ವ್ಹೀಲಿಂಗ್‌ ವಿಡಿಯೊ ವೈರಲ್‌ : ಆರೋಪಿ ಬಂಧನ

ಬೆಂಗಳೂರು : ದೇವನಹಳ್ಳಿ-ನಂದಿ ಬೆಟ್ಟ ಮುಖ್ಯರಸ್ತೆಯಲ್ಲಿ ಯುವತಿಯನ್ನು ಹಿಂಬದಿ ಕೂರಿಸಿಕೊಂಡು ಸ್ಕೂಟರ್‌ ಮೇಲೆ ಒಂಟಿ ಕಾಲಿನಲ್ಲಿ ಅಪಾಯಕಾರಿ ವ್ಹೀಲಿಂಗ್‌ ಮಾಡಿದ್ದ ಯುವಕನನ್ನು ಸಂಚಾರ ಪೊಲೀಸರು ಬಂಧಿಸಿದ್ದಾರೆ. ಯಲಹಂಕ ನಿವಾಸಿ ನೂರ್‌ ಅಹ್ಮದ್‌ (21) ಬಂಧಿತ ಆರೋಪಿ. ಆಟೋ ಚಾಲಕರ ಪುತ್ರನಾಗಿರುವ ನೂರ್‌, ಯಲಹಂಕ ಸರಕಾರಿ ಕಾಲೇಜಿನಲ್ಲಿ ಬಿಕಾಂ ವ್ಯಾಸಂಗ ಮಾಡುತ್ತಿದ್ದಾನೆ. ಸ್ನೇಹಿತನ ಸ್ಕೂಟರ್‌ನಲ್ಲಿ ವ್ಹೀಲಿಂಗ್‌ ಮಾಡಿದ್ದ. ಜಾಲತಾಣಗಳಲ್ಲಿ ವ್ಹೀಲಿಂಗ್‌ ವಿಡಿಯೋ ವೈರಲ್‌ ಆಗಿತ್ತು. ವ್ಹೀಲಿಂಗ್‌ ಮಾಡಿದ ಯುವಕನನ್ನು ಪತ್ತೆ ಹಚ್ಚಿ ಕ್ರಮ ಕೈಗೊಳ್ಳುವಂತೆ ಸಾರ್ವಜನಿಕ ವಲಯದಲ್ಲಿ ತೀವ್ರ ಒತ್ತಡ ಬಂದಿತ್ತು.

ಈ ಸಂಬಂಧ ವಿಶೇಷ ಕಾರ್ಯಾಚರಣೆ ನಡೆಸಿದ ಸಂಚಾರ ಪೊಲೀಸರು, ಸ್ಕೂಟರ್‌ ನೋಂದಣಿ ಸಂಖ್ಯೆ ಆಧರಿಸಿ ಮಾಲೀಕ ಇಮ್ರಾನ್‌ ಖಾನ್‌ ಎಂಬುವರನ್ನು ಹೆಬ್ಬಾಳದಲ್ಲಿ ಪತ್ತೆ ಮಾಡಿದ್ದರು. ಆದರೆ, ವ್ಹೀಲಿಂಗ್‌ ಮಾಡಿದವರು ಬೇರೆ ಎಂದು ಗೊತ್ತಾಯಿತು. ನಂತರ ಆತನಿಗಾಗಿ ಬಲೆ ಬೀಸಿ ಬಂಧಿಸಲಾಯಿತು ಎಂದು ಪೊಲೀಸ್‌ ಅಧಿಕಾರಿ ತಿಳಿಸಿದರು.

ಸ್ನೇಹಿತರಿಗೆ ವ್ಹೀಲಿಂಗ್‌ ತರಬೇತಿ !

ನೂರ್‌ ಅಹ್ಮದ್‌ ಸಾರ್ವಜನಿಕ ರಸ್ತೆಯಲ್ಲಿ ತಾನು ವ್ಹೀಲಿಂಗ್‌ ಮಾಡುವುದಲ್ಲದೆ ಸ್ನೇಹಿತರಿಗೂ ವ್ಹೀಲಿಂಗ್‌ ಮಾಡಲು ಹೇಳಿಕೊಡುತ್ತಿದ್ದ ಎಂದು ವಿಚಾರಣೆಯಲ್ಲಿ ಗೊತ್ತಾಗಿದೆ.

ವಾರಾಂತ್ಯದಲ್ಲಿ ಸ್ನೇಹಿತರನ್ನು ಕರೆದುಕೊಂಡು ನಂದಿಬೆಟ್ಟ ರಸ್ತೆಗೆ ಹೋಗುತ್ತಿದ್ದ ನೂರ್‌, ಸುಮಾರು 3 ತಾಸುಗಳವರೆಗೆ ವ್ಹೀಲಿಂಗ್‌ ಮಾಡುವುದು ಹೇಗೆ ಎಂದು ಹೇಳಿ, ತೋರಿಸಿಕೊಡುತ್ತಿದ್ದ. ಅಲ್ಲದೇ, ವ್ಹೀಲಿಂಗ್‌ನಲ್ಲಿ ತನ್ನ ಸ್ನೇಹಿತರು ಪರಿಣತಿ ಪಡೆದಿದ್ದಾರೆ ಎಂದು ಖಚಿತಪಡಿಸಿಕೊಳ್ಳುವವರೆಗೂ ತರಬೇತಿ ಕೊಡುತ್ತಿದ್ದ ಎಂದು ಪೊಲೀಸರು ತಿಳಿಸಿದರು.

''ಹಿಂಬದಿ ಕುಳಿತಿದ್ದ ಯುವತಿಯ ಕುರಿತು ನನಗೆ ಹೆಚ್ಚಿನ ಮಾಹಿತಿ ಇಲ್ಲ. ನನ್ನ ವ್ಹೀಲಿಂಗ್‌ ನೋಡಿ ಮೆಚ್ಚುಗೆ ವ್ಯಕ್ತಪಡಿಸಿ ಸ್ವಯಂಪ್ರೇರಿತರಾಗಿ ಸ್ಕೂಟರ್‌ ಮೇಲೆ ಕುಳಿತುಕೊಂಡಿದ್ದಳು. ಅಂದು ವಿಡಿಯೋ ಮಾಡಿಕೊಂಡವರೇ ಜಾಲತಾಣಗಳಲ್ಲಿ ಅಪ್‌ಲೋಡ್‌ ಮಾಡಿದ್ದಾರೆ'' ಎಂದು ನೂರ್‌ ವಿಚಾರಣೆ ವೇಳೆ ಹೇಳಿದ್ದಾನೆ ಎಂದು ಪೊಲೀಸರು ತಿಳಿಸಿದರು.