ಆ್ಯಪ್ನಗರ

ಮಳೆಗಾಗಿ ಮೊರೆ: ಪರ್ಜನ್ಯ ಜಪ, ಪೂಜೆ

ಮುಂಗಾರು ಸಮೀಪಿಸುತ್ತಿದ್ದು ಮಳೆಗಾಗಿ ಜನರು ದೇವರು, ಜಪ, ತಪಗಳ ಮೊರೆ ಹೋಗುತ್ತಿದ್ದಾರೆ. ಬರ ನೀಗಿ ಜಿಲ್ಲೆಯಲ್ಲಿ ಸಮೃದ್ಧ ಮಳೆ, ಬೆಳೆಯಾಗಿ ನಾಡು ಸುಭಿಕ್ಷವಾಗಲಿ ಎಂದು ನಗರದ ನಾನಾ ದೇವಾಲಯಗಳಲ್ಲಿ ಬುಧವಾರ ಪೂಜೆ, ಜಪ ನಡೆಸಲಾಯಿತು.

ವಿಕ ಸುದ್ದಿಲೋಕ 1 Jun 2017, 9:57 am
ದಾವಣಗೆರೆ : ಮುಂಗಾರು ಸಮೀಪಿಸುತ್ತಿದ್ದು ಮಳೆಗಾಗಿ ಜನರು ದೇವರು, ಜಪ, ತಪಗಳ ಮೊರೆ ಹೋಗುತ್ತಿದ್ದಾರೆ. ಬರ ನೀಗಿ ಜಿಲ್ಲೆಯಲ್ಲಿ ಸಮೃದ್ಧ ಮಳೆ, ಬೆಳೆಯಾಗಿ ನಾಡು ಸುಭಿಕ್ಷವಾಗಲಿ ಎಂದು ನಗರದ ನಾನಾ ದೇವಾಲಯಗಳಲ್ಲಿ ಬುಧವಾರ ಪೂಜೆ, ಜಪ ನಡೆಸಲಾಯಿತು.
Vijaya Karnataka Web
ಮಳೆಗಾಗಿ ಮೊರೆ: ಪರ್ಜನ್ಯ ಜಪ, ಪೂಜೆ


ಹಿಂದು ಪರಂಪರೆಯಲ್ಲಿ ಮಳೆಯ ನಂಟಿನ ಅನೇಕ ಆಚರಣೆಗಳಿವೆ. ಸಂಗೀತ, ಜಪ, ತಪ, ಹೋಮ ಹಾಡುಗಾರಿಕೆ ಮೂಲಕ ಮಳೆಯ ಕರೆಯುವುದರ ಜತೆ ನಗಾರಿ ಬಾರಿಸಿ ಮೋಡಗಳು ಒಟ್ಟುಗೂಡಿಸುವ ಪ್ರಯತ್ನಗಳೂ ಇವೆ. ಮೂರು ವರ್ಷ ಬರದಿಂದ ಕಂಗೆಟ್ಟಿರುವ ಜನತೆ ಈಗ ಮಳೆಯ ಧ್ಯಾನ ಮಾಡುತ್ತಿದ್ದು ನಾನಾ ಆಚರಣೆಗಳ ಮೂಲಕ ಮಳೆಗಾಗಿ ದೇವರ ಮೊರೆ ಹೋಗಿದ್ದಾರೆ.

ಪರ್ಜನ್ಯ ಜಪ, ವಿರಾಟ ಪರ್ವ : ನಗರದ ಪಿಜೆ ಬಡಾವಣೆಯ ರಾಘವೇಂದ್ರಸ್ವಾಮಿ ಮಠದಲ್ಲಿ ಮಳೆಗಾಗಿ ಪ್ರಾರ್ಥಿಸಿ ಹಾಗೂ ಲೋಕ ಕಲ್ಯಾಣಕ್ಕಾಗಿ ಬುಧವಾರ ಪರ್ಜನ್ಯ ಸೂಕ್ತ ಜಪ, ಹೋಮ ಹಾಗೂ ವಿರಾಟ ಪರ್ವ ಪ್ರವಚನ ನಡೆಯಿತು. ಮಳೆ ಬಂದು ಬರ ನೀಗಲಿ ಎಂದು ಪ್ರಾರ್ಥಿಸಿ ಜೂ.3 ರ ಭಾನುವಾರದವರೆಗೂ ಪ್ರತಿ ದಿನ ಜಪ, ಹೋಮ, ಪ್ರವಚನ ನಡೆಯಲಿದೆ.

ರಾಯರ ಮಠದ ಆವರಣದ ಸನ್ನಿಧಾನದ ಹಿಂದಿನ ಪುಟ್ಟ ಕಲ್ಯಾಣಿಯಲ್ಲಿ ನೀರಿನಲ್ಲಿ ಕುಳಿತು ಪರ್ಜನ್ಯ ಸೂಕ್ತ ಜಪ ನಡೆಯಿತು. ಬೆಳಗ್ಗೆ 7 ಕ್ಕೆ ಆರಂಭವಾದ ಜಪ 10 ಗಂಟೆಯವರೆಗೆ ನಡೆದು ಸುಮಾರು 17 ಮಂದಿ ಸೇವಾಕರ್ತರು ಪಾಲ್ಗೊಂಡು ಜಪ, ಸಂಕಲ್ಪ ನಡೆಸಿಕೊಟ್ಟರು.

ಜೀವನ ಎಂದು ಕರೆಯಲ್ಪಡುವ ನೀರು ಎಲ್ಲ ಜೀವದ ಬದುಕಿಗೆ ತುಂಬ ಅಗತ್ಯ. ಕರುಣಾ ಸಾಗರನಾದ ಪರಮಾತ್ಮನ ಅನುಗ್ರಹದಿಂದ ಲೋಕದಲ್ಲಿ ಎಲ್ಲ ಕಡೆ ಹಾಗೂ ವಿಶೇಷವಾಗಿ ದಾವಣಗೆರೆ ಜಿಲ್ಲೆಯಲ್ಲಿ ಸಮೃದ್ಧ ಮಳೆಯಾಗಿ, ಬೆಳೆಯಾಗಿ ಸಮಾಜ ಸುಭೀಕ್ಷವಾಗಲಿ. ಜನರಿಗೆ ಸುಖ, ಶಾಂತಿ ದೊರೆಯಲಿ ಎಂಬ ಸದುದ್ದೇಶದಿಂದ ಮಾಧ್ವ ಮಹಾಪರಿಷತ್‌ನಿಂದ ಈ ಜಪ, ಹೋಮ ಆಯೋಜಿಸಲಾಗಿದೆ ಎಂದು ಸುತೀರ್ಥ ಕಟ್ಟಿ ತಿಳಿಸಿದರು.

ಅಮ್ಮನಿಗೆ ಶತರುದ್ರಾಭಿಷೇಕ: ನಗರದ ಊರ ದೇವತೆ ದುರ್ಗಾಂಭಿಕಾ ದೇವಾಲಯದಲ್ಲಿ ಸೇವಾ ಸಮಿತಿಯಿಂದ ಬುಧವಾರ ಮಳೆಗಾಗಿ ಪ್ರಾರ್ಥಿಸಿ ಶತ ರುದ್ರಾಭಿಷೇಕ, ವಿಶೇಷ ಪೂಜೆ ನಡೆಯಿತು. ಕಳೆದ ಕೆಲ ದಿನಗಳಿಂದ ಗ್ರಾಮ ದೇವತೆ ದುಗ್ಗಮ್ಮ ಗುಡಿಯಲ್ಲಿ ಈ ರೀತಿಯ ಮಳೆಗಾಗಿ ಪ್ರಾರ್ಥಿಸಿ ಪೂಜೆ, ಪ್ರಾರ್ಥನೆಗಳು ನಿರಂತರ ನಡೆಯುತ್ತಿವೆ. ಇದರ ಜತೆ ಗ್ರಾಮೀಣ ಪ್ರದೇಶದಲ್ಲಿ ಕೂಡ ಪೂಜೆ, ಕಪ್ಪೆ, ಕತ್ತೆಗಳ ಮದುವೆಯಂತಹ ಜನಪದ ಆಚರಣೆಗಳು ಕೂಡ ನಡೆಯುತ್ತಿವೆ.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ