ಮದುವೆಯಾಗುವುದಾಗಿ ನಂಬಿಸಿ ಮಹಿಳಾ ಪೇದೆಯ ಅತ್ಯಾಚಾರ

ಬೆಂಗಳೂರು: ನಗರದ ಸಂಚಾರ ಪೊಲೀಸ್‌ ಠಾಣೆಯ 26 ವರ್ಷದ ಮಹಿಳಾ ಪೇದೆಯನ್ನು ಮದುವೆ ಆಗುವುದಾಗಿ ನಂಬಿಸಿ ಲೈಂಗಿಕ ಸಂಪರ್ಕ ಮಾಡಿದ ಯುವಕನೊಬ್ಬ, ನಂತರ 'ಕೆಳ ಜಾತಿಯವಳು' ಎಂದು ಹೇಳಿ ವಂಚಿಸಿರುವ ಬಗ್ಗೆ ಉಪ್ಪಾರಪೇಟೆ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಬಾಗಲಕೋಟ ಜಿಲ್ಲೆ ಜಮಖಂಡಿ ತಾಲೂಕಿನ ಮಾರೇಗುಡ್ಡಿ ಮೂಲದ ಆರೋಪಿ ಅಮೀನ್‌ಸಾಬ್‌ ಮತ್ತು ಈತನ ತಾಯಿ, ಸಹೋದರಿ ಮತ್ತು ಸಹೋದರನ ವಿರುದ್ಧ ಎಫ್‌ಐಆರ್‌ ದಾಖಲಾಗಿದೆ.

2015ರಲ್ಲಿ ಪಿಎಸ್‌ಐ ಮತ್ತು ಕೆಎಎಸ್‌ ಪರೀಕ್ಷೆಗೆ ಕೋಚಿಂಗ್‌ ಪಡೆಯಲು ಮಹಿಳಾ ಪೇದೆ, ವಿಜಯಪುರಕ್ಕೆ ಹೋಗಿದ್ದಾಗ ಅಮೀನ್‌ ಸಾಬ್‌ ಪರಿಚಯವಾಗಿದ್ದ. ಇಬ್ಬರೂ ಫೋನ್‌ ನಂಬರ್‌ ವಿನಿಮಯ ಮಾಡಿಕೊಂಡಿದ್ದರು. ಬಳಿಕ ಅಮೀನ್‌ ಸಾಬ್‌ ಮದುವೆ ಮಾಡಿಕೊಳ್ಳುತ್ತೇನೆ ಎಂದಿದ್ದ. ಈ ವೇಳೆ ಧರ್ಮದ ಕಾರಣಕ್ಕೆ ಆಗುವುದಿಲ್ಲ ಎಂದು ಪೇದೆ ಹೇಳಿದ್ದರು. ಆದರೂ, ಬಿಡದ ಆರೋಪಿ, ಮಹಿಳಾ ಪೇದೆಯ ಮನೆಗೆ ಹೋಗಿ ತಾಯಿ, ಸಹೋದರನ ಬಳಿ ಪರಿಚಯ ಮಾಡಿಕೊಂಡು ಮದುವೆ ಆಗುವುದಾಗಿ ಅಮೀನ್‌ ಹೇಳಿದ್ದ.

ಈ ನಡುವೆ ಮಹಿಳಾ ಪೇದೆಗೆ ನಗರದಲ್ಲಿ ಕೆಎಎಸ್‌ ಕೋಚಿಂಗ್‌ಗೆ ಉಚಿತ ಪ್ರವೇಶ ಸಿಕ್ಕ ಹಿನ್ನೆಲೆಯಲ್ಲಿ ಬೆಂಗಳೂರಿಗೆ ಬಂದಿದ್ದರು. ಅದಕ್ಕೆ ಅಮೀನ್‌ ಸಾಬ್‌ ಸಹಾ ಮಾಡಿದ್ದ. ಆದರೆ, ಪೇಯಿಂಗ್‌ ಗೆಸ್ಟ್‌ ಬಾಡಿಗೆಗೆಂದು ಪೇದೆಯ ತಾಯಿಯಿಂದಲೇ 20 ಸಾವಿರ ರೂ. ಪಡೆದುಕೊಂಡಿದ್ದ.

2016ರ ಡಿಸೆಂಬರ್‌ನಲ್ಲಿ ಪೇದೆ ತನ್ನ ಅಕ್ಕನ ಮನೆಗೆ ಹೋದಾಗ ಅಲ್ಲಿಗೆ ಬಂದ ಅಮೀನ್‌, ಲೈಂಗಿಕ ಸಂಪರ್ಕಕ್ಕೆ ಒತ್ತಾಯಿಸಿದ್ದ. ತಿರಸ್ಕರಿಸಿದಾಗ ಹಲ್ಲೆ ಮಾಡಿದ್ದ. ಬಳಿಕ 2016ರ ಡಿ.19ರಂದು ಬೆಂಗಳೂರಿನ ಲಾಡ್ಜ್‌ಗೆ ಕರೆದೊಯ್ದ ಆತ ದೈಹಿಕ ಸಂಪರ್ಕ ಹೊಂದಿದ್ದ. ಹೀಗಾಗಿ ಪೇದೆ ಮದುವೆಯಾಗುವಂತೆ ಒತ್ತಾಯಿಸಿದ್ದರು. ಈ ವೇಳೆ ನೀನು 'ನೀನು ಕೆಳ ಜಾತಿಯ ಹುಡುಗಿ' ಎಂದು ಅವಮಾನಿಸಿ ಮದುವೆಯಾಗಲು ನಿರಾಕರಿಸಿದ್ದ.

ಆರೋಪಿ ಅಮೀನ್‌ ಸಾಬ್‌ ಮತ್ತು ಆತನ ಕುಟುಂಬ ಸದಸ್ಯರ ವಿರುದ್ಧ ಜಾತಿ ನಿಂದನೆ, ಅತ್ಯಾಚಾರ, ಮಹಿಳಾ ಗೌರವಕ್ಕೆ ಧಕ್ಕೆ ಸೇರಿದಂತೆ ವಿವಿಧ ಸೆಕ್ಷನ್‌ ಅಡಿ ಎಫ್‌ಐಆರ್‌ ದಾಖಲಾಗಿದೆ.

ಆಶ್ಲೀಲ ಫೋಟೋ ತೋರಿಸುತ್ತಿದ್ದ: ವಾಟ್ಸ್‌ಆ್ಯಪ್‌ ಕರೆ ಮಾಡುತ್ತಿದ್ದ ಆರೋಪಿ ಅಮೀನ್‌, ಅಶ್ಲೀಲ ಚಿತ್ರಗಳನ್ನು ತೊರಿಸಿ, 'ನೀನು ಸಹ ಇದೇ ರೀತಿ ಅಂಗಾಂಗ ತೋರಿಸು' ಎಂದು ಕಿರುಕುಳ ನೀಡುತ್ತಿದ್ದ ಎಂದು ಸಂತ್ರಸ್ತೆ ದೂರಿನಲ್ಲಿ ಆರೋಪಿಸಿದ್ದಾರೆ.