ಕೋರ್ಟ್‌ಗೆ ಹಾಜರಾದ ದುನಿಯಾ ವಿಜಯ್‌

ಬೆಂಗಳೂರು: ಜಿಮ್‌ ತರಬೇತುದಾರ ಮಾರುತಿಗೌಡನ ಅಪಹರಣ ಮತ್ತು ಹಲ್ಲೆ ಆರೋಪ ಪ್ರಕರಣದಲ್ಲಿ ನಟ ದುನಿಯಾ ವಿಜಯ್‌ ಶನಿವಾರ 8ನೇ ಎಸಿಎಂಎಂ ನ್ಯಾಯಾಲಯಕ್ಕೆ ಹಾಜರಾದರು.

ನ್ಯಾಯಾಲಯದಿಂದ ಖುದ್ದು ಹಾಜರಿಗೆ ಸಮನ್ಸ್‌ ಇಲ್ಲದೇ ಇದ್ದರೂ ವಿಜಯ್‌ ಜೊತೆಗೆ ಆರೋಪಿಗಳಾಗಿರುವ ಪ್ರಸಾದ್‌, ಮಣಿ, ಕಾರು ಚಾಲಕ ಪ್ರಸಾದ್‌ ನ್ಯಾಯಾಲಯಕ್ಕೆ ಹಾಜರಾಗಿದ್ದರು. ಪೊಲೀಸರು ಪ್ರಕರಣದಲ್ಲಿ ದೋಷಾರೋಪ ಪಟ್ಟಿ ಸಲ್ಲಿಸುವವರೆಗೆ ಖುದ್ದು ಹಾಜರಾತಿಗೆ ವಿನಾಯಿತಿ ನೀಡಬೇಕೆಂದು ಆರೋಪಿಗಳ ಪರ ವಕೀಲರು ನ್ಯಾಯಾಲಯಕ್ಕೆ ಮನವಿ ಮಾಡಿದ್ದರು. ಮನವಿ ತಿರಸ್ಕರಿಸಿದ ನ್ಯಾಯಾಲಯ, ಪೊಲೀಸರ ವಿಚಾರಣೆಗೆ ಅಗತ್ಯವಿದ್ದಾಗ ಮತ್ತು ನ್ಯಾಯಾಲಯದ ವಿಚಾರಣೆಗೆ ಹಾಜರಾಗಬೇಕು ಎಂದು ತಿಳಿಸಿ ವಿಚಾರಣೆಯನ್ನು ಡಿ.12ಕ್ಕೆ ಮುಂದೂಡಿದೆ. ನ್ಯಾಯಾಲಯದಿಂದ ಹೊರ ಬಂದ ವಿಜಯ್‌, ಮಾಧ್ಯಮಗಳಿಗೆ ಯಾವುದೇ ಪ್ರತಿಕ್ರಿಯೆ ನೀಡಲಿಲ್ಲ.

ಸೆ.22ರಂದು ವಸಂತನಗರದ ಅಂಬೇಡ್ಕರ್‌ ಭವನದಲ್ಲಿ ನಡೆದ ಮಿಸ್ಟರ್‌ ಬೆಂಗಳೂರು ಬಾಡಿ ಬಿಲ್ಡಿಂಗ್‌ ಸ್ಪರ್ಧೆ ನೋಡಲು ತಮ್ಮ ಪುತ್ರ ಮತ್ತು ಸಹಚರರ ಜೊತೆ ವಿಜಯ್‌ ಹೋಗಿದ್ದರು. ಈ ವೇಳೆ ಮಾರುತಿಗೌಡ ಮತ್ತು ವಿಜಯ್‌ ಸಹಚರರ ನಡುವೆ ಗಲಾಟೆ ನಡೆದಿತ್ತು. ಈ ಸಂಬಂಧ ಹೈಗ್ರೌಂಡ್ಸ್‌ ಪೊಲೀಸ್‌ ಠಾಣೆಯಲ್ಲಿ ದೂರು ಪ್ರತಿ-ಪ್ರತಿದೂರು ದಾಖಲಾಗಿವೆ. ಇತ್ತೀಚೆಗೆ ವಿಜಯ್‌ ಅವರು ಸೆಷೆನ್ಸ್‌ ನ್ಯಾಯಾಲಯದಲ್ಲಿ ಜಾಮೀನು ಪಡೆದುಕೊಂಡಿದ್ದಾರೆ.