ನಕಲಿ ಪಾರ್ಸ್‌ಪೋರ್ಟ್‌ನಿಂದ ಲಂಡನ್‌ಗೆ ಹಾರಲು ಯತ್ನ: ಇರಾನಿಗಳಿಬ್ಬರ ಬಂಧನ

ಬೆಂಗಳೂರು: ಸ್ಪೇನ್‌ ದೇಶದ ನಕಲಿ ಪಾಸ್‌ಪೋರ್ಟ್‌ ಬಳಸಿ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಲಂಡನ್‌ಗೆ ತೆರಳಲು ಯತ್ನಿಸಿದ ಇಬ್ಬರು ಇರಾನ್‌ ಪ್ರಜೆಗಳನ್ನು ಕೆಐಎ ಪೊಲೀಸರು ಬಂಧಿಸಿದ್ದಾರೆ.

ಗೊಲ್ಬೊಸ್ತಾನಿ ವಾಹಿದ್‌ (38) ಹಾಗೂ ಇರ್ಫಾನ್ಹ (27) ಬಂಧಿತರು. ಕೆಐಎನ ಭದ್ರತಾ ಅಧಿಕಾರಿ ಡಿ.ಕೆ.ಸಿಂಗ್‌ ನೀಡಿದ ದೂರು ಆಧರಿಸಿ ಕೆಐಎ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಇಬ್ಬರನ್ನು ವಶಕ್ಕೆ ತೆಗೆದುಕೊಂಡು ವಿಚಾರಣೆ ನಡೆಸುತ್ತಿದ್ದಾರೆ.

ಆರೋಪಿಗಳು 2018ರ ಜ.31ರಂದು ಇರಾನ್‌ ಪಾಸ್‌ಪೋರ್ಟ್‌ನಲ್ಲಿಬ್ಯಾಂಕಾಕ್‌ ಮಾರ್ಗವಾಗಿ ಮುಂಬಯಿಗೆ ಬಂದಿದ್ದರು. ಬಳಿಕ ಮಾ.2ರಂದು ಮುಂಬಯಿನಿಂದ ಬ್ಯಾಂಕಾಕ್‌ಗೆ ತೆರಳಿದ್ದರು. ಅಲ್ಲಿ, ಇರಾನ್‌ ಮೂಲದ ಏಜೆಂಟ್‌ವೊಬ್ಬರಿಗೆ 3 ಸಾವಿರ ಅಮೇರಿಕನ್‌ ಡಾಲರ್‌ ನೀಡಿ ಆ್ಯಂಡ್ರೆಸ್‌ ರವೋಸ್‌ ಪಾಷಾ ಮತ್ತು ಮರಿಯಾ ಗೋಮೆಜ್‌ ಡಿಮಿಕ್ರಿ ಎಂಬುವರಿಗೆ ವಿತರಣೆಯಾಗಿದ್ದ ಸ್ಪೇನ್‌ನ ಪಾಸ್‌ಪೋರ್ಟ್‌ ನಕಲು ಮಾಡಿಸಿಕೊಂಡಿದ್ದರು. ಬಳಿಕ ಅದೇ ಪಾಸ್‌ಪೋರ್ಟ್‌ಗಳನ್ನು ಬಳಸಿ ಆನ್‌ಲೈನ್‌ನಲ್ಲಿವೀಸಾ ಮತ್ತು ಟಿಕೆಟ್‌ ಪಡೆದು ಬ್ಯಾಂಕಾಕ್‌ನಿಂದ ಬಿಹಾರದ ಗಯಾಕ್ಕೆ ಮಾ.19ರಂದು ಬಂದಿಳಿದಿದ್ದರು. ನಂತರ ಬೆಂಗಳೂರಿಗೆ ಬಂದಿದ್ದ ಆರೋಪಿಗಳು ಏ.4ರಂದು ಕೆಐಎನಿಂದ ಬ್ರಿಟೀಷ್‌ ಏರ್‌ವೇಸ್‌ ಬಿಎ118 ವಿಮಾನದಲ್ಲಿಲಂಡನ್‌ಗೆ ತೆರಳಿ ಅಲ್ಲಿಂದ ಸ್ಪೇನ್‌ನ ಬಂದರು ನಗರಿ ಮಲಗ ಎಂಬಲ್ಲಿಗೆ ತೆರಳುವವರಿದ್ದರು ಎಂದು ದೂರಿನಲ್ಲಿತಿಳಿಸಲಾಗಿದೆ.

ನಿಲ್ದಾಣದಲ್ಲಿ ಆರೋಪಿತರ ಪಾಸ್‌ಪೋರ್ಟ್‌ ಪರಿಶೀಲನೆ ವೇಳೆ ಅನುಮಾನಗೊಂಡ ಬ್ರಿಟೀಷ್‌ ಏರ್‌ವೇಸ್‌ನ ಅಧಿಕಾರಿಗಳು, ವಲಸೆ ವಿಭಾಗದ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದರು. ಪರಿಶೀಲನೆ ನಡೆಸಿದಾಗ ಇರಾನ್‌ ಪ್ರಜೆಗಳು ಸ್ಪೇನ್‌ ದೇಶದ ನಕಲಿ ಪಾಸ್‌ಪೋರ್ಟ್‌ ಬಳಕೆ ಮಾಡಿ ಕೆಐಎನಲ್ಲಿರುವ ವಲಸೆ ವಿಭಾಗದ ಅಧಿಕಾರಿಗಳಿಗೆ ವೋಸ ಮಾಡಿರುವುದು ಕಂಡು ಬಂದಿದೆ. ಈ ಹಿನ್ನೆಲೆಯಲ್ಲಿವಲಸೆ ವಿಭಾಗದ ಅಧಿಕಾರಿ ಕೆಐಎ ಠಾಣೆಗೆ ದೂರು ನೀಡಿದ್ದಾರೆ.

ಏ.8ರಂದು ಪ್ರಕರಣ ದಾಖಲಿಸಿಕೊಂಡಿರುವ ಕೆಐಎ ಪೊಲೀಸರು, ಆರೋಪಿಗಳು ನಕಲಿ ಪಾಸ್‌ಪೋರ್ಟ್‌ ಬಳಕೆಯ ಹಿಂದಿನ ಉದ್ದೇಶದ ಬಗ್ಗೆ ವಿಚಾರಣೆ ನಡೆಸುತ್ತಿರುವುದಾಗಿ ತಿಳಿಸಿದ್ದಾರೆ.