಮಿಸಿದ ಹೊಯ್ಸಳ ಪೊಲೀಸರು, ಆರೋಪಿಯನ್ನು ವಶಕ್ಕೆ ಪಡೆದು ಠಾಣೆಗೆ ಕರೆದೊಯ್ದು ವಿಚಾರಣೆಗೆ ಒಳಪಡಿಸಿದ್ದಾರೆ.