ವಾಶ್‌ರೂಮ್‌ ದೃಶ್ಯ ವಿಡಿಯೋ ಮಾಡಿದ ಆರೋಪಿಗಳು: ದೂರು ದಾಖಲು

ಬೆಂಗಳೂರು: ವಾಶ್‌ರೂಮ್‌ನಲ್ಲಿ ಇದ್ದಾಗ, ಕಿಟಕಿ ಮೂಲಕ ಮೊಬೈಲ್‌ ಫೋನ್‌ನಿಂದ ಯುವಕರಿಬ್ಬರು ಫೋಟೋ/ವಿಡಿಯೋ ತೆಗೆದುಕೊಂಡಿದ್ದಾರೆ ಎಂದು ಆರೋಪಿಸಿ 29 ವರ್ಷದ ಮಹಿಳೆಯೊಬ್ಬರು ಕೋರಮಂಗಲ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಜೂ.7ರಂದು ರಾತ್ರಿ 11.30ರ ಸುಮಾರಿಗೆ ಮನೆಯ ವಾಶ್‌ರೂಮ್‌ನಲ್ಲಿದ್ದಾಗ ಸಿಗರೇಟ್‌ ಹೊಗೆಯ ವಾಸನೆ ಬಂದಿದೆ. ಎಲ್ಲಿಂದ ಬರುತ್ತಿದೆ ಎಂದು ಕಿಟಕಿ ಕಡೆ ನೋಡಿದಾಗ ಒಬ್ಬ ವ್ಯಕ್ತಿ ಮೊಬೈಲ್‌ ಫೋನ್‌ ಹಿಡಿದುಕೊಂಡು ವಿಡಿಯೋ ಅಥವಾ ಫೋಟೋ ತೆಗೆಯುತ್ತಿದ್ದ. ಆಘಾತಗೊಂಡು ಕಿರುಚಿಕೊಂಡಾಗ ನಮ್ಮ ಕಟ್ಟಡದಿಂದ ಪಕ್ಕದ ಕಟ್ಟಡಕ್ಕೆ ಜಿಗಿದು ಹೋಗಿರುವ ಸದ್ದು ಕೇಳಿತು. ನಂತರ ಅಲ್ಲಿಗೆ ಹೋಗಿ ನೋಡಿದಾಗ ಸ್ಥಳೀಯರಾದ ಗುರು ಹಾಗೂ ಆತನ ಒಬ್ಬ ಸ್ನೇಹಿತ ಇದ್ದರು. ಗುರು ಬಳಿ ಇದ್ದ ಮೊಬೈಲ್‌ ಪರಿಶೀಲಿಸಿದಾಗ, ಕಿಟಕಿ ಮೂಲಕ ನೋಡಿದ ಮೊಬೈಲ್‌ನಂತೆ ಕಂಡು ಬಂದಿದೆ. ಹೀಗಾಗಿ, ಆರೋಪಿಗಳ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವಂತೆ ಸಂತ್ರಸ್ತೆ ಶುಕ್ರವಾರ (ಜೂ.8) ಕೋರಮಂಗಲ ಠಾಣೆಗೆ ದೂರು ನೀಡಿದ್ದಾರೆ.

ಮಹಿಳೆಯ ಖಾಸಗಿತನಕ್ಕೆ ಧಕ್ಕೆ ಆರೋಪದಡಿ ಪ್ರಕರಣ ದಾಖಲಿಸಿಕೊಂಡು ಆರೋಪಿಗಳ ಪತ್ತೆಗೆ ಕ್ರಮ ಕೈಗೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದರು.