ಚೀಟಿ ಹಣಕ್ಕಾಗಿ ಮಹಿಳೆಯನ್ನು ಕಂಬಕ್ಕೆ ಕಟ್ಟಿದರು!

ವಿಕ ಸುದ್ದಿಲೋಕ ರಾಮನಗರ

ಚೀಟಿ ಹಣ ವಾಪಸ್‌ ನೀಡಿಲ್ಲ ಎಂಬ ಕಾರಣಕ್ಕೆ ಮಹಿಳೆಯನ್ನು ಬೆಳಗ್ಗೆಯಿಂದ ಮಧ್ಯಾಹದವರೆಗೂ ವಿದ್ಯುತ್‌ ಕಂಬಕ್ಕೆ ಕಟ್ಟಿ ಹಾಕಿ ಹಿಂಸಿಸಿರುವ ಅಮಾನವೀಯ ಘಟನೆ ಬೆಂಗಳೂರಿನ ಹೊರ ವಲಯದ ತಾವರೆಕೆರೆ ವ್ಯಾಪ್ತಿಯ ಕೊಡಿಗೇಹಳ್ಳಿಯಲ್ಲಿ ಗುರುವಾರ ನಡೆದಿದೆ.

ಕೊಳ್ಳೇಗಾಲ ಮೂಲದ ರಾಜಮಣಿ ಅನೇಕ ವರ್ಷಗಳಿಂದ ತಮ್ಮ ಮಗಳೊಂದಿಗೆ ಕೊಡಿಗೇಹಳ್ಳಿಯಲ್ಲಿಯೇ ವಾಸವಾಗಿದ್ದರು. ಚೀಟಿ ನಡೆಸುತ್ತಿದ್ದ ಅವರು 52 ಸಾವಿರ ರೂಪಾಯಿಗಳನ್ನು ವಾಪಸ್‌ ನೀಡಲಾಗದೆ ಒಂದು ತಿಂಗಳ ಹಿಂದೆಯೇ ಊರು ಬಿಟ್ಟಿದ್ದರು. ಊರಿನಲ್ಲಿ ಸಣ್ಣ ಹೋಟಲ್‌ ನಡೆಸುತ್ತಿದ್ದ ರಾಜಮಣಿ, ಸುಮಾರು ಏಳೆಂಟು ಮಂದಿ ಚೀಟಿದಾರರಿಗೆ ಹಣ ಕೊಡಬೇಕಾಗಿತ್ತು. ಅವರೆಲ್ಲರೂ ರಾಜಮಣಿಗಾಗಿ ಹುಡುಕಾಡುತ್ತಿದ್ದರು.

ಗುರುವಾರ ಬೆಳಗ್ಗೆ ಚೀಟಿದಾರರು ಕಣ್ಣಿಗೆ ಬಿದ್ದ ರಾಜಮಣಿಯನ್ನು ವಿದ್ಯುತ್‌ ಕಂಬಕ್ಕೆ ಕಟ್ಟಿ ಹಾಕಿದ್ದಾರೆ. ವಿಷಯ ತಿಳಿದ ಸಾರ್ವಜನಿಕರು, ಇದನ್ನು ವಿಡಿಯೋ ಮಾಡಿ, ಜಾಲತಾಣಗಳಲ್ಲಿ ಹರಿಬಿಟ್ಟಿದ್ದಾರೆ. ಈ ವಿಡಿಯೋ ಎಲ್ಲೆಡೆ ವೈರಲ್‌ ಆಗಿದ್ದು, ಚೀಟಿದಾರರ ವಿರುದ್ಧ ಆಕ್ರೋಶ ವ್ಯಕ್ತವಾಗಿದೆ.

ದೂರಿನ ಮೇಲೆ ಕ್ರಮ: ವಿಡಿಯೋ ವೈರಲ್‌ ಆದ ಬಳಿಕ ತಾವರೆಕೆರೆ ಪೊಲೀಸರು ಸ್ಥಳಕ್ಕೆ ಧಾವಿಸಿ ಮಹಿಳೆಯನ್ನು ರಕ್ಷಿಸಿದ್ದಾರೆ. ಈ ವೇಳೆ, ಹಿರಿಯ ಪೊಲೀಸ್‌ ಅಧಿಕಾರಿಗಳು ಗ್ರಾಮಕ್ಕೆ ಭೇಟಿ ನೀಡಿ ಮಾಹಿತಿ ಕಲೆ ಹಾಕಿದ್ದು, ಮಹಿಳೆ ದೂರು ನೀಡಿದರೆ, ಪ್ರಕರಣ ದಾಖಲಿಸಿಕೊಳ್ಳುವುದಾಗಿ ತಿಳಿಸಿದ್ದಾರೆ.