ನಾಯಿಗಳ ದಾಳಿಗೆ ಬಲಿಯಾದ ಕೃಷ್ಣಮೃಗ

ಮೊಳಕಾಲ್ಮುರು : ತಾಲೂಕಿನ ಕೊಂಡ್ಲಹಳ್ಳಿಯ ಕೋನಸಾಗರ ರಸ್ತೆಯಲ್ಲಿ ಮಂಗಳವಾರ ಬೆಳಗ್ಗೆ ನಾಯಿಗಳ ದಾಳಿಗೆ ಕೃಷ್ಣಮೃಗವೊಂದು ಬಲಿಯಾಗಿದೆ.

ಈ ಭಾಗದಲ್ಲಿ ಕೃಷ್ಣಮೃಗಗಳ ಹಿಂಡು ರಸ್ತೆ ಬದಿಯಲ್ಲಿ ನೀರು ಕುಡಿಯಲು ಆಗಾಗ ಬರುತ್ತಿರುತ್ತವೆ. ಈ ವೇಳೆ ನಾಯಿಗಳು ಈ ಹಿಂಡನ್ನು ಚದುರಿಸಿ ಒಂದು ಕೃಷ್ಣಮೃಗವಿನ ಮೇಲೆ ದಾಳಿ ಮಾಡಿದ್ದನ್ನು ಕಂಡ ಗ್ರಾಮಸ್ಥರು ನಾಯಿಯಿಂದ ರಕ್ಷಿಸಿದ್ದಾರೆ.

ಕೃಷ್ಣಮೃಗ ತೀವ್ರ ಗಾಯಗೊಂಡಿತ್ತು. ಈ ಮಾಹಿತಿಯನ್ನು ಅರಣ್ಯ ಇಲಾಖೆಗೆ ತಿಳಿಸಿದ್ದರಿಂದ ಸ್ಥಳಕ್ಕೆ ಅಧಿಕಾರಿಗಳು ಆಗಮಿಸಿ ಚಿಕಿತ್ಸೆ ನೀಡಿದ್ದಾರೆ. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಕೃಷ್ಣಮೃಗ ಮೃತಪಟ್ಟಿದೆ.

ಅರಣ್ಯ ಸಿಬ್ಬಂದಿ ಪಟ್ಟಣದ ಮಹಾದೇವ ಸಸ್ಯಕ್ಷೇತ್ರದಲ್ಲಿ ಕೃಷ್ಣಮೃಗದ ಅಂತ್ಯಸಂಸ್ಕಾರ ನೆರವೇರಿಸಿದರು. ಸ್ಥಳದಲ್ಲಿ ಉಪ ವಲಯಾರಣ್ಯಾಧಿಕಾರಿ ಬಾಷಾ, ಸಿಬ್ಬಂದಿ ಸುನಿಲ್‌, ಪ್ರಸನ್ನ, ಪಶುವೈದ್ಯ ಮಾಧವ್‌, ಕೊಂಡ್ಲಹಳ್ಳಿ ಗ್ರಾಮಸ್ಥರಾದ ಎಂ.ಟಿ. ಚಂದ್ರಶೇಖರ್‌, ಕೆ.ಎಂ.ರಾಮಚಂದ್ರ, ಪ್ರಕಾಶ ಇದ್ದರು.