ವಿಷ ಸೇವಿಸಿ ತಾಯಿ, ಮಗಳು ಆತ್ಮಹತ್ಯೆ

ಬೆಂಗಳೂರು: ತಾಯಿಯೊಬ್ಬಳು ತನ್ನ ಇಬ್ಬರು ಮಕ್ಕಳೊಂದಿಗೆ ವಿಷ ಸೇವಿಸಿದ್ದಾಳೆ. ಇದರ ಪರಿಣಾಮ ತಾಯಿ, ಮಗಳು ಮೃತಪಟ್ಟಿದ್ದು, ಮಗನನ್ನು ಆಸ್ಪತ್ರೆಗೆ ದಾಖಲಿಸಿ, ಚಿಕಿತ್ಸೆ ನೀಡಲಾಗುತ್ತಿದೆ.

ಜಯಂತಿ ನಗರದಲ್ಲಿ ವಾಸವಿದ್ದ ಮೀನಾ (26) ಮತ್ತು ಅವರ ಮಗಳು ಸುಗುಣ (4) ಮೃತರು. ಚರಣ್‌ (6) ಅಸ್ವಸ್ಥಗೊಂಡವ.

ತಮಿಳುನಾಡು ಮೂಲದ ಕುಮಾರೇಶನ್‌ ಜೊತೆ ಮೀನಾಗೆ 8 ವರ್ಷಗಳ ಹಿಂದೆ ವಿವಾಹವಾಗಿತ್ತು. ಮೀನಾ ಗೃಹಿಣಿಯಾಗಿದ್ದು, ಕುಮಾರೇಶನ್‌ ಗಾರೆ ಕೆಲಸ ಮಾಡುತ್ತಿದ್ದಾರೆ.

ಶುಕ್ರವಾರ ಬೆಳಗ್ಗೆ 10 ಗಂಟೆ ಸುಮಾರಿಗೆ ಕುಮಾರೇಶನ್‌ ಕೆಲಸಕ್ಕೆ ತೆರಳಿದ್ದರು. ಮಧ್ಯಾಹ್ನ 1.30ರ ಸುಮಾರಿಗೆ ಊಟಕ್ಕೆ ಬಂದಾಗ ಮನೆಯಲ್ಲಿ ಪತ್ನಿ ಮತ್ತು ಮಕ್ಕಳ ಬಾಯಲ್ಲಿ ನೊರೆ ಬರುತ್ತಿದ್ದು ಅಸ್ವಸ್ಥಗೊಂಡಿರುವುದನ್ನು ಗಮನಿಸಿದ್ದರು. ಆತಂಕಗೊಂಡ ಕುಮಾರೇಶನ್‌, ಸ್ಥಳೀಯರ ನೆರವಿನೊಂದಿಗೆ ಮೂವರನ್ನು ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ಅಷ್ಟರಲ್ಲಾಗಲೇ ಪತ್ನಿ ಮತ್ತು ಮಗಳು ಮೃತಪಟ್ಟಿದ್ದರು.

ಬಾಯಿಯಲ್ಲಿ ನೊರೆ ಬಂದಿರುವ ಕಾರಣ ವಿಷ ಸೇವನೆ ಆಗಿರಬಹುದು ಎಂದು ಅನುಮಾನವಿದೆ. ಆದರೆ, ಬಾಟಲಿ ಪತ್ತೆಯಾಗಿಲ್ಲ. ಜ್ಯೂಸ್‌ನಲ್ಲಿ ವಿಷ ಬೆರೆಸಿ ಸೇವಿಸಿರಬಹುದು ಎಂದು ಶಂಕಿಸಲಾಗಿದೆ. ಎಫ್‌ಎಸ್‌ಎಲ್‌ ವರದಿ ಬಂದ ನಂತರ ನಿಖರ ಕಾರಣ ಗೊತ್ತಾಗಲಿದೆ ಎಂದು ರಾಮಮೂರ್ತಿ ನಗರ ಪೊಲೀಸರು ತಿಳಿಸಿದರು.

ದಂಪತಿ ಅನ್ಯೋನ್ಯವಾಗಿದ್ದರು
ಕುಮಾರೇಶನ್‌, ಮೀನಾ ದಂಪತಿ ಅನ್ಯೋನ್ಯವಾಗಿದ್ದರು. ಆತ್ಮಹತ್ಯೆಗೆ ಕಾರಣ ಏನು ಎಂಬುದು ಗೊತ್ತಿಲ್ಲ ಎಂದು ಮೃತಳ ಪಾಲಕರು ವಿಚಾರಣೆ ವೇಳೆ ತಿಳಿಸಿದ್ದಾಗಿ ಪೊಲೀಸರು ಹೇಳಿದರು.