ಮಹಿಳೆ ಅಡ್ಡಗಟ್ಟಿ ನೆಲಕ್ಕೆ ಬೀಳಿಸಿ ಬ್ಯಾಗ್‌ ಕಿತ್ತು ಪರಾರಿ

ಬೆಂಗಳೂರು: ಬ್ಯಾಂಕ್‌ ಲಾಕರ್‌ನಲ್ಲಿ ಇಟ್ಟಿದ್ದ ಬೆಳ್ಳಿ ಸಾಮಾನುಗಳನ್ನು ತೆಗೆದುಕೊಂಡು ಮನಗೆ ಬರುತ್ತಿದ್ದ ಮಹಿಳೆಯನ್ನು ಅಡ್ಡಗಟ್ಟಿ ನೆಲಕ್ಕೆ ಬೀಳಿಸಿ ಅವರ ಕೈಯಿಂದ ಬ್ಯಾಗ್‌ ದರೋಡೆ ಮಾಡಿಕೊಂಡು ಪರಾರಿ ಆಗಿರುವ ಘಟನೆ ನಡೆದಿದೆ.

ಶಾಂತಾ ದರೋಡೆಗೆ ಒಳಗಾದವರು. ಶುಕ್ರವಾರ ಬೆಳಗ್ಗೆ 11 ಗಂಟೆ ಸುಮಾರಿಗೆ ಪತಿ ಜತೆಗೆ ಬ್ಯಾಂಕ್‌ಗೆ ಹೋಗಿ ಲಾಕರ್‌ನಲ್ಲಿ ಇಟ್ಟಿದ್ದ ಒಂದು ಲಕ್ಷ ರೂ ಮೌಲ್ಯದ ಬೆಳ್ಳಿ ಸಾಮಾನುಗಳನ್ನು ತೆಗೆದುಕೊಂಡು ಬ್ಯಾಗಿಗೆ ಹಾಕಿಕೊಂಡು ವಾಪಸ್ಸಾಗುತ್ತಿದ್ದರು. ಬ್ಯಾಂಕ್‌ನಿಂದ ಆಟೋ ಹತ್ತಿ ಮನೆ ಸಮೀಪದಲ್ಲಿ ಆಟೋ ಇಳಿದು ನಡೆದು ಹೋಗುತ್ತಿದ್ದಾಗ ಕೃತ್ಯ ನಡೆದಿದೆ.

ಬೈಕಿನಲ್ಲಿ ಹಿಂದಿನಿಂದ ಬಂದ ಆರೋಪಿಗಳು ಶಾಂತಾ ಅವರನ್ನು ಎಳೆದು ಬೀಳಿಸಿ ಅವರ ಕೈಯಲಿದ್ದ ಬ್ಯಾಗ್‌ ಕಿತ್ತುಕೊಂಡು ಪರಾರಿ ಆಗಿದ್ದಾರೆ. ಕುಮಾರಸ್ವಾಮಿ ಲೇಔಟ್‌ ಪೊಲೀಸ್‌ ಠಾಣೆಯ ಕೆಂಚನಹಳ್ಳಿ 3ನೇ ಕ್ರಾಸ್‌ನಲ್ಲಿ ಘಟನೆ ನಡೆದಿದ್ದು ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.