ಒಣಗಿದ ಬೆಳೆ: ಗ್ರಾಪಂ ಸದಸ್ಯ ಆತ್ಮಹತ್ಯೆ

ಹರಪನಹಳ್ಳಿ : ಬೆಳೆ ಮಳೆ ಬಾರದೆ ಒಣಗುತ್ತಿದ್ದರಿಂದ ಮನನೊಂದು ರೈತ ಹಾಗೂ ಗ್ರಾಪಂ ಸದಸ್ಯ ವಿಷ ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡ ಘಟನೆ ತಾಲೂಕಿನ ಉಚ್ಚಂಗಿದುರ್ಗದಲ್ಲಿ ಶುಕ್ರವಾರ ನಡೆದಿದೆ.
ಗ್ರಾಮದ ಸಿದ್ದಪ್ಪ(35)ಮೃತರು. ರೈತ ಜೂನ್‌ ಮೊದಲ ವಾರ ಸ್ವಲ್ಪ ಮಳೆ ಆದ ಕಾರಣ ತಮ್ಮ ಎಂಟು ಎಕರೆ ಜಮೀನಿನಲ್ಲಿ ಮೆಕ್ಕೆಜೋಳ ಬಿತ್ತಿದ್ದರು. ನಂತರ ಮಳೆ ಬಾರದ್ದಕ್ಕೆ ಮೆಕ್ಕೆಜೋಳ ನಾಶ ಮಾಡಿದ್ದರು.
ಕಳೆದ 15 ದಿನಗಳ ಕೆಳಗೆ ಮೂರು ದಿನ ಸತತ ಅಲ್ಪ ಮಳೆ ಬಂದ ಹಿನ್ನಲೆಯಲ್ಲಿ ಪುನಃ ಮೆಕ್ಕೆಜೋಳ ಅದೇ ಎಂಟು ಎಕರೆಯಲ್ಲಿ ಬಿತ್ತಿದ್ದರು. ಮತ್ತೆ ಮಳೆ ಕೈ ಕೊಟ್ಟಿತು. ಹೀಗೆ ಮಳೆರಾಯನ ಕಣ್ಣಾಮುಚ್ಚಾಲೆಯಿಂದ ಎರಡನೇ ಬಾರಿ ಬಿತ್ತಿದ ಮಳೆ ಸಹ ಒಣಗಿ ಹೋಗುತ್ತಿದ್ದನ್ನು ನೋಡಿ ಮನನೊಂದ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆಂದು ಕುಟುಂಬದವರು ತಿಳಿಸಿದ್ದಾರೆ. ಮೃತರಿಗೆ ಪತ್ನಿ, ಒಬ್ಬ ಪುತ್ರ, ಪುತ್ರಿ ಇದ್ದಾರೆ. ಉಚ್ಚಂಗಿದುರ್ಗದಲ್ಲಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.