ನಾಣ್ಯ ಬೀಳಿಸಿ 70 ಗ್ರಾಂ ಚಿನ್ನ ಕಳವು

ಬೆಂಗಳೂರು: ಬಿಎಂಟಿಸಿ ಬಸ್‌ಗಳಿಗೆ ಪ್ರಯಾಣಿಕರ ಸೋಗಿನಲ್ಲಿ ಹತ್ತಿದ್ದ ಕಳ್ಳಿಯರಿಬ್ಬರು, ಮಹಿಳೆಯರೊಬ್ಬರ ಗಮನ ಬೇರೆಡೆ ಸೆಳೆದು 70 ಗ್ರಾಂ ಚಿನ್ನಾಭರಣ ಮತ್ತು 20 ಸಾವಿರ ರೂ. ಇದ್ದ ಬ್ಯಾಗ್‌ ದೋಚಿದ್ದಾರೆ.

ದಾವಣಗೆರೆ ಮೂಲದ, ಬಾಗಲೂರು ನಿವಾಸಿ ಹಾಲಮ್ಮ (59) ಆಭರಣ, ಹಣ ಕಳೆದುಕೊಂಡವರು. ಜಾಲಹಳ್ಳಿ ಎಂಇಎಸ್‌ ರಿಂಗ್‌ ರಸ್ತೆ ಬಸ್‌ ನಿಲ್ದಾಣದ ಬಳಿ ಘಟನೆ ನಡೆದಿದೆ.

ಹಾಲಮ್ಮ ಅವರು ತಮ್ಮ ಊರು ದಾವಣಗೆರೆಯ ಹರಪನಹಳ್ಳಿಯಿಂದ ಮಾ.11ರಂದು ಬಾಗಲೂರಿನಲ್ಲಿರುವ ಪುತ್ರನ ಮನೆಗೆ ಬರುತ್ತಿದ್ದರು. ಗೊರಗುಂಟೆಪಾಳ್ಯದಲ್ಲಿ ಸಂಜೆ 5.15ರ ವೇಳೆಗೆ ಬಸ್‌ ಇಳಿದಿದ್ದ ಅವರು ಅಲ್ಲಿಂದ ಹೆಬ್ಬಾಳಕ್ಕೆ ತೆರಳಲು ಬಿಎಂಟಿಸಿ ಬಸ್‌ ಹತ್ತಿದ್ದರು. ಅದೇ ಬಸ್‌ಗೆ ಸುಮಾರು 30ರಿಂದ 45 ವರ್ಷದ ಇಬ್ಬರು ಮಹಿಳೆಯರು ಹತ್ತಿ ಹಾಲಮ್ಮ ಅವರ ಬಳಿ ಬಂದು ನಿಂತಿದ್ದರು. ಜಾಲಹಳ್ಳಿ ಎಂಇಎಸ್‌ ರಸ್ತೆಯಲ್ಲಿ ಬಸ್‌ ಚಲಿಸುತ್ತಿದ್ದಾಗ 5 ರೂಪಾಯಿಯ ಕೆಲವು ನಾಣ್ಯಗಳನ್ನು ಮಹಿಳೆಯೊಬ್ಬಳು ಮತ್ತೊಬ್ಬಳಿಗೆ ನೀಡುವಂತೆ ನಟಿಸಿ ಕೆಳಗೆ ಬೀಳಿಸಿದ್ದಳು. ಅದನ್ನು ಎತ್ತಿಕೊಡಲು ಹಾಲಮ್ಮ ಅವರು ಮುಂದಾಗಿದ್ದು, ಈ ವೇಳೆ ಸೀಟ್‌ನಲ್ಲಿ ಅವರು ಇಟ್ಟಿದ್ದ ಬ್ಯಾಗ್‌ನೊಳಗಿನಿಂದ ವ್ಯಾನಿಟಿ ಬ್ಯಾಗ್‌ ಎತ್ತಿಕೊಂಡು ಬಿಇಎಲ್‌ ಬಸ್‌ ಅವರಿಬ್ಬರು ಇಳಿದು ಪರಾರಿಯಾಗಿದ್ದರು.

ಹೆಬ್ಬಾಳ ನಿಲ್ದಾಣದಲ್ಲಿ ಹಾಲಮ್ಮ ಅವರು ಇಳಿದಾಗ ಕಳುವು ನಡೆದಿರುವುದು ಗೊತ್ತಾಗಿದೆ. ಬಳಿಕ ಪುತ್ರನನ್ನು ಕರೆಸಿಕೊಂಡು ಕೊಡಿಗೆಹಳ್ಳಿ ಠಾಣೆಯಲ್ಲಿ ಕೇಸ್‌ ದಾಖಲಿಸಿದ್ದರು.