ಟ್ರ್ಯಾಕ್ಟರ್‌ ಡಿಕ್ಕಿ ; ಮಗು ಸಾವು

ಬೆಂಗಳೂರು: ದ್ವಿಚಕ್ರ ವಾಹನಕ್ಕೆ ಟ್ರ್ಯಾಕ್ಟರ್‌ ಡಿಕ್ಕಿ ಹೊಡೆದ ಪರಿಣಾಮ ದ್ವಿಚಕ್ರ ವಾಹನದಲ್ಲಿದ್ದ ನಾಲ್ಕು ವರ್ಷದ ಮಗು ಮೃತಪಟ್ಟಿರುವ ಘಟನೆ ಬಿಟಿಎಂ ಲೇಔಟ್‌ನ 2ನೇ ಹಂತದಲ್ಲಿ ನಡೆದಿದೆ.

ಬಿಳೇಕಹಳ್ಳಿ ನಿವಾಸಿ ಸಚಿನ್‌ ಮಾಂಡ್ರೆ ದಂಪತಿ ಪುತ್ರಿ ಸಾರಾ(4) ಮೃತ ಮಗು. ಡಿಕ್ಕಿಯ ರಭಸಕ್ಕೆ ದ್ವಿಚಕ್ರ ವಾಹನದಲ್ಲಿದ್ದ ತಂದೆ -ತಾಯಿ ಒಂದು ದಿಕ್ಕಿಗೆ ಬಿದ್ದರೆ ಮಗು ಮತ್ತೊಂದು ದಿಕ್ಕಿಗೆ ಬಿದ್ದು ತಲೆ ನೆಲಕ್ಕೆ ಅಪ್ಪಳಿಸಿತ್ತು. ಪರಿಣಾಮ ಚಿಕಿತ್ಸೆ ಫಲಕಾರಿಯಾಗದೆ ಮಗು ಮೃತಪಟ್ಟಿದೆ ಎಂದು ಪೊಲೀಸರು ಮಾಹಿತಿ ನೀಡಿದರು.

ಘಟನೆ ಸಂಬಂಧ ಟ್ರ್ಯಾಕ್ಟರ್‌ ಚಾಲಕ ಇಂದ್ರೇಶ್‌ (45) ನನ್ನು ಬಂಧಿಸಲಾಗಿದೆ. ಮಹಾರಾಷ್ಟ್ರ ಮೂಲದ ಸಚಿನ್‌ ಮಾಂಡ್ರೆ ಕುಟುಂಬ ಬಿಳೇಕಹಳ್ಳಿಯಲ್ಲಿ ವಾಸವಿದೆ. ಸಚಿನ್‌ ಬಿಟಿಎಂ ಲೇಔಟ್‌ನಲ್ಲೇ ಹೋಟೆಲ್‌ ಒಂದರ ಮೇಲ್ವಿಚಾರಕರಾಗಿದ್ದಾರೆ. ಭಾನುವಾರ ಸಂಜೆ ಕುಟುಂಬ ಸಮೇತರಾಗಿ ಹೋಗುತ್ತಿದ್ದಾಗ ಬಿಟಿಎಂ ಲೇಔಟ್‌ನ 2ನೇ ಹಂತದ 20ನೇ ಮುಖ್ಯರಸ್ತೆಯಲ್ಲಿ ಟ್ರ್ಯಾಕ್ಟರ್‌ ಬಂದು ಡಿಕ್ಕಿ ಹೊಡೆದಿತ್ತು. ಆರೋಪಿ ಚಾಲಕನಿಗೆ ಚಾಲನಾ ಪರವಾನಗಿಯೇ ಇರಲಿಲ್ಲ ಎನ್ನುವುದು ವಿಚಾರಣೆ ವೇಳೆ ಗೊತ್ತಾಗಿದೆ. ಪ್ರಕರಣ ದಾಖಲಿಸಿಕೊಂಡು ಟ್ರ್ಯಾಕ್ಟರ್‌ ಮಾಲೀಕನನ್ನೂ ಪ್ರಕರಣದಲ್ಲಿ ಬಂಧಿಸಿ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿರುವ ಸಂಚಾರ ಠಾಣೆ ಪೊಲೀಸರು ಚಾಲಕನನ್ನು ನ್ಯಾಯಾಂಗ ವಶಕ್ಕೆ ಒಪ್ಪಿಸಿದ್ದಾರೆ.