ಪತ್ನಿ ಕೊಲೆ: ಪತಿಗೆ ಜೀವಾವಧಿ ಶಿಕ್ಷೆ

ದಾವಣಗೆರೆ: ಪತ್ನಿ ಕೊಲೆ ಮಾಡಿದ್ದ ಪತಿಗೆ ಜೀವಾವಧಿ ಶಿಕ್ಷೆ, 6 ಸಾವಿರ ರೂ. ದಂಡ ವಿಧಿಸಿ ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯ ತೀರ್ಪು ನೀಡಿದೆ.

ಹರಿಹರ ತಾಲೂಕಿನ ಗಂಗನರಸಿ ಗ್ರಾಮದ ಶಿವಪ್ಪ(46)ಶಿಕ್ಷೆಗೊಳಗಾದವ. ಶಿವಪ್ಪನಿಗೆ ಅಪಘಾತವಾಗಿ ಪರಿಹಾರದ ಹಣ ಬಂದಿತ್ತು. ಈ ಹಣವನ್ನು ಪತ್ನಿ ಈರಮ್ಮ ಕೊಡುತ್ತಿಲ್ಲವೆಂದು ಜಗಳವಾಡುತ್ತಿದ್ದಾಗ ಕೊಲೆ ಮಾಡಿದ್ದ. ಜಗಳ ಬಿಡಿಸಲು ಬಂದಿದ್ದ ಮಹಿಳೆಯರಿಗೂ ಜೀವ ಬೇದರಿಕೆ ಹಾಕಿದ್ದ. ಈ ಕುರಿತು ಶಿವಪ್ಪನ ಮಗ ವೀರೇಶ್‌ ಹರಿಹರ ಗ್ರಾಮಾಂತರ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದ. ಸಬ್‌ಇನ್ಸಪೆಕ್ಟರ್‌ ಎಚ್‌.ಎಂ.ಸಿದ್ದೇಗೌಡ ಪ್ರಕರಣ ದಾಖಲಿಸಿಕೊಂಡಿದ್ದರು. ವೃತ್ತ ನಿರೀಕ್ಷ ಕ ಜೆ.ಎಸ್‌.ನ್ಯಾಮಗೌಡ ತನಿಖೆ ನಡೆಸಿ, ನ್ಯಾಯಾಲಯಕ್ಕೆ ದೋಷಾರೋಪಣೆ ಪಟ್ಟಿ ಸಲ್ಲಿಸಿದ್ದರು.

ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದ ನ್ಯಾಯಾಧೀಶೆ ಎಂ.ಶ್ರೀದೇವಿ ಪ್ರಕರಣದ ವಿಚಾರಣೆ ನಡೆಸಿ, ಶಿಕ್ಷೆ ನೀಡಿದ್ದಾರೆ. ಸರಕಾರದ ಪರ ಅಭಿಯೋಜಕ ಎಸ್‌.ವಿ.ಪಾಟೀಲ್‌ ವಾದ ಮಂಡಿಸಿದ್ದರು.