​ಸಾಲಬಾಧೆ: ಗಂಗನರಸಿ ರೈತ ಆತ್ಮಹತ್ಯೆ

ಹರಿಹರ : ಸಾಲಬಾಧೆಯಿಂದ ಬೇಸತ್ತ ರೈತನೋರ್ವ ಆತ್ಮಹತ್ಯೆ ಮಾಡಿಕೊಂಡ ಘಟನೆ ತಾಲೂಕಿನ ಗಂಗನರಸಿ ಗ್ರಾಮದಲ್ಲಿ ಮಂಗಳವಾರ ನಡೆದಿದೆ.

ಬೇತೂರು ವೀರಭದ್ರಪ್ಪರ ಪುತ್ರ ಬೇತೂರು ನಾಗರಾಜ್‌(40)ಮೃತರು. ಮೂರು ವರ್ಷಗಳಿಂದ 1 ಎಕರೆಯಲ್ಲಿ ಬೆಳೆಯುತ್ತಿದ್ದ ಭತ್ತದ ಬೆಳೆ ಒಣಗಿ ಕೈಗೆ ಬಾರದಂತಾಗಿತ್ತು. ಇದರಿಂದ ಬೇಸತ್ತು ಭತ್ತದ ಬದಲು ಮೆಕ್ಕೆಜೋಳ ಬಿತ್ತನೆ ಮಾಡಿದ್ದರು. ಆ ಬೆಳೆಯೂ ಕೂಡ ನೀರಿನ ಕೊರತೆಯಿಂದ ಕೈಗೆಟುಕಲಿಲ್ಲ.

ತಾಲೂಕಿನ ಸಾರಥಿ ಕಾಪೋರ್‍ರೇಷನ್‌ ಬ್ಯಾಂಕ್‌ ಶಾಖೆಯಲ್ಲಿ 1.28 ಲಕ್ಷ ರೂ. ಸಾಲ ಪಡೆದಿದ್ದರು. ಕೈಗಡ ಸಾಲವೂ ಇತ್ತು. ಇವರ ಪತ್ನಿ ಧರ್ಮಸ್ಥಳ ಸಂಸ್ಥೆಯಲ್ಲಿ ಸಾಲ ಪಡೆದಿದ್ದರು. ಈ ಕುಟುಂಬದ ಮೇಲೆ ಒಟ್ಟು 2.28 ಲಕ್ಷ ರೂ. ಸಾಲದ ಬಾರವಿತ್ತು ಎನ್ನಲಾಗಿದೆ.

ಸಾಲ ಪಾವತಿ ಮಾಡಲು ಸಂಬಂಧಿಕರಲ್ಲಿ ಇತ್ತೀಚಿಗೆ 50 ಸಾವಿರ ರೂ. ಸಾಲ ಕೇಳಿ ನಾಗರಾಜ್‌ ವಿಫಲರಾಗಿದ್ದರು. ಇದರಿಂದ ಬೇಸತ್ತು ರೈತ ಮಧ್ಯಾಹ್ನ ಜಮೀನಿನಲ್ಲಿ ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಮೃತರಿಗೆ ಪತ್ನಿ, ಓರ್ವ ಪುತ್ರ ಇದ್ದಾರೆ. ಗ್ರಾಮಾಂತರ ಠಾಣೆಯಲ್ಲಿ ದೂರು ದಾಖಲಾಗಿದೆ.